Read Nyishi BEGGAR 5 Bible Online

BEGGAR 5 - Nyishi bible

BEGGAR 5

¹Soq si Adam gv hotam tulungam xeqpnam kitap pv. Hwdlo Pwnbov nyia koam pwnum, mwv mwam Pwnbo hvb nyidwb pwnum.

²‍Mwv bulam nyem gola nyegab pwnum, hoo mwv bulam lvqc cinum hoo hwdlo bulam pwlin kunum bulam nyia kov hvl eminum.

³‍Hwdlo Adam 130 vnyw go swwi yikho, mwam guss dvb, mwam kvvywqbo nyega ko ak doonum, hoo mwam Set hvl eminum.

⁴‍Mwv Setwg abwb nyixo kokw so Adam vnyw 800 go swwnum; hoo mwv hvraqb asaq nyega kov la nyem kov doonum.

⁵‍Adam gv swwnam aalv odum-apal vnyw 930 go swwpe kul, hoo mwv siknum.

⁶‍Hwdlo Set vnyw 105 go swwi yikho, mwv Inoswg abwb nyiknum.

⁷‍Set Inos abwb nyixo kokw so vnyw 807 go swwnum hoo hvraqb asaq nyega kov la nyem kov doonum.

⁸‍Setwg swwnam aalv odum-apal vnyw 912 go swwpe kul, hoo mwv siknum.

⁹‍Hwdlo Inos vnyw 90 go swwi yikho, mwv Kenanwg abwb nyiknum.

¹⁰‍Inos Kenanwg abwb nyixo kokw so vnyw 815 go swwnum hoo hvraqb asaq nyega kov la nyem kov doonum.

¹¹‍Inoswg swwnam aalv odum-apal vnyw 905 go swwpe kul, hoo mwv siknum.

¹²‍Hwdlo Kenan vnyw 70 go swwi yikho, mwv Mahalalelwg abwb nyiknum.

¹³‍Kenan Mahalalelwg abwb nyixo kokw so vnyw 840 go swwnum hoo hvraqb asaq nyega kov la nyem kov doonum.

¹⁴‍Kenanwg swwnam aalv odum-apal vnyw 910 go swwpe kul, hoo mwv siknum.

¹⁵‍Hwdlo Mahalalel vnyw 65 go swwi yikho, mwv Jared gv abwb nyiknum.

¹⁶‍Mahalalel Jared gv abwb nyixo kokw so vnyw 830 go swwnum hoo hvraqb asaq nyega kov la nyem kov doonum.

¹⁷‍Mahalalelwg swwnam aalv odum-apal vnyw 895 go swwpe kul, hoo mwv siknum.

¹⁸‍Hwdlo Jared vnyw 162 go swwi yikho mwv Inok gv abwb nyiknum.

¹⁹‍Jared Inok gv abwb nyixo kokw so vnyw 800 go swwnum hoo hvraqb asaq nyega kov la nyem kov doonum.

²⁰‍Jaredg swwnam aalv odum-apal vnyw 962 go swwpe kul, hoo mwv siknum.

²¹‍Hwdlo Inok vnyw 65 go swwi yikho, mwv Metuselag abwb nyiknum.

²²‍Metuselag abwb nyixo kokw so Inok Pwnbo lvgab vnyw 300 go yvbanum hoo hvraqb asaq nyega kov la nyem kov doonum.

²³‍Inok gv swwnam aalv odum-apal vnyw 365 go nyiknum.

²⁴‍Inok Pwnbo lvgab yvbanum, hoo mwv jimmib niiknum, hoggab Pwnbov mwam booknum.

²⁵‍Hwdlo Metusela vnyw 187 go swwi yikho, mwv Lamekwg abwb nyiknum.

²⁶‍Metusela Lamekwg abwb nyixo kokw so vnyw 782 go swwnum hoo hvraqb asaq nyega kov la nyem kov doonum.

²⁷‍Metuselag swwnam aalv odum-apal vnyw 969 go swwpe kul, hoo mwv siknum.

²⁸‍Hwdlo Lamek vnyw 182 go swwi yikho, mwv nyega ko akwg abwb nyiknum.

²⁹‍hoo mwwg eminam Noa hvl goqnum, hoo begamv, “At Swg beenam ked hoqgv soq ko ak si ngulug bon nyinam mam hoo ngulug alaq hoqg vc cil hentwr henam mam meeg hvrab dvb mvtayin.”

³⁰‍Lamek Noag abwb nyixo kokw so vnyw 595 go swwnum hoo hvraqb asaq nyega kov la nyem kov doonum.

³¹‍Lamekwg swwnam aalv odum-apal vnyw 777 go swwpe kul, hoo mwv siknum.

³²‍Noa vnyw 500 go axa dvb swwxo kokw so, Sem, Ham, hoo Japet gv abwb Noa nyiknum.