Read Nyishi 2 SAMUYEL 11 Bible Online

2 SAMUYEL 11 - Nyishi bible

2 SAMUYEL 11

¹Vnywg dug moodam lvpw atwg nyiilo bo tulungv nyob patab wd moodam, Debid Joab nvla mwwg nyera tulungam Israel lvgab kanamnum. Hoo Bulv Ammon nyi tulungam nyob paiyal hoo Rabbangam naareqnum. Hvbmabde Debid Jerusalemho doodunum.

²‍Soq sib nyinum, doonyi itoq dvk aal golo hwdlo Debid mwwg kartam hoqgv gorab layil lvpw atwg nam aoho wl yvnum, ho mwv nyem ak gv hurs sudunam mam kaapanum; hoo nyem ak hv kangam jaqnum.

³‍Hoo Debid nyi kanam tvl nyem ak ham pooiyeq mvnum. Hoo nyi ak benum, “Hoqhv Hittait nyi Uriyag nywxw Eliyam nyem ko, Betseba maas i?”

⁴‍Ho Debid pui bilwq tvl mwnwn goqa mvnum hoo mwn mwwg dookub haanum, hoo mwv mwnwn doognum. (Mwn hoqg moodho namc doopel atv atam xeexaqnum.) Ho mwn mwnwg nammwb wkur kunum.

⁵‍Hoo nyem ak hv ko gvrab kunum, hoo mwn Debidnvn pui bilwql betamnum, “Ngo ko gvpa ku.”

⁶‍Hoqgab Debid Joabnvn pui bilwql benum, “Hitttait nyi Uriyanvn ngoqg dookub kanam to.” Hoo Joab Uriyanvn Debid dookub kanam jinum.

⁷‍Hwdlo Uriya mwwg dookho haai yikho, Debid toxnum Joab hoggub nyidu do hoo nyiilungv hoggub nyidu do hoo nyob panamv hoggub podu do hoq tulu ham toxnum.

⁸‍Ho Debid Uriyanvn benum, “Noqg nammwb inku hoo noqg lvpiangam hursta.” Hoo Uriya lvpw atwg nam hoqgv lvvgwb lengknum, hoo mwwg kokwb lvpw atv lvqc ak kanam nvmlwqnum.

⁹‍Hvbmabde Uriya lvpw atwg viyap bviywrho mwwg nyiit atwg nyera tulu lvgab yubnum, hoo mwwg nammwb ik maanum.

¹⁰‍Ho bulv Debidnvn betamnum, “Uriya mwwg nammwb ik ma,” Debid Uriyanvn benum, “No nyiody boa maan mvi yv? Hoggub noqg nammwb no ik maanum?”

¹¹‍Uriya Debidnvn benum, “Xumk pirram la Israel nyi tulungv hoo Judangv nyob pakhv doodo, hoo ngoqg nyiit at Joab la nyiit atwg nyera tulungv nyoro lvpa lo nyob padwb svmcw mvgaql yvdo. Soq sib nyidu mvtwl ngoqg nammwb ngo iyin do i, dvmin-twwminl hoo ngoqg nywxw lvgab yumin-karmin gviyin do i? No swwdy deedib, hoo noqg yvjv doody deedib, ngo soq tulu sam nyiram.”

¹²‍Ho Debid Uriyanvn benum, “Soolo kam so dooto, hoo aaram mam ngo nam kanam nookur tayin.” Ho Uriya Jerusalemho hoq aal hoola hoo loogwn hookam doonum.

¹³‍Hoo Debid mwam goqnum, hoo mwv mwwg kaagaho dvn-twwnum, ho mwv mwam twwxum dvb hooxumnum. Hoo ariyum ho mwv wknv mwwg nyiit atwg nyera tulug yubk ho yubnum, hvbmabde mwv mwwg nammwb ik maanum.

¹⁴‍Ar ho Debid pota taqg xeqtwl Joab gab Uriya alaqho jilwqnum.

¹⁵‍Pota ho mwv hvb xeqnum, “Uriyanvn vs-axaq jaqb nyob pak diigarho roolwqto, hoo mwwg hoqgv tobkurl wleqto, ho mwam patab yin pv hoo mwv sitayin.”

¹⁶‍Hoo Joab bopam mam naareq reqdul doonum, mwv Uriyanvn hogloq ho vs-axaq jaqb nyob pak diigarb kanamnum.

¹⁷‍Hoo bopam hoqg nyi tulungv lenglayil hoo Joab lvgab nyob pabanum, hoo Debidg nyera tuugin nyiilu pengko siknum. Hittait nyi Uriya kam siknum.

¹⁸‍Ho Joab nyob podunam puiyam nyi kanaml Debidnvn betam mvnum.

¹⁹‍Hoo mwv pui baqn boam tomswrl bilwqnum, “Hwdlo no nyob podunam pui mwlwngam lvpw atam betaml benya yin,

²⁰‍ho lvpw atv hang lengl, hoo mwv nam soq sib bebnyiloqkam, ‘Hoggub nulv bopam ogumho wnwql nyob panum? Bulv gurum uko hoqgv ab tayin hvl nulv cengma namyv?

²¹‍Hiyv Jerubbeset gv ko tuup Abimeleknvn mengnum? Nyem ak miiriq lwpiangv mwam gurum ao hoqgv joojab tvl ho mwv Tebej ho sima namyv? Hoggub nulv gurum ogumho wnwqnum?’ ho no betam ta, ‘Noqg nyera Hittait nyi Uriya kam sin kuba.’”

²²‍Hoqgab pui baqn bov wnum hoo Joab bilwqnam hog mwlwngam Debidnvn betamnum.

²³‍Pui baqn bov benum, “Nyi tulungv ngulug aoho hampeqnum hoo deela ho ngulam pvrwq taab lengnum, hvbmabde ngulv bulam haagag toggoq namgub ruqkurnum.”

²⁴‍Ho uppuq abn bov noqg nyera tulungam abnum. Lvpw atwg nyera tuugin sipa ku, hoo noqg nyera Hittait nyi Uriya kam sipa ku.”

²⁵‍Debid pui baqn boam benum, “Soq sib Joabnvn beta, ‘Soq pagoq gab no mwwdwq maabv, hoggab nyob pak lo hiyv sitayin hoo tortayin ham cengma dvn. No bopam mam ator loodab ceekol nyob pag dvl hoo ham naareq tvk hvta.’ Hoo mwam haakam bepa ta.”

²⁶‍Hwdlo Uriyag nywxwngv mwnwg nyol Uriyag sinam mam tapa yin, mwnwg nyol gab mwn mwwdwql nyix-riinum.

²⁷‍Hoo hwdlo nyix-riinamv wiyum yukun, Debid nyi kanam tvl mwnwn mwwg namho boolwq mvnum, hoo mwn mwwg nywxwb nyiknum hoo nyega ko ak bwwnum. Hvbmabde Debidg hoqg nyiknam ham At Sw hemp maanum.