Read Nyishi 2 SAMUYEL 13 Bible Online

2 SAMUYEL 13 - Nyishi bible

2 SAMUYEL 13

¹Debidg ko tuup Absolom kangam bo bwrm ak doonum, mwnwg eminv Tamar. Hoo kokw so Debidg ko tuup Amnon mwnwn kaabil abynum.

²‍Hoo Amnon mwwg bwrm tamarnvn mwv kaabil aby ko-gab mwv vc loodab hentwrnum, hoggab mwn mvvngam ak gob nyinum, hoo Amnon gab hoq hv vs-axaql mwnwn hog gokam nyik doomanum.

³‍Hvbmabde Amnon ajin ak doonum, mwwg eminv Jonadab, mwv Debidg bor hoqg Simeag ko tuupv. Hoo Jonadab gwwlyw loodanum.

⁴‍Hoo mwv mwam benum, “Lvpw atwg ko tuupa, hoggub ar rog-ya rog-ya no mwwdwq dwqdwn? No ngam betam ram yv?” Amnon mwam benum, “Ngoqg vbw Absolom gv bwrm Tamarnvn ngo kaabil aby dvn.”

⁵‍Jonadab mwam benum, “Swkkwl noqg kartamho vc karl dooto. Hoo hwdlo noqg ab nam kaatab haaikam hoo mwam beto, ‘Ngoqg bwrm Tamarnvn kanam tvl hoo ngam wtw dvs loq jim tvbv, hoo ngoqg vnyiq kaagaho dvs-twwsam mwx-mvaq mvtbv hoo ngo ham mwnwg alaq hoqgv dvtayin.’”

⁶‍Ho Amnon swkkwl mwwg kartamho vc karl doonum. Hoo hwdlo mwam lvpw atv kaatab haadwk ho, Amnon lvpw atam benum, “Anya mwwpa gvdwl ngoqg bwrm Tamarnvn kanam taab hoo ngoqg kaaga so seenam wtw loq munu mvtbv, ho ngo mwnwg alaq hoqgv dvtayin.”

⁷‍Ho Debid Tamarnvn nammwb kanaml begamv, “Noqg vbw Amnon nammwb wgdvl hoo mwwg gab dvs-twws mwx-mvaq jita.”

⁸‍Ho Tamar mwnwg vbw Amnonwg nammwb wnum, hogloq ho mwv kordul doonum. Hoo mwn wtw naalayil hoo ham nwrnyiaq tvl hoo ham seenam wtwngam mwwg kaagaho kabl hoo kobnu jinum.

⁹‍Hoo mwn cvvkaq hoqgv naalin layil mwwg agaho ap jinum, hvbmabde mwv dvramk hvl benum. Hoo Amnon benum, “Mwlwngam ngoqg dook soqgv wleq mvto.” Ho mwlwngv mwwg dook hoqgv lvvgwb lengleqnum.

¹⁰‍Ho Amnon Tamarnvn benum, “Dvsam ngoqg pwqlwho bwa tvb, ho ngo noqg alaq hoqgv dvtayin.” Hoo Tamar mwnwg seenam wtw tulungam mwn ham naalayil mwnwg vbw Amnonwg pwqlw urab bwa jinum.

¹¹‍Hvbmabde hwdlo mwn wtwngam mwam dvm dvb mwwg ogum ho bwwnwq yin, mwv mwnwg alaqkam nootunum hoo mwnwn benum, “Ngoqg bwrm, ngoqg lvgab karba to.”

¹²‍Mwn mwam birwqnum, “Ma, ngoqg vbw, ngam soq nyil laqlaqb nyinam sam nyimabv, hoggab Israel lo soq sam nywywngam nyima dvn; soq al looda maan nyinam sam nyimabv.

¹³‍Ngoqg gab hoglo yu ngoqg hvnyw sam ngo baqp tayin? Hoo noq gab, no Israel uraho mwlwngam al looda maab nyinbo paca ak gob nyitayi. Hoqgab sija, anya mwwpa gvdwl lvpw atam agam gooto, hoggab mwv noqg hoqgv mwpyram.”

¹⁴‍Hvbmabde mwv mwnwg benam mam tamanum, hoo mwnwn mwv ator yaagam gab mwv mwnwn nyilil nyiknv hoo mwnwn doognum.

¹⁵‍Ho Amnon mwnwn vc loodab oyumnum, ho mwwg mwnwn oyum kunamv mwnwn abynam ham ya koi yaanum. Hoo Amnon mwnwn benum, “Gorabto! No wnku!”

¹⁶‍Hvbmabde mwn mwam benum, “Ma, ngoqg vbw, soq sib no ngam almab nyitwl ngam roopaqnam si no nyic-nyia loodab nyipa.” Hvbmabde mwv mwnwg benam mam tamanum.

¹⁷‍Mwam kvi-kanam tanbo yaapangam goqanum hoo mwam benum, “Soq nyem sam ngoqg dook soqgv boolin to hoo viyap pam xwrtum to.”

¹⁸‍Sija mwn vj aaso bo ak lobor-laqsur dvb koonum, hoggab hoqhv lvpw atwg mvvngam tulug vj koocwngv. Ho mwwg nyerangv mwnwn boolin tvl hoo viyap pam xwrtumnum.

¹⁹‍Hoo Tamar mwnwg dumpo ho mubam taaiyaqnum hoo mwnwg aaso dvb vj koonam mam swrtunum. Hoo mwnwg alaqkam mwn dumpo ho gwrgab tvl mwn vc jaq xabjol wleq kunum.

²⁰‍Hoo mwnwg vbw Absolom mwnwn benum, “Noqg vbw Amnon nam doognam yv? Ngoqg bwrm swrso to. Mwv noqg vbwngv; soq sam noqg hang ho paamabv.” Ho Tamar, mwnwg vbw Absolom gv namho haqpaq kunam nyem akwb swwknum.

²¹‍Hwdlo Lvpw at Debid hoq mwlwham tapa yukho, mwv vc loodab hang lengnum.

²²‍Hvbmabde Absolom Amnonnvn al bvkam ho kor bvkam agam goomanum, hoggab Absolom Amnonnvn oyumnum, hoggab mwv mwwg bwrm Tamarnvn doolil doognum.

²³‍Vnyw nywnyi bumpw kokw so Absolom Iprayim ogumg Baal-hajor ho sviya vm mam reql doonum, hoo Absolom lvpw atwg ko tuup mwlwngam goqkumnum.

²⁴‍Hoo Absolom lvpw at dookub haanum hoo benum, “Kaato, noqg nyerangv sviya vm reqdul doodwn. Anya mwwpa gvdwl lvpw atv la noqg nyera tulungv ngoqg lvgab wba tvb.”

²⁵‍Hvbmabde lvpw atv Absolomnvn benum, “Ma, ngoqg ko tuup, ngul mwlwngv wyoju, hoggab ngul mwlwngv wb nyiloqkam noqgab vs-axaq tai.” Mwv mwam xaateqnum, hvbmabde mwv wma, hvbsujaqkam mwwg lvqcam mwam aky gob jinum.

²⁶‍Ho Absolom benum, “Hvbnyiloqkam, anya mwwpa gvdwl ngoqg bor Amnonnvn ngulug lvgab wwm tvb.” Hoo lvpw atv mwam benum, “Hoggub mwv noqg lvgab wtayin?”

²⁷‍Hvbmabde Absolom mwam xaateq tiqtwl hwdlo Amnon la lvpw atwg ko tuup tulungam mwwg lvgab wma deedib bel doonum.

²⁸‍Ho Absolom mwwg nyera tulungam gaml jinum, “Hwdlo Amnon opo twwxum dvb twwiyin kaagab yaato, hoo hwdlo ngo nulam beiyi kam, ‘Amnonnvn patab to,’ ho mwam mengto. Bos maabv; ngo nulam gaml jima nvm yv? Haakam jaqto hoo vnywjaq laka.”

²⁹‍Ho Absolom gv nyera tulungv Absolom gv gaml jinam hvb Amnonnvn nyiknum. Ho lvpw atwg ko tuup tulungv at-atwg svdam ho cao kunv hoo keknum.

³⁰‍Hwdlo bulv lamta ho wdul dooyikho puiyv Debid dookho hvvcnum, “Absolom lvpw atwg ko tuup mwlwngam akam apaq maab meng nukba hvl betamnum.”

³¹‍Ho lvpw atv gorab layil hoo mwwg vjam puc-puiywl mvnum hoo kedho geqpwl doonum. Hoo mwwg bviywrho daqn bo mwwg nyera mwlwngv bulug vjam puc-puiywl mvmin gvnum.

³²‍Hvbmabde Debid bor Simeag ko tuup Jonadab benum, “Ngoqg nyiit atv, lvpw atwg ko tuup mwlwngam mengnam hvl mwwmabv, hoggab Amnon aro sipa ku. Hoggab Absolom gaml jigam gab soq si nyipa, mwv soq sam soq sib nyidwb hwdlo mwwg bwrm Tamarnvn mwv gumlil doog yuk aal hoqgv jaq mwwr kunum.

³³‍Hoqgab sija ngoqg nyiit atv, lvpw atwg ko tuup mwlwngv sinya nukba hvl mwwmabv, hvbmabde Amnon aro sin kuba.”

³⁴‍Hvbmabde Absolom kenum. Hoo rvkil dooiya bo yaapa ak hv mwwg vnyiqkv nywrabl kaanum, hoo kaato, nyiilungv naleqgo mwwg langk daiya puutu lamta hoqgv hoodul doonum.

³⁵‍Hoo Jonadab lvpw atam benum, “Kaato, lvpw atwg ko tuup tulungv haapa ku; noqg nyera akwg bekjaqb, hog mwlwngv nyipa ku.”

³⁶‍Hoo mwv agam goonya kalam, kaato, lvpw atwg ko tuup tulungv haaknum hoo bulv vcjaqb sogoql xabnum. Hoo lvpw atv la mwwg nyera tulungv xabtwr kamangam xabnyanum.

³⁷‍Hvbmabde Absolom kenv Gesurwg lvpw at Ammihudg ko tuup Talmai dookub wnum. Hoo Debid mwwg ko gab aal vigo nyix-riil doonum.

³⁸‍Ho Absolom kenv hoo Gesur ho wnum, hoo hoqho vnyw nywum go doonum.

³⁹‍Hoo lvpw atwg yalv Absolomnvn kvvnwl hoo mwwg dookub wnwnum, hoggab mwv Amnonwg sinam pagoqkam mwwtv-saqla kunum.