Read Nyishi BEGGAR 42 Bible Online

BEGGAR 42 - Nyishi bible

BEGGAR 42

¹Hwdlo Jakub Ijiptho dvg puqdwk hvl cengnum, mwwg ko tuup tulungam mwv benum, “Hoggub nulv akwn-akwn kaagab-kaarabl doodwn?”

²‍Hoo mwv benum, “Kaato, Ijipt gvdaho dvg puqdwk hvl ngo tapanum. Boloqb igdvl dvg loq ngul gab rvta, ho ngulv swwl dookam yin pv hoo siram.”

³‍Ho Josapg vbw wywngv Ijipt gvdaho dvr rvtab haanum.

⁴‍Hvbmabde Josapg bor Benjaminnvn Jakub mwwg vbw tulug lvgab kanam maanum, hoggab mwam almab nyikam twqto mwwnv mwv bosnum.

⁵‍Soq sib Israelwg ko tuup tulu hvvkam dvr rvtab haanbo nyi tulug pengko ho haanum, hoggab Kanaan gvdaho dwrv wnum.

⁶‍Hoq moodho Josap gvdaho gvdag nyiit rad gob nyinum. Mwv gvdag nyiilungam dvg puqn bo akv. Hoo Josapg vbw tulungv haanum hoo bulv atv mwwg agaho bulug nyuqm mam kedho pvxwnum.

⁷‍Josap mwwg vbw tulungam kaatwl hoo bulam kaalaqnum, hvbmabde mwv bulam nyoodo nyi hvb nyin-mvnam hoo bulam gamtor alwb agam goonum. “Nulv hogloqkv haai yin hvl mwv benum?” Bulv benum, “Dvr rvtab, Kanaan gvda hoqgv haai yin.”

⁸‍Hoo Josap mwwg vbw tulungam kaalaqnum, hvbmabde bulv mwam kaacin maanum.

⁹‍Hoo bul gab yuma maaknum ham Josap yuma tulungam mwwpa kunum. Hoo mwv bulam benum, “Nulv mvqky-maqlam mvnbo go; nulv gvdag talonam mam kaatab haapa ku.”

¹⁰‍Bulv mwam benum, “Hvbma, ngoqg atv, noqg nyera tulungv dvs rvtab haaiyin.

¹¹‍Ngul mwlwngv nyi akinwg ko tuupv. Ngulv lootw bo nyi tulungv. Noqg nyera tulungv nywywngam mvqky-maqlam mvka ma.”

¹²‍Mwv bulam benum, “Hvbma, gvdag talonam mam nulv kaatab haapa ku.”

¹³‍Hoo bulv benum, “Ngulv, noqg nyera tulungv, vbw-bor camleq vnyi go doodwn, Kanaan gvda hoqg nyi akinwg ko tuupv, hoo kaato, anya jaqkv sija godab ngulug ab lvgab doodwn, hoo akwn dookma.”

¹⁴‍Hvbmabde bulam Josap benum, “Ngoqg nulam benam hv bijwqpa. Nulv mvqky-maqlam mvnbo go.

¹⁵‍Soq sam nyil nulam pooiyeq tayin: Parog emin gab bedwn, hwdlo nulv nulug bor anya ham so boa maady deedib nulv soq nyook soqgv wla kuram.

¹⁶‍Nulug akwn kanam to, hoo mwam nulug boram boa mvto, ho nulv so biimab dooiya to, ho nulug jvqtw agam benam mam cengtayin. Hvbmab nyiloqkam Parog emin gab bedwn, jvqtw jaqb nulv mvqky-maqlam mvnbo go.”

¹⁷‍Hoo mwv bul mwlwngam aal loum gab pvtwq uraho vlwqnum.

¹⁸‍Aal loum ho Josap bulam benum, “Soq sam nyito hoo nulv swwl dootayin, hoggab ngo Pwnboam bosbov:

¹⁹‍nulv lootw bo nyiingv jaq nyiloqkam nulv vbw akwn nulug sija pvtwq dookho dooiya mvto, hoo kiya gon nulug imiq dvparg dwr-kano gab dvg baqlayil wn,

²⁰‍hoo nulug bor anyangam ngam boa jito. Ho nulug agam mam jvqtwngv hvtayin, hoo nulv siram. “Hoo bulv hvb nyinum.

²¹‍Ho bulv akwn-akwn bemin sunum, “Jvqtwngam bebnyiloqkam ngulv ngulug boram nyixiaq ko-gab ngulam soq sib nyiyi kubo. Mwwg hentwr henam mam ngulv kaanum, hoo hwdlo mwv ngulam xuml daal mvnyi-moiyul svkangam konum ngulv tamanum. Hoqgab soq vs-axaq hentwr si ngulug aoso haapa ku.”

²²‍Hoo Reuben bulam birwqnum, “Ngo nulam boram nyic nyima bvk hvl bema namyv? Hvbmabde nulv tamanum. Ho sija mwwg hijum kwlib ngulam haapa ku.”

²³‍Josap bulam cengdwn hvl bulv cengmanum, hoggab bulug pengko ho agam mam bisiq yaanbo doonum.

²⁴‍Ho mwv bulug hoqgv nywkur banv hoo xabnum. Hoo mwv bulam nywkur banv agam goonum. Hoo mwv Simeonnvn bulug hoqgv naanv mwam bulug vnyiq kaagaho raql apnum.

²⁵‍Hoo Josap bulug tuila ho am mam tuqlwq mvdwb gaml jinum, hoo nyi vxig twngkam bulug tuila ho vlwq jinum, hoo lamta wrinam dvb dvs-twwsv vlwq jinum. Soq si bulam nyiknum.

²⁶‍Ho bulv bulug svdam tuluho am mam rublwq laikul hoo wknum.

²⁷‍Hoo bulug hoq akwn liit doonu ko ho svdam dvsam naalin dvb hvl mwwg tuilangam mvkonum, ho mwwg twngkam tuila gamb ho mwv doodwb kaapanum.

²⁸‍Mwwg vbw-bor tulungam mwv benum, “Ngoqg twngkam okur jipa ku; tuila gamb si doodo!” Hoq moodho bulug hangv hoxa kunum, hoo bulv akwn-akwn kaatwl tvmdwr hwql begamv, “Hoggv ngulam Pwnbov soq sib nyipa kun?”

²⁹‍Hwdlo bulv bulug ab Jakub dook Kanaan gvdaho hvvc kunum, bulam hog mwlw nyiknam mam bulv mwam betamnv begamv,

³⁰“Gvdag at, akv ngulam gamtor jaqb agam benum hoo ngulam gvdangam mvqky-maqlam mvnbo gob mwwnum.

³¹‍Hvbmabde ngulv mwam benum, ‘Ngulv lootw bo nyiingv; ngulv nywywngam mvqky-maqlam mvnbo nyiib nyika ma.

³²‍Ngulv ab akin hoqgv camleq vnyi go vbw-borv doodwn hvnum. Akwn hv dook ma, hoo bor anya jaqkv soolo godab Kanaan gvdaho ngulug ab lvgab doodwn hvnum.’

³³‍Ho gvdag at nyi akv, ngulam benum, ‘Soq sam nulv nyib nyiloqkam ngo nulam lootwbo nyiingv hvl cengtayin: nulug vbw-bor akwn ngoqg lvgab apaq pe, hoo dwr wggam gab nulug nam dvpar gab dvg naalayil, hoo nulug lamtab wnku.

³⁴‍Nulug bor anyangam ngam boa jito. Ho ngo cengtayin nulv mvqky-maqlam mvnbo nyi ma hvbmabde lootw bo nyiingv hvtayin, hoo ngo nulug vbw-boram tolin jitayin, hoo nulv gvda so pudu ruutayin.’”

³⁵‍Bulv bulug tuilangam yaqro yukho, kaato, nyiicwr-cwrxig twngk agaqkv mwwg tuila ho doonum. Hoo hwdlo bulv la bulug abv twngk agaqkam kaatwl, bulv bosnum.

³⁶‍Hoo bulug ab Jakub bulam benum, “Nulv ngoqg ko tulu gab ngam mwwdwq dwqm do: Josap dook ma, hoo Simeon kam dook ma, hoo sija nulv Benjamin nvrub boog deen hvdo. Soq mwlw si ngam ceeko dvb haapa ku.”

³⁷‍Ho Reuben mwwg abam benum, “Mwam ngo bookurl boa kuma baloqkam ngoqg ko tuup vnyiam mengto. Mwam ngoqg alaq so gvqlwqto hoo ngo mwam nam bookur jitayin.”

³⁸‍Hvbmabde mwv benum, “Ngoqg kongam nulug lvgab imin gvmram, hoggab mwwg vbwngv sinkun, hoo mwv twq sija doodwn. Nulug pudu ruuk lamta ho mwv bwdw-taraq hokam sui yv, ho nulv ngoqg dum dumpu lvgab Sux-ywlw ho mwwdwq dvb ipoq mvta yi.”