Read Nyishi BEGGAR 41 Bible Online

BEGGAR 41 - Nyishi bible

BEGGAR 41

¹Vnyw nywnyig kokw so Paro yuma ak maanum, mwv Nail bviywrho doqdunum,

²‍hoo kaato, Nail hoqgv jwwtw bvla dort tvl svv kvn go lvvgwb lengnum, hoo bulv rapeq nwmwngam dvnum.

³‍Hoo kaato, bulug kokwb Nail hoqgv swwxo-belo tvl kaac-kaaya bo svv kvn go lvvgwb lengnum, hoo Nail kvtin gonwg sugurho daqnum.

⁴‍Hoo swwxo-belo tvl kaac-kaaya bo svv hv jwwtw bvla dort bo svv kvn ham dvmeqnum. Hoo Paro yuma moul huurab kunum.

⁵‍Hoo mwv lokta yubnum hoo yuma lwnyi dvb maanum. Hoo kaato, bobuq bvla albo am vmlyw kvn go vmrw rwwkin ho swwdul doonum.

⁶‍Hoo kaato, bulug kokwb dou-cagag dooi yixin-yinin kunam am vmlyw sooriq-soomaq tvl vmcwr pogo-poro bo kvn go swwlinum.

⁷‍Hoo sooriq-soomaq tvl pogo-poro bo am vmlyw hv bobuq bvla albo am vmlywngam dvmeqnum. Hoo Paro yuma moul huurabnum, hoo kaato, hoqhv yuma ngv yu.

⁸‍Ho ar mwwg yalv mwwdwqnum, hoo mwv Ijipt hoqg mwlw gwwn-nyiqry boam la nyijwq-nyegam gamlaq boam goqa mvdwb kanamnum. Paro mwwg yuma tulungam bulam betamnum, hvbmabde akjijaqkam Parog yuma tulungam niqtuq bekin bo doomanum.

⁹‍Ho peelo twws joonbov Paronvn benum, “Ngo soolo ngoqg nyixiaqnam mam mwwpa duku.

¹⁰‍Hwdlo Paro mwwg nyera tulungam hang lengyikho ngam la peelo wtw mvnboam rvkybo keptenwg namho pvtwq lwqnum,

¹¹‍ngulv ai yubkin ho mwv la ngo yuma maanum, asaq-asaq yuma maanum hv luusaq-luusaq niqtuqkv doonum.

¹²‍Rvky bog keptenwg, Hibru nyera yaapa ak ngulug lvgab doonum. Hwdlo mwam ngulv yumangam betam yin, mwv ngulug yuma niqtuqkam bekinnum, ngunyig asaq-asaq yuma niqtuqkam hvbkalam bekinl betamnum.

¹³‍Hoo mwv yuma niqtuqkam bekinam hvbjaq nyiknum. Ngoqg bon nyikho ngam hookur mvknum, hoo wtw mvnbo akkam pvqswr kunum.”

¹⁴‍Ho Paro Josapnvn goqm dvb nyi kanamnum, hoo bulv mwam nyebia jaqb pvtwq hoqgv boolinum. Hoo mwv atv dum-nvm mam reqxaq tvl hoo mwwg vjam kwly layil, mwv Parog agaho haanum.

¹⁵‍Hoo Paro Josapnvn benum, “Ngo yuma ak maanum, hoo hoqham nyi akjijaqkam niqtuqkam bekin bo dooma. Ngo tapa nvmv no yumangam xwwkin mvtwl no hoqg yuma niqtuqkam bekin dvn hvl tapa do.”

¹⁶‍Josap Paronvn birwqnum, “Hoqhv ngoqg lvgab dooma, hvbmabde Pwnbov Paronvn niqtuq kvtaq boam birwqtayin.”

¹⁷‍Ho Paro Josapnvn benum, “Kaato, ngoqg yumaho ngo Nail sugurho doqdunum.

¹⁸‍Nail hoqgv jwwtw bvla dort tvl svv kvn go lvvgwb lengnum, hoo rapeq nwmwngam dvnum.

¹⁹‍Bulug kokwb swwxo-belo tvl kaac-kaaya bo svv kvn go lvvgwb lengnum, hoq hvk svvngam ngo nywywngam Ijipt gvda so kaaka ma.

²⁰‍Hoo swwxo-belo tvl kaac-kaaya bo svv hv otuq svv bobuql dortbo kvn ham dvnum,

²¹‍hvbmabde bulam hwdlo bulv dvnum ham nyi akam cengm mvma dvb dvpaq kunum, bulug kaac-kaayanamv hvraq otuq hvb doonum. Ho ngo huurabnum.

²²‍Ngo yumaho lokta kaapanum, bobuq bvla albo am vmlyw kvn go vmrw rwwkin ho swwdul doonum.

²³‍Bulug kokwb dou-cagag dooi yixin-yinin kunam am vmlyw sooriq-soomaq tvl vmcwr pogo-poro bo kvn go swwlinum,

²⁴‍hoo sooriq-soomaq tvl pogo-poro bo am vmlyw hv bobuq bvla albo am vmlywngam dvmeqnum. Hoo ngo gwwn-nyiqry tulungam betamnum, hvbmabde nyi akjijaqkam ham niqtuqkam ngam betam bo dooma.”

²⁵‍Ho Josap Paronvn benum, “Parog yuma maanum si luukin go; Pwnbov Paronvn betam coonum hoggv mwv nyita dvn.

²⁶‍Albo svv kvn hv vnyw kvn nv, hoo albo am vmlyw kvn hv vnyw kvn nv; yuma si luukinv.

²⁷‍Swwxo-belo bvla kaac-kaaya tvl svv kvn go bulug kokwb lengn bov vnyw kvn nv, hoo dou-cagag dooi yixin-yininam am vmlyw pogo-porol asarbov vnyw kvn go dwr wdy sanamv.

²⁸‍Hoqham ngo Paronvn betam pan; Pwnbov Paronvn hoggv mwv nyita dvn ham kaakin pakun.

²⁹‍Vnyw kvn go Ijipt gvda mwlwho dvs-twwsv naleq-baceq gob swwtayin,

³⁰‍hvbmabde vnyw kvn go dwr wtayin, hoo Ijipt gvdaho naleq-baceq kunam mam mwwpa kuram. Dwr-kanongv gvdangam twryum tayin,

³¹‍hoo dwr rwdwqkv wggam gab gvdaho naleq-baceqnam mam nyi cengkram.

³²‍Hoo Parog yuma maatin-maatin maamnamsi hvbnyiloqkam Pwnbov sam nyidwn xirwl ap paku, hoo Pwnbov oyu yoomab hoqham haam tayin.

³³‍Hoqgab sija Paro mwwlaq bolo la nyijwq-nyegam bo nyi loq xuqto, hoo Ijipt gvdangam mwam kaol nyig mvto.

³⁴‍Gvdangam kaol nyig mvdwb Paronvn saab tulungam xuqlin mvto hoo Ijipt gvdaho vnyw kvn go naleq-baceq go dvs swwnam hoqgv geeng hoqgv geegwn nookuml ap mvto.

³⁵‍Hoo albo vnyw tulug dvs swwlin bo tulu ham Paronvn gaml-ator jim tvl boqkum ko bopamg noosu tuluho dvs gab bvqlwq mvto, hoo hoq tulu ham hingkib pvvmto.

³⁶‍Ijipt gvdaho vnyw kvn go dwr wta ko-gab dvs tulu ham pvol pvvcuml apto, ho gvda nyiingv dwr-kano hoqgv siram.”

³⁷‍Soq nyidwb benam si Paro nvla mwwg saab tulungam tvlwqnum.

³⁸‍Hoo Paro mwwg saab tulungam benum, “Ngulv soq nyi sib nyinbo nyi kaapa yin yv, hiyvg ao lo Pwnbog Yalv doodwn?”

³⁹‍Ho Paro Josapnvn benum, “Pwnbov nam soq mwlw sam kaakin paku, noqg hvb soq so mwwlaq bvla nyijwq-nyegam bo akkam dooma.

⁴⁰‍No ngoqg namso pvvb bwwl doog tayin, hoo ngoqg nyiilu mwlwngv bulv atv-atv noqg gaml jinam mam tal swwtayin. Pwqlw dootam aro so ngo nam koi yaatayin.”

⁴¹‍Hoo Paro Josapnvn benum, “Kaato, ngo nam Ijipt gvda mwlwngam pvvb bwwl doog mvdwb mvpa kun.”

⁴²‍Ho Paro mwwg morx lvqcam mwwg alaq hoqgv naalayil hoo ham Josapg alaqho pilwq jinum, hoo mwam aljaqn bo jibw vjam koom kunum hoo hun gai ak mwwg lwwpo ho gvm kunum.

⁴³‍Hoo mwv mwam mwwg dvqsin ceriotho wwm kunum. Hoo bulv mwwg otuq goql wnum, “Lwbw kumbw to!” Ho mwv Josapnvn Ijipt gvda mwlwngam pvvb bwwl doog mvdkub mvknum.

⁴⁴‍Hoq aoho, Paro Josapnvn benum, “Ngo Paro la, hoo ngoqg cengma dvb Ijipt gvda mwlwho nyi akkam alaq irabram ho lvpia dvlwqram.”

⁴⁵‍Hoo Paro Josapg eminam Japenat-panea hvl goqnum. Hoo Onwg nyub Potiperag nyem ko Asenatnvn, mwv mwam nyem jinum. Ho Josap Ijipt gvdangam wiyiql kaaknum.

⁴⁶‍Hwdlo Josap Ijipt gv lvpw atwg Parog bonam nyidwb haai yikho mwv vnyw cammum gob axa kunum. Hoo Josap Parog dook hoqgv lengla yukul Ijipt gvda mwlwngam wiyiql kaanum.

⁴⁷‍Vnyw kvn go nyookv naleq-baceq dvb vly-axeqkv swwnum,

⁴⁸‍hoo mwv hoq vnyw kvn tuluho Ijipt gvda hoqg dvgam nookuml apnum, hoo dvgam bopam tuluho boqkuml apnum. Mwv bopam vx-cwrho diis-paapwg rongo tulug dvgam boqkuml ap mvnum.

⁴⁹‍Hoo Josap am mam naleq-baceq go, sa-svlog xuqx hvb nyida daqdwb, ho mwv hoqham xila maadkub, ho hoq boqkumnam mam xila maada daqdwb, noosu ho boqkum mvnum.

⁵⁰‍Dwr vnywngv haama taab Josap gab ko tuup vnyi go bwwknum. Onwg nyub Potipera nyem ko Asenat bulam mwwg gab bwwjnum.

⁵¹‍Josap gv tuup vbw cociq ham Manasse hvl emin mingnum. “Hoggab,” mwv benum, “Pwnbov ngoqg hentwr henknam mam la ngoqg abwg nombungam mwwpa mvkma.”

⁵²‍Vnyi deen ham mwv Iprayim hvl emin mingnum, “Hoggab Pwnbov ngoqg hentwr henk gvda so ngam mipar-gooiyiq mvpa ku.”

⁵³‍Vnyw kvn go naleq-baceq dvb swwnam moodv Ijipt gvdaho wiyum svqtwqb nyiknum,

⁵⁴‍hoo Josapg bek jaqb vnyw kvn go dwr wtanam moodv nyirab kunum. Asaq gvda mwlwho dwrv wnum, hvbmabde Ijipt gvda mwlwho dvsv doonum.

⁵⁵‍Hwdlo Ijipt gvdaho dwr rwdwqkv wi kun, nyiilungv Paronvn dvs konum. Paro Ijipt nyi tulungam benum, “Josap dookub wn. Hoggv mwv nulam betayin, hvb nyito.”

⁵⁶‍Ho hwdlo dwrv gvda mwlwho wiyiq yikho, Josap dvg noosu tulungam mvko tvl Ijipt nyi tulungam dvsam puqnum, hoggab Ijipt gvdaho dwrv rwdwq loodanum.

⁵⁷‍Hoq aoho, swcw soqg nyi mwlwngv Josap hoqgv dvg am rvtab Ijiptho haanum, hoggab swcw nvg aoso dwrv rwdwq loodanum.