Read Nyishi BEGGAR 40 Bible Online

BEGGAR 40 - Nyishi bible

BEGGAR 40

¹Meeg mood kokw so Ijipt lvpw atwg twws pvtaq joonbov la mwwg wtw dvsam mvnbov bulug Ijipt lvpw bir atam nyimurnum.

²‍Hoo Paro mwwg saab, twws pvtaq joonbo peelo ngam la wtw dvsam mvnbo peelo, vnyiam hangv lengnum,

³‍hoo hogloq ho Josapnvn tuml apnum, hoqho mwv bulam rvkybo keptenwg pvtwq namho tumlwqnum.

⁴‍Rvkybo kepten akv Josapnvn bulug lvgab dool bulam kanam tamdvb xuqnum. Bulv pvtwqho mood oyu go doonum

⁵‍Hoo Ijipt lvpw atwg twws pvtaq joonbo akv la wtw dvsam mvnbo akv—ai golo bulv yuma maanum, hiyam pvtwq uraho tuml apnum—bunyiv asaq-asaq yumangam maanam, hoo bunyig yuma hoqg niqtuqkv luusaq-luusaqnum.

⁶‍Hwdlo Josap ar bulug dookub haai yikho, mwv bulam mwwdwq dvb kaapanum.

⁷‍Ho mwwg nyiit at akwg nam urag pvtwqho mwwg lvgab doon boam, mwv Parog saab tulungam toxnum, “Hog gab soolo nulug nyuqmv mooma-sasa dvn?”

⁸‍Bulv mwam benum, “Ngulv yuma ata go maanum, hoo hoq tulug niqtuqkam bekin bo akkam dooma.” Hoo Josap bulam benum, “Yumag niqtuqkam betam mvdwb jinbov Pwnbo maai yv? Ngam hoq tulu ham betam kvka tvna.”

⁹‍Ho peelo twws joonbov mwwg yumangam Josapnvn betamnum hoo mwv benum, “Ngoqg agaho roo ann ak doodwb, ngoqg yumaho kaapanum,

¹⁰‍hoo hoq roo annho haqb oum go doonum. Hoqg okv jurlin kalam hoqho opungv puulin kunum, hoo roo opiumv ningknum.

¹¹‍Parog pvtaqkv ngoqg alaq so doonum, hoo ngo roo aaxiam naanum hoo hoq tulu ham Parog pvtaqho nyumxurl nyumlwq tvl hoo Parog alaqho gvqlwqnum.”

¹²‍Ho Josap mwam benum, “Soq si soqg niqtuqkv: haqb oum hv aal loum mam bedwn.

¹³‍Aal loum deenam Paro nam naatayin hoo noqg bon nyikho nam hookur mvtayin, hoo otuqho hoggub no mwwg twws pvtaqkam joonbob nyitwl Parog alaqho pvtaqkam gvqlwq jinum, hvb no lokta nyitayin.

¹⁴‍Hwdlo no alwb nyil swrsob swwikam ngam mwwpa twqta bvka, hoo anya mwwpa gvdwl ngoqg pagoqkam Paronvn bepa tabka, ngam soq nam soqgv lvvgwb lengm dvb.

¹⁵‍Jvqtw jaqb bebnyiloqkam ngam Hibru gvda hoqgv boosil wgnum, hoo bulv ngam soq pvtwq ura sookam tumlwq dvb ngo hog nyimur akkam nyima.”

¹⁶‍Hwdlo Josapg yuma niqtuqkam betamnamv bijwqpa mwwikam wtw mvnbo peelo bov, Josapnvn mwv benum, “Ngo kam yuma ak maanum: ngoqg dumpo aoso wtw huc oum go doonum,

¹⁷‍hoo odum jaqg huc ho hoolu luuxy wtw mvnamv Paro gab doonum, hvbmabde ngoqg dumpo aog huc hoqg wtwngam pvtangv dvnum.”

¹⁸‍Hoo Josap birwql hoo benum, “Soq si soqg yuma niqtuqkv: huc cium hv aal loum mam bedwn.

¹⁹‍Aal loum deenam Paro nam toolin tayin hoo noqg dumpongam noqg hoqgv pvriq tayin! —hoo nam svvn aoho paqyin tayin. Hoo pvta tulungv noqg vdin aiyaqkam dvtayin.”

²⁰‍Aal loum kokw so Parog ko bwwdy haanum, ho mwv mwwg nyera tulu gab dvs mvl durum dvgnum hoo peelo twws joonboam la peelo wtw mvnboam mwwg nyera pengko hoqgv tolin mvknum.

²¹‍Mwv peelo twws joonboam mwwg bon nyitungam nyim kunum, hoo mwv Parog alaqho pvtaqkam gvqlwq jinum.

²²‍Hvbmabde mwv peelo wtw mvnboam pvqswrnum, Josap bulam bekjaqb nyinum.

²³‍Hvbsujaqkam peelo twws joonbo hv Josapnvn mwwgab kumanum, hoggab mwam mwwpa kumanum.