Read Nyishi BEGGAR 45 Bible Online

BEGGAR 45 - Nyishi bible

BEGGAR 45

¹Ho mwwg agaho nyi tulug daqnam mam kaatwl Josap mwv atv cwqla kumanum. Mwv xabnum, “Ngoqg soqgv mwlwngv wleqto.” Ho hwdlo Josap mwv atv mwwg vbw-bor tulungam betam yukho, nyi akam mwwg dookho doom mvmanum.

²‍Hoo mwv vc loodab xabnum, ho Ijipt nyi tulungv ham tapanum, hoo Parog imiq dvparvkam ham tapanum.

³‍Hoo Josap mwwg vbw-bor tulungam benum, “Ngo Josap! Ngoqg ab hvraqb swwl dooxiqdo i?” Hvbmabde mwwg vbw-bor tulungv mwam hog birwq sv dook maanum, hoggab bulv mwwg agaho sidkun hvb nyiknum.

⁴‍Ho Josap mwwg vbw-bor tulungam benum, “Kujo, ngoqg ogumb hvvnwqto.” Hoo bulv ogumb hvvnwqnum. Hoo mwv benum, “Ngo nulug bor Josap, hiyam nulv Ijiptho puqnum.

⁵‍Hoo sija nulv mwwdwq maabv ho atv-atam hang lengmabv nulv ngam so puqgam gab, hoggab Pwnbov ngam nulug otuqb kanam coopan, nyi tulungam ywwlin mvdwb.

⁶‍Hoggab gvdaho dwrv vnyw nywnyi gob nyidu kunum, hoo vnyw nywng gota vly liikam ram hoo vly naakam ram.

⁷‍Hoo Pwnbov ngam nulug otuqb kanam paku swcw nvg aoso nulug doonyu bo nyi tulungam ywwlin mvdwb, hoo nulam swwl doom dvb hoo nulug hoqgv hotam mam swsiql lengm dvb.

⁸‍Ho nulv ma ngam so kanamnum, hvbmabde Pwnbov. Mwv ngam Parog ab gob mvpa ku, hoo mwwg imiq dvparag at gob mvpa ku hoo Ijipt gvdangam pvvb bwwl doog mvdwb jiknum.

⁹‍Nulv nyebia jaqb ngoqg abwg dookub wgdvl hoo mwam beta, ‘Soq sib noqg ko tuup Josap bede hvta, Pwnbov Ijipt lo ngam nyiit at gob mvpa ku. Oyul doomab; ngoqg dookub nyebia jaqb itwg hvta.

¹⁰‍No Gosen gvdaho dootayin, hoo no ngoqgab ogum tayin, no la noqg ko tulungv hoo noqg ko hosiq-hosiqkv, hoo noqg sviya pvtwngv, noqg sibin-svvngv hoo noqg doognam mwlwngv dvmin-twwmin tayin.

¹¹‍Tolo ngo nam dvs-twwsam cita-hootayin, hoggab vnyw nywng gota dwr wsv dooxiqdo, ho no la noqg imiq dvparv, hoo noqg doognam mwlwngam kvvyw-tada tayin, jwwgw-homa maadwb.’

¹²‍Hoo sija nulug vnyiqkv kaapa ku, hoo ngoqg bor Benjaminwg vnyiqkvkam kaapa ku, ngoqg agam jaq soqgv nulam goodwn.

¹³‍Nulv hoggub nyijaqkam ngoqg abam Ijipt so ngam xinam-paqnam, hoo nulug kaaknum hog mwlwngam beta. Nyebiab wgdvl ngoqg abam soqb bool ta.”

¹⁴‍Ho mwwg bor Benjaminwg lwwpo ho mwv hwrgab tvl hoo xabnum, hoo Benjamin mwwg lwwpo ho hwrgab tvl xabnum.

¹⁵‍Hoo mwwg vbw-bor tulu mwlwngam mwv moopup tvl bulug aoho xabnum. Hoq kokw so mwwg vbw-bor tulungv mwam agam goonum.

¹⁶‍Hwdlo Parog imiq dvparv Josapg vbw-bor tulug “Josap dookub haanam puiyam tapa yin,” hoqhv Paro nvla mwwg nyera tulungam hemp mvnum.

¹⁷‍Hoo Paro Josapnvn benum, “Noqg vbw-boram beto, ‘Soq sam nyimto: bulug svdin ho dvs-twws loq pvvlwq layil hoo Kanaan gvdab wkur mvto,

¹⁸‍hoo nulug abam la nulug imiq dvpar mwlwngam boolayil ngoqg dookub haamto, hoo ngo nulam Ijipt gvda so diibuqbo nyookam jitayin, hoo nulv gvda hoqg swwlinam mam dvtayin.’

¹⁹‍Hoo Josap no, soq sam gaml jito, ‘Soq sam nyimto: Ijipt gvda hoqgv svdin gaari loq naalayil nulug ko anyo tulungam la nulug nywxw tulungam, nulug abam baqal haag mvto.

²⁰‍Nulug dupum-dvrab gab mwwdwq maabv, hoggab Ijipt soqg mwlwngam alyanbo gvdangv nul gvku.’”

²¹‍Israelwg ko tuup tulungv hvb nyiknum: hoo Parog gaml jik jaqb, Josap bulam svdin gaaringam jinum, hoo bulam nyiody boorin nan dvs-twwsam jinum.

²²‍Ho bul mwlwngam vj koolynanv rumsaq twqb jinum, hvbmabde Benjaminnvn sikil rup lwum gola kwlynan vj rumg go jinum.

²³‍Ho mwwg ab gab mwv soq tulu sam jilwqnum: Ijipt hoqg dupum-dvrab pv svdam doryw gob tumlwq jinum, hoo amv la wtwngv svdam damn doryw gob vlwq jinum, hoo mwwg abwg lamta wrinam dvb dvs-twwsv vlwq jinum.

²⁴‍Ho mwwg vbw-bor tulungam mwv kanam tvl wwm kunum, hoo bulv wknum, mwv bulam benum, “Nulv lamta alo yolu duma bvka i.”

²⁵‍Ho bulv Ijipt hoqgv wknum hoo bulug ab dookub Kanaan gvdaho haaknum.

²⁶‍Hoo bulv mwam betamnum, “Josap sija godab swwl doodo, hoo mwv Ijipt gvdaho pvvb bwwl doogbo gob nyidku.” Hoo mwwg hangv dwqk-dwqk duqnum, hoggab mwv bulam mwwjw maanum.

²⁷‍Hvbmabde hwdlo bulv mwam Josapg bulam goonam gomcwr mwlwngam betamnum, hoo hwdlo mwv Josapg mwwg gab svdin gaari ho dvs-twws jilwqnam mam kaapa yin, bulug ab Jakub yalv lokta hwrcw kunum.

²⁸‍Hoo Israel benum, “Soq si jotv paku; ngoqg ko tuup Josap sija godab swwl doodnyi. Ngoqg sima taab ngo mwam wgdvl kaatayin.”