Read Nyishi 2 SAMUYEL 1 Bible Online

2 SAMUYEL 1 - Nyishi bible

2 SAMUYEL 1

¹Soulwg sixo kokw so, hwdlo Debid Amalek nyi tulungam meng peekul hookurnum, Debid Jiklag ho aal loonyi go doonum.

²‍Hoo loum deen aalho kaato, Soulwg svmcw hoqgv nyi ak mwwg vjam pujar-puiyiq tvl hoo mwwg dumpo ho kac-tanyiaq tvl haanum. Hoo hwdlo mwv Debid dookho hvvc yin, mwv kedho geqp tvl hoo mwam modul xumnum.

³‍Debid mwam benum, “No hogloqkv haai yin?” Hoo mwam mwv benum, “Ngo Israel svmcw hoqgv kelin yukun.”

⁴‍Hoo Debid mwam benum, “Hoggub hoqhv nyin kun? Ngam betam to.” Hoo mwv birwqnum, “Nyiilungv nyob pak hoqgv kenya nukun, hoo nyiilungam naleqgo meng nukun hoo sin kun hoo Soul la mwwg ko tuup Jonatan kam sin kun.”

⁵‍Ho Debid mwam betam bo yaapa ak ham benum, “Soul la mwwg ko tuup Jonatan sin kun hvl, hoggub no cengnum?”

⁶‍Hoo yaapa ak hv mwam benum, “Ngo haqma paq golo Gilboa puutu ho yvnum, hoo Soul mwwg nwwxo ho yeedaq tvl doonum, hoo kaato, ceriot tulungv la svpur xarn bo tulungv mwam hvvnwqnum.

⁷‍Hoo hwdlo mwv kookur yukho, mwv ngam kaapanum, hoo ngam goqnum. Hoo ngo birwqnum, ‘Ngo si doodwn.’

⁸‍Hoo mwv ngam benum, ‘No hiyv?’ Ngo mwam birwqnum, ‘Ngo Amalek nyiingv hvnum.’

⁹‍Hoo mwv ngam benum, ‘Ngoqg bviywr so daqto hoo ngam siriq dvb mengpaq tvb, hoggab hentwr-kaasv ngam mviya paku, hoo hvbsujaqkam ngo sija godab siriq maab vs-alo gob nyidu dvn.’

¹⁰‍Hoqgab ngo mwwg bviywrho daqnum hoo mwam siriq dvb mengknum, hoggab mwv geqp kuba lo swwkram hvl ngo cengnum. Hoo ngo mwwg dumpo hoqgv ywr dumtupam hoo mwwg laqpo hoqgv rup koojam pilin yukun, hoo ngo hoq tulu ham ngoqg nyiit at dook si baqa yukun.”

¹¹‍Ho Debid mwwg vjam gvbw tvl pujarnum, hoo mwwg lvgab doonbo nyi mwlwngv hvb nyinum.

¹²‍Hoo Soul gab la mwwg ko tuup Jonatan gab hoo At Swg nyiilu gab hoo Israel nombu gab bulv ariyum namgub dvma-twwmab nyix-riil hoo xabnum, hoggab bulv lyoqr orioq niqtuqb haaknum.

¹³‍Hoo Debid mwam betam bo yaapa akam benum, “Hogloqkv no haai yin? Hoo mwv birwqnum, “Ngo nyiogy gilwqbo, Amalek akwg ko tuupv.”

¹⁴‍Debid mwam benum, “Hoggub noqg alaqkv At Swg xuqlinam akam mengdwb no bos maanum?”

¹⁵‍Ho Debid nyega yaapa ak goqa banv hoo benum, “Wn, mwam mengta.” Hoo mwv mwam patab kunum ho mwv siknum.

¹⁶‍Hoo Debid mwam benum, “Noqg hijumv noqg atwg dumpo ho doon ka, hoggab noqg atwg agam hoqgv no atv yolungam bipup sugnukun, hoo begamv, ‘Ngo At Swg xuqnam akam mengknum.’”

¹⁷‍Hoo Debid vcjaqb xabnv soq nyix-riinam sam Soul gab la mwwg ko tuup Jonatan gab nyix-riinum,

¹⁸‍hoo mwv benum soq sam Juda nyiilungam tomswr dvb nyipa ku; kaato, soq sam Jasarwg Kitap ho xeqp pakun. Mwv benum:

¹⁹“Oa Israela, noqg yuunam mam ngulug diisw nyook tulu ho mengnukba! Hoggub yu atorl haakam bo tulungv yoql nukun!

²⁰Gatho ham betam maabv, Askelon lamta ho ham xeqlin maabv, hvbnyibalo Palistanwg nyem ko tulungv hemp-hvnyir tai, hvbnyibalo pepaql-mux mvmanum nyem ko tulungv larmin-xaamin tai.

²¹“Gilboa puutunga, noqg aoho gumsiv la nyodongv dooma nuka, ho rongo tulu ho hog swwma nuka! Hoggab atorl haakam bo akwg svtam mam hoqho musum-mviyam paku, Soulwg svtam mam, kuty neexaql neelap kumanum.

²²“Ywlw twwnam hoqgv, ho atorl haakam bog oxam, Jonatanwg uppuqkv abxaq maanum, hoo Soulwg lyoqr orioqkv asarb wkur maanum.

²³“Soul la Jonatan mwlwg tumab abynamv la anya bov! Swwjaqkam hoo sijaqkam bulv hang pwsaq maanum; bulv xookum mam nyebia yaab jarnum; bulv sony nyot tulungam ator yaanum.

²⁴“Israelwg nyem ko tulunga, Soul gab xabto, hiyv nulam kangam bo lwwsa-lwwma vjam koomnum, hiyv nulam hun ojam gvmnum.

²⁵“Hoggub yu atorl haakam bov nyob pak pengko ho yoql pakun! “Jonatannvn noqg diisw nyook lo meng nukba.

²⁶Ngoqg bor Jonatan, ngo noqgab vc loodab mwwdwq do; no ngoqg hemp-hvnyirb tumanam akgob nyinum; noqg ngam abynamv luusaq loodanum, nyem abynam mam kam koi yaab abynum.

²⁷“Hoggub yu atorl haakam bov yoql pakun, hoo nyob panan dvrab tulungv yuupaq nukba!”