Read Nyishi BEGGAR 48 Bible Online

BEGGAR 48 - Nyishi bible

BEGGAR 48

¹Soq kokw so Josapnvn betamnum, “Kaato, noqg abv vc do.” Ho mwwg lvgab mwwg ko tuup vnyiam, mwv Manasse nvla Iprayimnvn bool wgnum.

²‍Hoo hoqham Jakubnvn betamnum, “Noqg ko tuup Josap haapa ku.” Ho Israel mwv ator jaqb nyinv kartamho tuurabl doonum.

³‍Hoo Jakub Josapnvn benum, “Mwlwngam koi yaanbo Pwnbov ngam Kanaan gvdag Lujho daqlin banv lvqc cinum,

⁴‍hoo mwv benum, ‘Kaato, nam ngo mipar-gooiyiql hoo dumtwq-miilyw dvb mvtayin, hoo nam ngo nyob hoolu luut dvb mvtayin hoo soq gvda sam noqg kokwb noqg hosiqkam kuiyum xaqb otu bwwm dvb jitayin.’

⁵‍Hoo ngo noqg dookub Ijiptho haama taab Ijipt gvdaho noqgab ko bwwnam noqg ko tuup vnyiv ngoqgv; Reuben la Simeon ngoqgab doonam hvb Iprayim la Manasse ngoqgv.

⁶‍Hoo no soq tulu kokwb ko hury dook baloqkam bulv noqg gvku. Bulv bulug vbw-bor tulungam bulug otu nvvsiq yin emin goqtayin.

⁷‍Ngo hwdlo Paddan hoqgv haadwk ho Kanaan gvda lamtag Epratam wc svqb wdu yukho Rakel sigam gab ngo vigo mwwdwqnum, hoo ngo mwnwn Eprat lamta ho svma liiknum (hoqhv Betleham).”

⁸‍Hwdlo Israel Josap gv ko tuup tulungam kaapanum, mwv benum, “Hiyv soq tulu si?”

⁹‍Josap mwwg abam benum, “Si ngam Pwnbog jinam ngoqg ko tuupv.” Hoo mwv benum, “Kv bulam ngoqg ogumb boonwq jaq tvbv, ngo bulam lvqc cipe nvpv.”

¹⁰‍Israelwg swwi yukho vnyiqkv nyiqmv kunum, ho mwv kaapa kumanum. Ho Josap bulam mwwg ogumho boonwq jinum, hoo mwv bulam moopupl hoo cegabnum.

¹¹‍Hoo Israel Josapnvn benum, “Ngo nywywngam noqg nyuqm mam kaatws mwwmiq maanum; hoo kaato, Pwnbov ngam noqg hosiqkam kam kaam dukub jipa ku.”

¹²‍Ho Josap bulam mwwg lwbw hoqgv daqgin mvtwl, hoo mwv atv mwwg nyuqm mam kedho pvxwl xumnum.

¹³‍Hoo Josap bunyiam boolayil, Iprayimnvn mwwg lvqbwqkam Israelwg laqc alaqho gvqlwqnum, hoo Manassenvn mwwg laqcam Israelwg lvqbwq alaqho gvqlwqnum, hoo bulam mwwg ogumho boanum.

¹⁴‍Hoo Israel mwwg alaqkv laqko sul lvqbwq alaqkv ijin banv bor akwg Iprayimg dumpo ho idaqnum, hoo mwwg laqc alaqkv Manasseg dumpo ho mamdaqnum (Manasse vbw ak hv).

¹⁵‍Hoo mwv Josapnvn benum, “Ngoqg ab Abraham la Aisak hiyvg Pwnbo agaho wnum, ngoqg swwnam bumpw ho soolo godab ngam sviya rvkil yvgbo Pwnbov,

¹⁶hoo ao gumtwngv ngoqg almab nyinam mwlw hoggv pvlyw bov ko tulu sam lvqc gvnka; hoo bulug lvgab ngoqg eminam doosiq mvgnvka, hoo ngoqg ab Abraham la Aisakwg eminam swwsiq mvgnvka; hoo bulam swcw nvg pengko so dumtwq-miilyw swwm gvnka.”

¹⁷‍Hwdlo Josap mwwg abv mwwg lvqbwq alaqkam Iprayimg dumpo ho mamdaqnam mam kaapa tvl mwv hemp maanum, hoo mwv mwwg abwg alaqkam Iprayim dumpo hoqgv Manasse dumpo ho mamdaq mvdwb naabonum.

¹⁸‍Hoo Josap mwwg abam benum, “Ngoqg ab hvvma lak, soq ak si vbw ak hv, noqg lvqbwq alaqkam mwwg dumpo ho mamdaqto.”

¹⁹‍Hvbmabde mwwg abv maak hvl benum, “Ngo cengdwn, ngoqg ko, ngo cengdwn. Mwv rub nyiilu ak gob swwtayin, hoo mwv rub koi tayin. Hvbsujaqkam mwwg bor ak hv mwam koi yaatayin, hoo mwwg hosiqkv dumtwq-miilyw dvb nyob hoolungv swwtayin.”

²⁰‍Ho bulam hoq aalho lvqc cil hoo begamv, “Israel ho lvqc ciyikam nulam betaql betayin, ‘Pwnbov nulam Iprayim hvb la Manasse hvb mvgnvka hvtayin.’” Hoqgab mwv Iprayimnvn Manasse otuqb mamdaqnum.

²¹‍Ho Israel Josapnvn benum, “Kaato, ngo sita duku, hvbmabde Pwnbov nam doomin gvnka hoo nam lokta noqg ab tulug gvdaho boatayin.

²²‍Hoq aoho, ngo nam duuka-dua bo puutu tuug ngo Amor nyi tulug alaq hoqgv ngoqg lyoqr orioq lvg bvla illy-uppuq lvgab naanam mam noqg vbw-bor tulungam jimab, nam ngo jipa kun.”