Read Nyishi BEGGAR 44 Bible Online

BEGGAR 44 - Nyishi bible

BEGGAR 44

¹Ho mwwg nam hoqg nyerangam mwv gaml jinum, “Bulv hog hwdgo baqla dvn hwdgo nyi tulug tuila vjho dvgam yvqlwq jito, hoo nyi vxig twngkam mwwg tuila gamb ho vlwq jito,

²‍hoo ngoqg rup pvtaq ham bor anya jaqg tuila gamb ho mwwg twngk lvgab vlwqto.” Hoo mwv Josapg bekjaqb nyinum.

³‍Ar komc huur-mumur kalam, nyi tulungam bulug svdam lvgab kanam tvl wwm kunum.

⁴‍Bulv bopam hoqgv aado yooma go wknum. Josap mwwg nyerangam benum, “Gorabto, nyi tulungam ruqmin gvta, hoo hwdlo no bulam ruqtin yin, bulam beta, ‘Nulv hog nyitwl alboam almadwb nyikub pakun?

⁵‍Soq soqgv ngoqg atv twwn maad nvi yv, hoo soq soqgv mwv yuma kaan maad nvi yv? Nulv soq sam nyigam gab almab nyipa ku.’”

⁶‍Hwdlo mwv bulam ruqtin yin, mwv bulam soq gomcwr tulu sam benum.

⁷‍Bulv mwam benum, “Hog nyitwl ngoqg atv soq gomcwr tulu sam bedwn? Noqg nyera tulungam hoqhvb nyip nvp hvl mwwmiq kamabv!

⁸‍Kaato, tuila gamb ho ngulug twngk kaapanam mam Kanaan gvda toloqkv nam baqlwl boqkur jiknum. Ho hoggub ngulv noq atwg nam hoqg rup-hunam dvco tayin?

⁹‍Hiyv lajaq noqg nyera tulug lvgab hoqhv dootayin ham simto, hoo ngulv noqg atwg nyerab swwtayin.”

¹⁰‍Mwv benum, “Nulv hoggv bepan hvb nyimto: hoqham hiyv lajaqg lvgab dootayin, hv ngoqg nyerab nyitayin, hoo hoq lvvg hoqgam nulv nyi nyiinyiv.”

¹¹‍Ho nyiicwr-cwrxiv nyebia jaqb mwwg tuila dvgam kedho baqpnum, hoo nyiicwr-cwrxiv mwwg tuilangam mvkonum.

¹²‍Hoo vbw cociq hoqgv bor anyanam gob mwv meegaqnum. Hoo Benjaminwg tuila ho pvtaqkam kaapanum.

¹³‍Ho bulv bulug vjam swrc suknum, hoo nyiicwr-cwrxiv mwwg svdam hoqg dvgam pvvlwq laikul hoo bulv bopamb wkurnum.

¹⁴‍Hwdlo Juda la mwwg vbw-bor tulungv Josap namho haanum, mwv hoqho hvraqb dooxiqnum. Bulv mwwg agaho ked namgob dumpo pvxwl xumnum.

¹⁵‍Josap bulam benum, “Hognvk bonam nulv nyipa kun? Ngoqg svkwg nyiv nyiqry-tak kaad nvbo hvl nulv cengma dvn yv?”

¹⁶‍Hoo Juda benum, “Ngoqg ata ngulv hoggv betayin? Ngulv hoggv agam gootayin? Ho ngulv hoggub jaq atv bedar taikun? Noqg nyera tulungam Pwnbov ngulug nyixiaqkam kaapa paku; kaato, ngulv la hoo hiyvg alaq lo pvtaqkam kaapanum, ngulv ngulug atwg nyera tulu ngvku.”

¹⁷‍Hvbmabde mwv benum, “Ngo hoqhvb nyitayi hvl ngam mwwmiq kamabv! Hvbmab hiyvg alaqho pvtaqkam kaapanum hv aro ngoqg nyerab nyitayin. Hvbmabde nulv nulug abwg dookub swrsob wnku.”

¹⁸‍Ho Juda haabnv mwam benum, “Ngoqg ata, noqg nyerangv agam loq gamg ngoqg atwg nyuru ho goonw do, hoo noqg nyera ao lo no hang lengya maabka, hoggab no atv Paro hvb nyidwn.

¹⁹‍Ngoqg ata no noqg nyera tulungam toxnum, ‘Nulv ab dood nvi yv, ho nulv bor ak dood nvi yv hvl toxnum?’

²⁰‍Hoo ngulv ngulug atam benum, ‘Ngulug abv nyekam tukul doodwn, hoo bor honyia ak doodwn, hiyam ngulug abwg nyekam konguq yukho bwwnum. Mwwg vbwngv sinkun, hoo mwv twq mwwg annwg hoq kov doodwn, hoo mwwg abv mwam vcjaqb abydvn.’

²¹‍Ho no noqg nyera tulungam benum, ‘Mwam ngam bool taab hvnum, ho ngoqg vnyiqkv mwam kaatayin hvnum.’

²²‍Ngulug atam ngulv benum, ‘Kongv mwwg abam wleq dvb nyima dvn, hoggab mwv mwwg ab hoqgv wleq baloqkam mwwg abv sita yi.’

²³‍Ho no noqg nyera tulungam benum, ‘Nulug bor honyiangam nulug lvgab bool haag mabalo nulv ngoqg nyuqm mam lokta kvvrwq nyoram hvl benum.’

²⁴“Hwdlo ngulv wkur yukho noqg nyera ngoqg abam ngulv mwam ngoqg nyiit atwg gomcwram betamnum.

²⁵‍Hoo ngulug abv benum, ‘Lokta wgdvl bul gab dvg loq anyo go rvta hvnum,’

²⁶‍ngulv benum, ‘Ngulv ila kuram. Ngulug bor honyiangv ngulug lvgab wbaloqkam, ho ngulv itayin hvl benum. Hoggab ngulug bor honyiangv ngulug lvgab haag manyiloqkam ngulv nyi akwg nyuqm mam kvvrwq nyoram.

²⁷‍Ho noqg nyera tulug abv ngulam benum, ‘Nulv cengdo ngoqg nywxwngv ko tuup vnyi go bwwjnum.

²⁸‍Akwn ngam wleq paku, ngo mwwdo mwam vmwq yumgub cimwq kuba nvpv, hoo hoqgv jaq ngo nywywngam mwam kaapa kuma.

²⁹‍Nulv soq ak sam rub ngoqg soqgv naal wg baloqkam, hoo mwam bwdw-taraq hom baloqkam, nulv ngoqg dum dumpo lvgab ngam Sux-ywlw nyook ho bool taikun.’

³⁰“Hoqgab sija, ngo noqg nyerangv abwg dookub haada kalam, kov ngulug lvgab haak mabnyiloqkam, mwwg swwgv almab nyita yi, hoggab mwwg swwgv ko aoho paqgab tvl doodwn,

³¹‍kov ngulug lvgab haamanam mam kaapa twqda tvl, mwv sitayin, hoo noqg nyera tulungv ngoqg nyera tulug abam dum dumpo lvgab Sux-ywlw nyookho mwwdwq dwqmin dvb bool taikun.

³²‍Hoggab noqg nyerangv ko soq swrso gab ngoqg abam ngo dingrwl gorgy naanv begamv, ‘Ngo mwam nam bookur jik mabnyiloqkam, ngoqg abv ngoqg swwnam bumpw xaqb ngam timb yaaka hvl gorgy naape kun.’

³³‍Hoqgab sija, noqg nyerangam anya mwwpa gvdwl ngoqg ata ko soq kwly gab ngam nyera pvvto, hoo ko sam mwwg vbw tulug lvgab wkur mvt kubv.

³⁴‍Kongam ngoqg lvgab bookmab hoggub ngo ngoqg abwg dookub wkur nyotayin? Ngoqg abwg almab nyinam mam ngo kaapa dvb bosdo.”