Read Nyishi BEGGAR 4 Bible Online

BEGGAR 4 - Nyishi bible

BEGGAR 4

¹Adam mwwg nywxw Ibwn doognum, hoo mwn ko gvknv hoo Keennvn bwwnum, begamv, “At Swg svka hoqgv ngo nyega ak kaapa paku.”

²‍Hoo akta, mwn mwwg bor Ebelnvn ko bwwnum. Ebel sviya rvkil pvvcumbo akwb nyinum, hoo Keen rongo mvnbo akwb nyinum.

³‍Mood oyu kokw so Keen At Swn rongo hoqg aaxy-amaram aky bwa jinum,

⁴‍hoo Ebel mwwg sviya pvtw hoqg otuqcob ko bwwnam mam la dwjwl jwwtw boam bwa jinum. Hoo At Sw Ebelnvn la mwwg aky jinam mam xumtnum,

⁵‍hvbmabde Keen nvla mwwg aky jinam mam xumt maanum. Ho Keen vcjaqb haaxaqnum, hoo mwwg nyuqmv moiya rvxanum.

⁶‍At Sw Keennvn benum, “Hoggub no haaxaq dvn, hoo hoggub noqg nyuqmv moiya rvxa dvn?

⁷‍No alwb nyib nyiloqkam, nam loorwq ram yv? Hoo no alwb nyima baloqkam, nyicv viyapho suudu do. Soqg mwwbynam si noq gabsu, hvbmabde hoqham no hoggub nyijaqkam pvvb mviya to.”

⁸‍Keen mwwg bor Ebelnvn agam goonum. Hoo hwdlo bulv rongo ho yvi yikho, Keen mwwg bor Ebelg aoho ceekol mwam mengnum.

⁹‍Ho At Sw Keennvn benum, “Noqg bor Ebel hoglo?” “Mwv benum, “Ngo cengma; ngoqg boram ngo rvkil bongv i?”

¹⁰‍Hoo At Sw benum, “Hoggv no nyipa kun? Noq borwg hijum yalv ked hoqgv ngam sogoql xobdul doodo.

¹¹‍Hoo sija no beenam ked hoqgv ku, hoqhv agam gamkoq tvl noqg alaq hoq mengnam noqg borwg hijum mam svgagvrwq paku.

¹²‍Hwdlo no kedam rongo mvikam, hoqhv hog hwdgo swwtanam hwdgo nam swwj kuram. Swcw nvg aoso no nam doomab gvqmwl yvtayin.”

¹³‍Keen At Swn benum, “Ngoqg laqm baqdynam si ngoqg baqdynam mam koi yaado.

¹⁴‍Kaato, no soolo ngam gvda soqgv ruqlin paku, hoo noqg kaaga hoqgv ngo kvs dvb nyipa ku. Swcw nvg aoso ngo nam doomab gvqmwl yvta yuku, hoo hiyv lajaqkam ngam kaapa bov ngam mengtayin.”

¹⁵‍Ho At Sw mwam benum, “Hvbma! Keennvn hiyv lajaqkam mengb nyiloqkam, kvn yaag hoq kwliam naatayin.” Hoo At Sw Keennvn kaacin dvb nyi mengm mvma dvb muxnam ak mvnum.

¹⁶‍Hoo Keen At Swg kaaga hoqgv wleq kunum hoo Idenwg dou-cagag Nod gvdaho nvmcw doa kunum.

¹⁷‍Keen mwwg nywxwngam doognum, hoo mwn ko gvnum hoo Inoknvn ko bwwnum. Mwv bopam ak ywrtwl hoq bopam hoqg eminam Inok, mwwg ko tuup eminho mingnum

¹⁸‍Inok gab Iradnvn ko bwwnum, hoo Irad Mehujaelg abv, hoo Mehujael Metusaelg abv, hoo Metusael Lamekwg abv.

¹⁹‍Hoo Lamek nywxw vnyi go naanum. Akwn hoqgv eminv Ada, hoo asaq akwn hv Jilla.

²⁰‍Ada Jabalnvn ko bwwnum; mwv tombu ho doogw tvl tuun-meengam sorabo ab gob nyinum.

²¹‍Mwwg bor hoqg eminv Jubal; mwv rwwxw-gunggangam la piul mvnbo ab gob nyinum.

²²‍Jilla Tubal-keennvn ko bwwnum; mwv tamangam la yoqdwr lvgab dupum-dvrab pam yip pwnbob nyinum. Tubal-keenwg bwrmv Naama.

²³‍Lamek mwwg nywxw tulungam benum: “Ada la Jilla, ngoqg goonam yalam tato; Lamekwg nywxw tulug nulv ngoqg benam sam taiya to: Nyi yaapa ak ngam un mvg ko-gab, nyi yaapa ak ngam jwwgam gab ngo hoqg nyi akam mengpe kun.

²⁴Keenwg kwliam kvn go kwly naab nyiloqkam, ho Lamekwg kwliam camkvn leq kvn go kwly naadwb nyitayin.”

²⁵‍Hoo Adam lokta mwwg nywxwngam doognum, hoo mwn nyega ko ak bwwnum hoo mwwg eminam Set hvl goqnum, hoggab mwn benum, “Pwnbog mood xikjaqb ngam Ebelg kwlib hosiqkam jipa ku, hoggab Keen mwam mengnum.”

²⁶‍Set gab kam nyega ko bwwjnum, hoo mwv mwwg eminam Inos hvl goqnum. Hoq moodho nyiilungv At Swg eminam paql xuml goqrab kunum.