Read Nyishi BEGGAR 50 Bible Online

BEGGAR 50 - Nyishi bible

BEGGAR 50

¹Ho Josap mwwg abwg nyuqm mam nywxoq tvl mwwg aoho xabnum hoo mwam moopupnum.

²‍Hoo Josap mwwg nyera tulungam la doktor tulungam mwwg abam mwrl sum mvma dvb kuty neemnum. Doktor tulungv Israelnvn kuty neenum.

³‍Aal campy mood gob kuty needwb nyinum, hoggab hoq hwdgo moodv naadwb nyinum. Hoo Ijipt nyi tulungv aal cam kvn go mwwg gab xabl-riil vrr rwl doonum.

⁴‍Hoo hwdlo xabl-riil vrr rwl moodv wnya yukun, Josap Parog imiq dvparam agam goonv begamv, “Ngo nulug vnyiq kaagaho kvvlwql mwwsw dvb nyid nyiloqkam, anya mwwpa gvdwl Parog nyuru alo soq sam betab,

⁵‍Ngoqg ab ngam dingr mvl begamv, ‘Ngo sita duku: ngo ngoqg atwg nyubungam Kanaan gvda tv dukoql ap peekun, ho ngam no tolo svma liiya hvnum.’ Hoqgab sija, ngam anya mwwpa gvdwl ngoqg abam tolo caagdvl svma liim tvbv. Ho ngo ikur taikun.”

⁶‍Hoo Paro birwqnum, “Nam dingr mvnam hvb no caagdvl noqg abam svma liita.”

⁷‍Ho Josap mwwg abam svma liitab caanum. Mwwg lvgab Parog nyera tulungv, mwwg nam hoqg nyi axa tulungv, hoo Ijipt gvdag axa tulungv wmin gvnum,

⁸‍hoq lvg lvgab Josapg imiq dvparv, mwwg vbw-bor tulungv, hoo mwwg abwg imiq dvparv mwlwngv wmin gvnum. Ko tulungam la bulug sviya pvtwngam, hoo bulug sibin-svv tulungam aro Gosen gvdaho apaq peel wnum.

⁹‍Hoo mwwg lvgab ceriot tvla svpur xarnbo nyi tulungv caamin gvnum. Hoqho nyiingv mvqlw jaqg wnum.

¹⁰‍Hwdlo bulv Atadwg jurpy mvk deela Jordon otuqho hvvc yukho, bulv piwr jwr-jwr dvb nyix-nyemar riil mwwdwqnum, hoo mwv mwwg ab gab aal kvn go nyix-riidul doonum.

¹¹‍Hwdlo gvdaho doonbo Kanaan nyi tulungv Atadwg jurpy mvk ho nyix-riidunam mam kaapa tvl bulv benum, “Soq si Ijipt nyi tulug piwr jwr-jwr dvb nyix-riidu kov.” Hoqgab nyookam Abel-mijrayim hvl emin kunum; hoqhv Jordonwg lvvgho doonum.

¹²‍Ho mwwg ko tuup tulungv mwv hoggv gaml jinum ham nyiknum,

¹³‍hoqgab mwwg ko tuup tulungv mwam Kanaan gvdab baqknum hoo mwam Makpela rongo, dou-cagag Mamreg lwwpwq ham Abraham rongo lvgab Epron Hittait hoqgv svma liikum koob rvnamho mwam svma liinum.

¹⁴‍Mwwg abam mwv liixo kokw so, Josap mwwg vbw-boram la mwwg lvgab mwwg abam svma liimin gvtab caanbo mwlwngv Ijipt wkur kunum.

¹⁵‍Hwdlo bulug abv sixo kokw so Josapg vbw-bor tulungv bulv benum, “Ngulv mwam hoggv nyiknum ham Josap ngulam mwwr layil ngulam almab nyilwq kams yuk yv.”

¹⁶‍Ho bulv Josapnvn pui bilwql begamv, “Noqg abv soq gaml sam mwwg sima taab benum,

¹⁷‘Josapnvn beta, anya mwwpa gvdwl noqg vbw-bor tulug bulug nyimuram la nyic nyiknam mam apaq tuku, hoggab bulv nam almab nyinum.’ Hoo sija anya mwwpa gvdwl noqg abwg Pwnbo nyera tulug nyimuram apaq tuku.” Hwdlo bulv mwam soq sib agam gooyikho Josap xabnum.

¹⁸‍Mwwg vbw-bor tulungv kam haanum hoo mwwg agaho geqpwl xuml mwam benum, “Kaato, ngulv noqg nyera ngvku.”

¹⁹‍Hvbmabde bulam Josap benum, “Bos maabv, ngo Pwnbog kwlib dood nvi yv?

²⁰‍Nulv mwwdo, nulv ngam ceeko almab nyinum, hvbmabde Pwnbov ham algab nyinum, nyiilungam naleqgo swwl doom dvb boolin mvdwb nyinum hoqgab soolo nyiingv naleqgo swwl doodwn.

²¹‍Hoqgab bos maabv; nulam la nulug ko tulungam ngo dvs-twwsam jitayin.” Ho mwv bulam anyab bet-bela nv bulam benum.

²²‍Ho Ijiptho Josap la mwwg abwg imiq dvparv dooknum. Josap vnyw 110 gob swwnum.

²³‍Hoo Josap mwwg ko Iprayimg ko hotam oum mam kaaknum. Manasseg ko Makirg ko tulungam kam Josap mwwg atwg ko gob xiknum.

²⁴‍Hoo Josap mwwg vbw-bor tulungam benum, “Ngo sita duku, hvbmabde Pwnbov nulam haal kaai nvpv hoo nulam soq gvda soqgv boolin taikun ho mwv Abrahamnvn, Aisaknvn, hoo Jakubnvn dingr ko gvdaho boolwq taikun.”

²⁵‍Ho Josap Israelwg ko tuup tulungam dingrwl begamv, “Pwnbov nulam hoggub nyijaqkam haal kaatayin, hoo nulv ngoqg alo tulungam soqgv baqlinl wgtayin.”

²⁶‍Ho Josap vnyw 110 gob axal nyekam ko-gab siknum. Bulv mwam mwrl sum mvma dvb kuty neenum, hoo mwam Ijipt svma joolwqko huluho vlwq kunum.