Read Nyishi BEGGAR 6 Bible Online

BEGGAR 6 - Nyishi bible

BEGGAR 6

¹Hwdlo nyia kov gvda aoso dumtwq-miilyw yukun hoo nyem kov bul gab dooknum,

²‍Pwnbog ko tuup tulungv nyia koog nyem ko tulungam kaabynum. Hoo bulug kaabynam mam bulv bulug nywxwb naanum.

³‍Ho At Sw benum, “Ngoqg Yalv nyia lvgab nwrba gob dooba kuram, hoggab mwv gv aiyaqkv: mwwg swwnam aalv 120 vnyw gob nyitayin.”

⁴‍Hoq moodho Nepilimv swcw nvg aoso doonum, hoo kokw sookam doonum, hwdlo Pwnbog ko tuup tulungv nyia koog nyem dookub haanum hoo bul gab bulv ko bwwjnum. Hoq tuluhv koi bvla axa yuunam nyi gob nyinum.

⁵‍At Sw swcw nvg uraho nyia koog koi loodab nyic-nyia nyinam mam kaapanum, hoo mwwg hang hoqg tuugabnamv almanbo arongam lwxiam mwwl doonum.

⁶‍Hoo At Sw nyia koam swcw nvg aoso doom dvb pwknam mam mwv mwwkurv lwwyw kunum, hoo hoqhv mwwg hangam vrr gol pwtkun go mwwmnum.

⁷‍Ho At Sw benum, “Ngoqg pwnum nyia koam ngo swcw nvg ao soqgv mvpaq tayin, nyia koam la svdin tulungam hoo gwn-xarnbo tulungam hoo doag pvta tulungam twrm tayin, hoggab ngo bulam pwgam gab ngo mwwkurv lwwyw kunum.”

⁸‍Hvbmabde Noa At Swg vnyiq kaagaho mwwsw dvb nyinum.

⁹‍Soq tulu si Noag hotam tulungv. Noa mwwg hotam ho lootw bvla timb dvb nyimabo nyiib swwnum. Noa Pwnbo lvgab yvbanum.

¹⁰‍Hoo ko tuup oum go doonum, Sem, Ham, hoo Japet.

¹¹‍Pwnbog kaagaho swcwngv kac looda kunum, hoo swcw so yolu-swcinv bwwr tvl doonum.

¹²‍Hoo Pwnbov swcwngam kaanum, hoo kaato, swcwngv kac loodanum, hoggab swcw aoho swwnbo mwlwngv almab nyil kac loodanum.

¹³‍Hoo Pwnbov Noannvn benum, “Ngo swwl doonbo mwlwngam twryum dukub mwwr pakun, hoggab bulv swcwngam yolu-swcin lvgab bwwr mvpa ku. Kaato, ngo swcwngam la bulam twryum tayin.

¹⁴‍Goper svvda hoqgv no atgab hulu loq ak mvto. Hulu ho wrw loq mvto, hoo ham ura aob takin lvgab hiqtum to.

¹⁵‍Soq sib hoqham no mvdwb nyito: Hulug aasongam 300 kiubit go, hoqg taqtam 50 kiubit go, hoo hoqg aongam 30 kiubit go mvto.

¹⁶‍Hulu ho mwwlo ak mvto, hoo hoqham kiubit ak ao dvb mvto, hoo hulu hoqg viyap pam hoq bviywrho mvto. Hoqham akob tamg, vnyi dvb tamg hoo oum dvb tamg mvto.

¹⁷‍Hoggab kaato, ngo swcw nvg aoso swwl doonbo mwlwngam hoo nyodo nvg niikum so saqnbo mwlwngam twrdwb sa-hindungam haam tayin. Swcw nvg aoso doonbo hog mwlwngv sitayin.

¹⁸‍Hvbmabde ngo ngoqg pvvb bwwl birnam mam noqg lvgab mvtayin, hoo no hulu urab haatayin, no, noqg ko tuup tulungv, noqg nywxwngv, hoo noqg ko tuup tulug nywxw tulungv noqg lvgab haatayin.

¹⁹‍Hoo swwl doonbo svdin luuxy cwr hoqgv no vnyi gogab bulam hulu urab boolwq tvl hoo ngoqg lvgab swwl doomto. Bulam nyem gola nyega loq boolwqto.

²⁰‍Pvta luuxy cwr loq, hoo svdin luuxy cwr loq, ked aohog gwn-xarnbo luuxy cwr loq, vnyi gogab boolwqto hoo bulam noqg lvgab swwl doomto.

²¹‍Noqg lvgab dvs luuxy cwramkam naal vlwqto, hoo ham hingkib pvvl apto. Hoqhv noqg gabla bulam gab dvs gob jitayin.”

²²‍Noa soq sam nyiknum; mwam Pwnbo gaml jinam mwlwngam mwv nyinum.