Read Nyishi BEGGAR 9 Bible Online

BEGGAR 9 - Nyishi bible

BEGGAR 9

¹Hoo Pwnbov Noannvn la mwwg ko tuup tulungam lvqcnum hoo bulam benum, “Mipar-gooiyiq gvdwl hoo dumtwq-miilyw gvdwl swcw so bwwr mvto.

²‍Swcw ao soqg svdin tulungv hoo doa aog pvta tulungv, ked ao soqg gwn-xarnbo mwlwngv hoo sa-svlo urag ngui mwlwngv nam bos soma vrram sotayin. Bulam noqg alaqho gvqlwq pakun.

³‍Biil-tabl swwnbo mwlwngv nulug dvs gob nyitayin. Hoo jeenbo nwmw-nwsin svvnam nulam jinam hvb, ngo hog mwlwngam nulam jigyin.

⁴‍Hvbmabde nulv vdin aiyaq lvgab hijum mam dvmabv, hoggab hijumho swwgv doodwn.

⁵‍Hoo nulug swwg hijum gab ngo xootwr naatayin: svdin vcw-at hoqgv hoo nyi hoqgv xootwr naatayin. Mwwg nyia ko ajin hoqgv ngo nyia ko swwgwg xootwram naatayin.

⁶“Hiyv lajaqkam nyi mengb nyiloqkam, nyiv mwam mvtayin, hoggab Pwnbov nyia koam mwam atam guss dvb pwnum.

⁷‍Hoo nulv mipar-gooiyiql hoo dumtwq-miilyw nvka, swcw nvg aoso naleqgo dumtwq-miilywl swwn ka.”

⁸‍Ho Pwnbov Noa nvla mwwg ko tuup tulug lvgab benum,

⁹“Kaato, ngoqg pvvb birnam mam ngo nulug lvgab mvp gviyin hoo noqg kokwb noqg hosiq gab mvp gviyin,

¹⁰‍hoo noqg lvgab dooba bo luuxy cwr swwl doonbo tulug lvgab, pvtangam, tuun-meengam, hoo swcw so noqg lvgab doonbo luuxy cwr gunggo-nyiiyongam, hulu ura hoqgv hog hwdgo lengk bo tulungam; hoggab soq si swcw soqg doonbo luuxy cwrwg gunggo-nyiiyo gab.

¹¹‍Ngo noqg lvgab pvvb birnam mam mvp gviyin, ho lokta diidwr iss lvgab sa-hindu hengl nywywngam swwl doonbo tulungam twrkram, hoo lokta nywywngam sa-hindu hengl swcwngam twrkram.”

¹²‍Hoo Pwnbov benum, “Ngoq gvla noqg pengko ho hoo noqg lvgab dooba bo swwl doonbo svdin mwlw gab, ho kokwg hotam tulu gab, pvvb birwl apnam sam mwwpa mvdwb ngo soq muxnam ak sam mvgyin:

¹³‍Ngoqg illiam ngo haapam ho mvp pakun, hoo hoqhv ngo la swcw nvg pengko ho pvvb birwl apnam mam kaacil mwwpa mvdwb nyitayin.

¹⁴‍Hwdlo swcw aoso haapam mam ngo juumyin hoo haapam ho illiam kaapa tayin,

¹⁵‍ngo la nulv hoo swwl doonbo svdin mwlwg pengko ho ngoqg pvvb birwl apnam mam ngo mwwpa tayin. Hoo issiv nywywngam lokta sa-hindu henglayil swwl doonbo tulungam twrkram.

¹⁶‍Hwdlo illiv haapam aoho dooikam, ngo ham kaapayin hoo Pwnbo gvla swcw nvg aoso swwl doonbo svdin tulug pengko ho kuiyum xaqb pvvb birwl apnam mam mwwpa tayin.”

¹⁷‍Pwnbov Noannvn benum, “Soq si ngoqg la swcw nvg aoso swwl doonbo svdin tulug pengko ho pvvb birwl apnam mam kaacin dvb muxnamv.”

¹⁸‍Hulu hoqgv lvvgwb lengkbo Noag ko tuup tulungv Sem, Ham, hoo Japet. (Ham Kanaanwg abwb nyiknum)

¹⁹‍Soq tuup oum si Noag ko tuupv, hoo soq tulu soqgv swcw soqg nyi mwlwngv peemwl lengnum.

²⁰‍Noa rongo mvnbo nyi gob nyiknum, hoo mwv roo ann ak liinum.

²¹‍Mwv roo alangam twwnum hoo twwxum tvl mwwg tombu uraho vj koomab gel karnum.

²²‍Hoo Ham, Kanaanwg abv mwwg abwg vj koomab talonam mam kaanum hoo mwwg vbw-boram vnyiam lvvgwb lengl betamnum.

²³‍Ho Sem la Japet vj naalayil, vnyig gorbw ho tambaq tvl langk taqc yaab doqkur tvl wnv vj koomab talo tvl doonbo bulug abam tomlupnum. Bulug nyuqm mam langk yaab nywpaq tvl, hoo bulv bulug abwg vj koomab talonam mam kaamanum.

²⁴‍Hwdlo Noa mwwg roo ala twwxumnam hoqgv huurab yukho hoggv mwwg ko tuup anyangv mwam nyiknum ham cengnum,

²⁵‍mwv benum, “Beenamv Kanaan aoho doon ka; mwwg vbw-bor tulu gab nyera raasur akgob swwn ka.”

²⁶‍Mwv hvlakam benum, “Semwg Pwnbo At Swn paqyalinco; hoo Kanaan mwwg nyera gob nyin ka.

²⁷Pwnbov Japetnvn koi yaiya mvg nvka, hoo mwam Semwg tombu uraho doom to, hoo Kanaan mwwg nyera gob nyin ka.”

²⁸‍Sa-hindu hengxo kokw so Noa vnyw 350 gob swwl doonum.

²⁹‍Noag swwnam mam odum-apa yin vnyw 950 gob swwpe kul, hoo mwv siknum.