Read Nyishi BEGGAR 8 Bible Online

BEGGAR 8 - Nyishi bible

BEGGAR 8

¹Hvbmabde Pwnbov Noa nvla mwwg lvgab hulu uraho doonbo gunggo-nyiiyongam hoo tuun-mee mwlwngam mwwpanum. Hoo Pwnbov swcw aoso pwd dooi ak lywrab mvnum, hoo issiv xoanum.

²‍Urag iss gwwlv hoo doag viyapv ciqtum kunum, doa hoqgv nyodongv hongin kunum,

³‍hoo issiv ked urab hoodul doonum. Aal 150 kokw so issiv xoa kunum,

⁴‍hoo pool kvnwg aal camleq kvn ho Ararat puutu ho hulungv joonu kunum.

⁵‍Hoo issiv pool bvryw namgub xoal xobdul doonum; pool bvrywg otuq aalho puutu tulug niqtuqkam kaapa kunum.

⁶‍Aal campig vtwr-anya moodho Noa hulug pupum mam mwv mvko nv

⁷‍poaq dorg kanam namlinum. Hv swcw nvg aoso issiv pwtw maady deedib toloq-boloq jarkar yvnum.

⁸‍Ho swcw nvg aoho issiv xoopa kuba dw ham kaam dvb, mwwg hoqgv mwv pukum dorg kanam namlinum.

⁹‍Hvbmabde pukumv jarp ko nyook dooma ko-gab mwn hulub jorkur kunum, hoggab swcw nvg gvda mwlwho issiv xooma daab doonum. Ho mwv mwwg alaqkam ilin banv pukum mam mwwg dook hulu urab nvvlwqnum.

¹⁰‍Mwv aal kvn go hvraqb kaayal doonum, hoo mwv lokta pukum mam hulu ura hoqgv kanam namlinum.

¹¹‍Hoo pukumv ariyum mwwg dookub haaknum, hoo kaato, mwnwg xiibu ho leelaq busurbo olib ok borg baqanum. Ho issiv swcw hoqgv xoa pakde hvl Noa cengknum

¹²‍Ho mwv aal kvn gota kaayal doopel hoo pukum mam kanam namlinum, hoo mwn mwwg dookub jorkur kumanum.

¹³‍Lwwx la ak vnywg otuq poolwg otuq aalho swcw ao hoqgv issiv xootwr kunum. Hoo Noa hulungam lwqko tvl hoo kaanum, hoo kaanamv, ked aongv pwtw kunum.

¹⁴‍Pool bvrnyig aal camnyi leq kvnho swcwngv pwtw rwrw kunum.

¹⁵‍Ho Pwnbov Noannvn benum,

¹⁶“Hulu ura hoqgv lengt ku, no la noqg nywxwngv, hoo noqg ko tuup tulungv hoo noqg ko tuup tulug nywxw tulungam noqg lvgab lengm to.

¹⁷‍Noqg lvgab swwl doonbo luucw-luut svdin tulungam no boolin tuku—pvtangam hoo svdinam hoo swcw nvg aoso gwn-xarnbo tulungam— ho bulam swcw nvg aoso mipar-gooiyiql hoo dumtwq-miilyw swwlin mvto.”

¹⁸‍Ho Noa lvvgwb lengknum, hoo mwwg lvgab mwwg ko tuup tulungv hoo mwwg nywxwngv hoo mwwg ko tuup tulug nywxwngv lengknum.

¹⁹‍Gunggo-nyiiyo luuxiv, gwn-xarnbo luuxiv, hoo pvta luuxiv, swcw aoso biin-tabn bo mwlwngv imiq dvparb nyitwl hulu hoqgv lvvgwb lengknum.

²⁰‍Ho Noa At Sw gab yugw ak mvnum hoo luuxy cwr dvrwqbo svdinam la pvtangam boyuqnam akiam yugw ho aky jinum.

²¹‍Hoo hwdlo At Sw sungam bo nongam suupa yin, At Sw mwwg hang uraho benum, “Nyia ko nyigo gab ngo nywywngam gvda sam lokta beekram, hoggab nyia koog hang tuugabnamv alman boam mwwg yaapa swwca yik hoqgv jaq nyidu dvn. Ngoqg soq sib twrdwb nyinam sam ngo nywywngam lokta swwl doonbo tulungam twrm dvb nyitin kuram.

²²‍Swcw si doody deedib, vly liidam la vly naad moodam, swkwr moodam la og moodam, dwram la dvra moodam, aalam la ai moodam dooky mvtayin.”