Read Nyishi BEGGAR 46 Bible Online

BEGGAR 46 - Nyishi bible

BEGGAR 46

¹Ho Israel mwwg hog mwlw doognam mam naala yukul mwwg nyiodam boorab kunum hoo Beerseba ho haanum, hoo mwwg ab Aisakwg Pwnboam pwr aky jinum.

²‍Hoo Pwnbov Israelnvn ai nyiqry kaamwl benum, “Jakub, Jakub.” Hoo mwv benum, “Ngo si doodwn.”

³‍Ho mwv benum, “Ngo noqg abwg Pwnbov. Ijipt gvdab idwb bos maabv, hoggab ngo nam bolo koibo nyob akwb mvtayin.

⁴‍Ngo atv noqg lvgab Ijiptlo imin gvtayin, hoo ngo nam so lokta bookur taikun, hoo Josapg alaq hoqgv noqg vnyiqkam miilub tayin.”

⁵‍Ho Jakub Beerseba hoqgv wrab kunum. Israelwg ko tuup tulungv bulug ab Jakubnvn, ko anyo bo tulungam, hoo bulug nywxw tulungam Parog svdin gaari mwam baqn mvdwb jilwqnam ho baql wgnum.

⁶‍Bulv bulug tuun-meengam hoo bulug dupum-dvrab pam Kanaan gvdaho naaknam ham naala yukul hoo Ijipt gvdab haanum, Jakub la mwwg hosiq tulungv mwwg lvgab haanum,

⁷‍mwwg ko tuup tulungv, hoo mwwg ko tuup tulug ko tuupv, mwwg nyem ko tulungv, hoo mwwg nyem ko tulug ko tuupv wknum. Mwwg ko hosiq mwlwngam mwwg lvgab Ijiptho boa kunum.

⁸‍Soq tulu si Israelwg hotam hoqg eminv, hiyv Ijiptho haakbov, Jakub la mwwg ko tuupv. Reuben, Jakub ko tuup vbw cociqkv,

⁹‍hoo Reubenwg ko tuupv: Hanok, Pallu, Hejron, hoo Karmi.

¹⁰‍Simeon gv ko tuupv: Jemuyel, Jamin, Ohad, Jakin, Johar, hoo Soul, soq tulu si Kanaan nyem hoqgv ko tuupv.

¹¹‍Lebi gv ko tuupv: Gerson, Kohat, hoo Merari.

¹²‍Juda gv ko tuupv: Er, Onan, Sela, Perej, hoo Jera (hvbmabde Er la Onan Kanaan gvdaho siknum); hoo Perej ko tuupv Hejron la Hamul.

¹³‍Issakar gv ko tuupv: Tola, Puba, Yob, hoo Simron.

¹⁴‍Jebulun gv ko tuupv: Sered, Elon, hoo Jahleel.

¹⁵‍Soq tulu si Liyag ko tuupv hiyam Paddan-aram ho Jakubnvn ko bwwjnum, mwwg nyem ko Dina lvgab; mwwg ko tuupam la mwwg nyem kongam xikum-xipanamv cammum leq oum gob nyinum.

¹⁶‍Gadwg ko tuupv: Jipion, Haggi, Suni, Ejbon, Eri, Arodi, hoo Areli.

¹⁷‍Aserg ko tuupv: Imna, Isba, Isbi, Beriya hoo bulug lvgab bulug bwrm Sera. Hoo Beriyag ko tuupv: Heber la Malkiyel.

¹⁸‍Soq tulu si Jilpag, hiyam Laban mwwg nyem ko Liyag paqnwb jitaqnam hoqgv; soq tulu sam mwn Jakub gab ko bwwjnum—xikum-xipal camleq ax gob nyinum.

¹⁹‍Jakub nywxw Rakelg ko tuupv: Josap la Benjamin.

²⁰‍Hoo Onwg nyub Potipera nyem ko, Asenat, Ijipt gvdaho Josap gab Manasse nvla Iprayimnvn mwwg gab ko bwwjnum.

²¹‍Hoo Benjaminwg ko tuupv: Bela, Bekar, Asbel, Gera, Naaman, Ehi, Ros, Muppim, Huppim, hoo Ard.

²²‍Soq tulu si Rakelg ko tuup Jakubnvn dwrbuqjnamv—xikum-xipal camleq vpy gob nyinum.

²³‍Danwg ko tuupv: Husim.

²⁴‍Naptalig ko tuupv: Jahjeel, Guni, Jejer, hoo Sillem.

²⁵‍Soq tulu si Bilha ko tuupv, hiyam Laban Rakelg paqnwb jitaqnam ak gv, mwn soq tulu sam Jakub gab dwrbuqjnum—okum-apal kvn gob nyinum.

²⁶‍Jakubg ko tuup tulug nywxwngam xipa maab, Jakubg hosiq hoqgv Ijipt gvdaho haakbov okum-apal camx leq ax gob nyinum,

²⁷‍Hoo Josap gab Ijipt gvdaho ko bwwnamv tuupv vnyinum. Jakubg imiq dvparv Ijiptho haal dook bov okum-apal cam kvn gob nyinum.

²⁸‍Mwv Judanvn Josap dookub kanam coonum Gosenho bulam kvvrwq mvdvb, hoo bulv Gosen gvdaho haaknum.

²⁹‍Ho Josap mwwg ceriotam mwx-mvaq layil hoo mwwg abam kvvrwqtab Gosenho wnum. Mwv atv-atam mwam jiknum hoo mwwg lwwpo ho hwrgabnum hoo mwwg lwwpo ho hwrgab tvl oyu jaqg xabl doonum.

³⁰‍Israel Josapnvn benum, “Ngam sija sim tukub, ngo noqg nyuqm mam kaapa ku hoo cengpa ku no hvraqb swwl dooxiq dvnyi.”

³¹‍Josap mwwg vbw-bor tulungam la mwwg abwg imiq dvpar tulungam benum, “Ngo Paro dookub wgdvl mwam betam tade nv, ‘Ngoqg vbw-bor tulungv la ngoqg abwg imiq dvparv Kanaan gvda hoqgv ngoqg dookub haapa ku.

³²‍Hoo nyi tulungv sviya rvky bov, hoggab bulv tuun-meengam kaal pvvl yvgbov, hoo bulv bulug sviya pvtwngam hoo bulug sibin-svvngam hoo bulug hog mwlw doognam mam boal haag paku.’

³³‍Hwdlo Paro nulam goql hoo bei nyiloqkam, ‘Hoggv nulv nyidwn?’

³⁴‍nulv betayin, ‘Noqg nyera tulungv yaapa hoqgv sija godab tuun-meengam kaal, ngulv la ngulug abv pvvl doogbov,’ hvb bebaloqkam nulv Gosen gvdaho doogw tayin, hoggab sviya rvky boam Ijipt nyi tulungv bulum-kac dvn.”