Read Nyishi 2 SAMUYEL 12 Bible Online

2 SAMUYEL 12 - Nyishi bible

2 SAMUYEL 12

¹Hoo At Sw Natannvn Debid dookub kanamnum. Mwv mwwg dookub haanum hoo mwam benum, “Bopam golo nyi vnyig doonum, akwn hv nyetnum hoo akwn hv jwwgwnum.

²‍Nyetbo nyi hv naleqgo sviya gvla sibin-svvngv doonum,

³‍hvbmabde jwwgwbo nyi akv hog akkam doomanum, hvbmabde sviya ko dorkin go daqgnum. Hoo mwv ham sorabnum, hoo hoqhv mwwg lvg bvla ko tulug lvgab swwrabnum. Hoqhv mwwg duduq-dvngaram dvnum hoo mwwg twwnan pvtaq hoqgv twwnum hoo mwwg laqpo ho karminum, hoo hoqhv mwwg nyem ko hvb jaq nyinum.

⁴‍Aal golo nyetbo dookub nyiin akam haanum, hoo mwwg sviya ho sibin-svvngam mwv mwwg dookub haanbo nyiin gab dwm gab patab nwwmanum, hvbmabde mwv jwwgwbo nyi akwg sviyangam naalayil mwwg dookub haanbo nyiin ak gab patabl mwx-mvaq jinum.”

⁵‍Ho Debid vc loodab hoq nyi ak ham hang lengnum, hoo mwv Natannvn benum, “At Sw swwl doodo, hiyv hoqhvb nyinbo nyi ak hv siyin do,

⁶‍hoo mwv sviyangam dorpy gooiya jikur dvb nyitayi, hoggab mwv soq sib nyigam gab, hoo mwv aya mwwpa ma.”

⁷‍Natan Debidnvn benum, “No lak hoqg nyi hv! Soq sib Israelwg Pwnbo, At Sw bedo, ‘Ngo nam Israelwg aoho lvpw at gob xuqlinum, hoo Soulwg alaq hoqgv nam ngo naalinum.

⁸‍Hoo noqg nyiit atwg nombungam hoo noqg nyiit atwg nywxw tulungam nam ngo jinum hoo Israelwg nombu ngamla Judangam nam jinum. Hoo soq tulu noqgab anyo nyiloqkam, ngo nam sam viyago vbw jispaco.

⁹‍Hoggv mwwg kaagaho al maadwn, hoggub no At Swg gomcwram tamab nyipa kun? Hittait nyi Uriyanvn no lyoqr orioq lvgab patab paku hoo mwwg nywxwngam noqg nywxwb naapa ku hoo mwam Ammon nyi tulug lyoqr orioq lvgab mengm paku.

¹⁰‍Hoqgab sija lyoqr orioqkv noqg nombu hoqgv nywywngam wleq kuram, hoggab no ngam haqpaq paku hoo Hittait nyi Uriyag nywxwngam noqg nywxwb naapa ku.’

¹¹‍Soq sib At Sw bedo, ‘Kaato, noqg atwg nombu hoqgv nam almab ceeko boam lengm tayin. Hoo noqg vnyiq kaaga hoqgv noqg nywxw tulungam ngo naatayin hoo bulam noqg door-doopwngam jitayin, hoo noqg nywxw tulungam mwv aal lvpangam kaad lalab bwwtayin.

¹²‍Hoggab no soq sam kvsil nyinum, hvbmabde ngo soq tulu sam Israelwg mwlw kaaga hoola aal lvpangam kaad lalab nyitayin.’”

¹³‍Debid Natannvn benum, “Ngo At Swn ceekol nyic nyipa ku.” Hoo Natan Debidnvn benum, “At Sw noqg nyic apaq jipa; no siram.

¹⁴‍Hvbsujaqkam, noqg soq nyinam si At Swn vc loodab nyij-nyipar pa, hoqgab noqgab ko bwwtanam hv sitayin.”

¹⁵‍Ho Natan mwwg nammwb wknum. Hoo Uriyag nywxw hv Debid gab ko ak bwwnam ham At Sw hentwr-kaas dvb mvnum hoo mwv vcnum.

¹⁶‍Hoqgab Debid ko gab Pwnboam meegaqnum. Hoo Debid dvma-twwmab vrr rwl doonum hoo lwxiam mwwg cwwrw urab wnv hoo deela ho ai yupwngam karl doonum.

¹⁷‍Hoo mwwg nombu hoqgv nyiixa tulungv mwwg bviywrho daqnum, mwam deela hoqgv tuurab dvb hvl, hvbmabde mwv tuurab kumanum, ho bulug lvgab mwv dvs gokam dvmanum.

¹⁸‍Kvn deen aalho kongv siknum. Hoo Debidg nyera tulungv kongv sin kuba hvl betam dvb bosnum, hoggab bulv benum, “Kaato, ko torl dooyikho ngulv mwam goonum, hoo mwv ngulug benam mam tamanum. Hoggub sija ngulv mwam kongv sin kuba hvl betam tayin kun yu? Mwv atv lokam un-tar mvg suta maaco.”

¹⁹‍Hvbmabde hwdlo mwwg nyera tulungv jebs-japeq minsnam mam Debid kaapanum, kongv sipa ku hvl Debid cengknum. Hoo Debid mwwg nyera tulungam benum, “Kongv sipa ku i?” Bulv benum, “Mwv sipa ku.”

²⁰‍Ho Debid ked hoqgv gorabnum hoo hurs moomiq tvl hoo mwv atv kuty paql hoo mwwg vjam koolynum. Hoo mwv At Swg nam urab haanum hoo xumnum. Ho mwwg atwg nammwb mwv wkurnum. Hoo hwdlo mwv dvs-twws koikam, bulv mwwg agaho dvsam ap jinum, hoo mwv dvnum.

²¹‍Ho mwwg nyera tulungv mwam benum, “Hoggub no soq sib nyidwn? Hwdlo kongv swwl dooyikho no dvma-twwmab xabl-riil ator konum; hvbmabde hwdlo kongv siyi kun, no gorab layil hoo dvsam dvrab dvkun.”

²²‍Mwv benum, “Hwdlo kongv dooyikho ngo dvma-twwmab vrr rwl xabn-riinum hoqgab ngo benum, ‘Hiyv cengdwn At Sw lokam ngam anya mwwpal, ho kongv swwkam twqto mwwnum?’

²³‍Hvbmabde mwv sin kuba. Hoggub ngo dvma-twwmab vrr rwl doos bv? Ngo mwam turkur dvb mvnyi tai nvi yv? Ngo mwwg dookub wtayin, hvbmabde mwv ngoqg dookub hookur nyokram.”

²⁴‍Ho Debid mwwg nywxw Betsebanvn bet-belanum, hoo mwnwg dookub wnv mwnwn doognum, hoo mwn nyega ko dwrbuqnum, hoo mwwg eminam mwv Solomon hvl pvvnum. Hoo At Sw mwam abynum

²⁵‍hoo nyiqry benbo Natannvn pui bilwqnum. Ho At Sw gab, mwwg eminam mwv Jedidiya hvl goqnum.

²⁶‍Ho Joab Ammon gv Rabbangam ceekol nyob panum hoo xinam bopam mam naareq kunum.

²⁷‍Hoo Joab Debidnvn pui bilwql benum, “Ngo Rabbangam ceekol nyob papa kun; hoq lvg-lvgab ngo iss bopam mam naareq pakun.

²⁸‍Hoqgab sija nyiilungam lvkin gob goqkum to hoo bopam mam nyob pal hoo ham naato, hvbmab nyiloqkam ngo bopam mam naatayin hoo hoqham ngoqg eminb mingta dvn.”

²⁹‍Hoqgab Debid nyiilungam lvkin gob goqnum hoo Rabba ho wnum hoo ham ceekol nyob pal hoo ham naaknum.

³⁰‍Hoo bulug lvpw at hoqg ywr dumtupam mwwg dumpo hoqgv mwv naanum. Hoqg vgwngv hun telent akgob nyinum, hoo hoqhv xinam wlwngv, hoo hoqham Debidg dumpo ho tulwqnum. Hoo mwv bopam mam nyob pareqnam dupum-dvrab pam naleq jaqg baqlinum.

³¹‍Hoo hoq uraho doonbo nyiilungam mwv boolinum hoo bulam svvda peem dvb hoo yoqdwr darm dvb hoo wsw pam dvb hoo bulam hita pwm dvb nyera-paqn gob mvknum. Hoo soq sib mwv Ammon nyi tulug bopam mwlwngam nyim kunum. Ho Debid la nyiilungv Jerusalemb wkur kunum.