Read Nyishi 2 SAMUYEL 14 Bible Online

2 SAMUYEL 14 - Nyishi bible

2 SAMUYEL 14

¹Jeruiyag ko tuup Joab lvpw atwg hangv Absolomnvn kvvnwnam mam cengnum.

²‍Hoo Joab nyi kanam tvl Tekoa hoqgv mwwlaqbo nyem ak boanum hoo mwnwn benum, “Nyix-riitaqnan vjam kootwl, nyix-riinbo hvb nyito. No atv kuty paqmabv, hvbmabde oyu mood go nyi sigam gab nyix-riil doonbo nyem nyinam hvb nyito.

³‍Lvpw at dookub wgdvl hoo mwam soq sib agam goota.” Ho Joab mwnwg agam goosam mwnwn gookinum.

⁴‍Hwdlo Tekoag nyem ak hv lvpw atwg dookub haanum, mwnwg nyuqm mam mwn kedho nywbab tvl hoo modul benum, “Oa lvpw ata ngam ywwlin tvb.”

⁵‍Hoo lvpw atv mwnwn benum, “Hoggv noqg vs-axaqkv?” Mwn birwqnum, “Oa, ngo xwwmy akv; ngoqg nyolv sin kun.

⁶‍Hoo noqg paqnv ko tuup vnyi go doonum, hoo bulv rongo ho akwn-akwn yolu dumin sunum. Ho bulam yolu nvvpy bo doomanum, hoo akwn hv akwn patabnum hoo mwam mengknum.

⁷‍Hoo sija nyob mwlwngv noqg paqn akam ceekol bulv begamv, ‘Mwwg boram mengbo nyi akam ngulam jito, ho mwwg boram mwv meng gam gab ngulv mwam sidwb mengtayin.’ Hoo bulv hosiqkam twrm tayin hvdo. Soq sib nyil bulv ngoqg akin cwqnyi mwcw doonbo hamkam toomiq tado hoo ngoqg nyolwg eminam ho boum gokam doom mvmab swcw nvg ao soqgv twrm tado.”

⁸‍Ho lvpw atv nyem ak ham benum, “Noqg nammwb wnku, hoo noqg bvrwq pagoq gab ngo gamlam mvl jilwq tayin.”

⁹‍Hoo Tekoag nyem akv lvpw atam benum, “Ngoqg bir lvpw at, nyimuram ngoqg aoso la ngoqg abwg nombu ho haam to; lvpw at la mwwg pwqlwngv dvrwq jin ka.”

¹⁰‍Lvpw atv benum, “Nam nyiingv hog bebnyiloqkam, mwam ngoqg dookub boa ta, hoo mwv nam nywywngam idaq kuram.”

¹¹‍Ho mwn benum, “Anya mwwpa gvdwl noqg Pwnbo At Swn ator kotbv, ho ree daql minglwq tanboam minglwq mvma dvb, hoo ngoqg ko tuupam twrm mvma dvb.” Mwv benum, “At Sw swwl dood deedib, noqg ko tuupwg dum soog nvkam kedho yoqp ram.”

¹²‍Ho nyem akv benum, “Anya mwwpa tvb noqg paqn akv ngoqg bir lvpw atam agam loq gamg gootayin.” Mwv benum, “Gooto.”

¹³‍Hoo nyem akv benum, “Hoggub no Pwnbog nyiilungam ceekol almab nyidwb mwwdwn? Lvpw atv nyiinbo imiq akam lokta boa kuma dvb, hoggab lvpw atv no atv soq pvvb sam mvpa kun.

¹⁴‍Ngul mwlwngv aal loog gol sitayin; ngulv deela lo iss toopnam hvb nyidwn, hoqham lok dorcum nyok maadwn. Hvbmabde Pwnbov swwgam naapaq maadwn, hoo mwwg mwwjv niikbo akam xima-paqmab niipaq mvdwb mwwma dvn.

¹⁵‍Ngam nyiingv bos dvb mvgam gab ngo ngoqg bir lvpw at dookub haal agam goodwn, hoo noqg paqn akv mwwnum, ‘Ngo lvpw atam agam gootayin; ho hoqham lvpw at mwwg paqn akwg modul konam ham nyikam yin pv mwwnum.

¹⁶‍Hoggab lvpw atv ham tatwl hoo mwwg paqn akam la mwnwg ko tuupam lvkin gob Pwnbog otungam nvvsiq mvmab twrta bo alaq hoqgv naalin yinpv mwwnum.’

¹⁷‍Hoo noqg paqn akv mwwnum, ‘Ngoqg bir lvpw atwg gomcwrv ngam swrso mvi nvpv,’ hoggab ngoqg bir lvpw at Pwnbog gumtw hvb al-koram cengdwn. Noqg Pwnbo At Sw noqg lvgab dooba dvn!”

¹⁸‍Ho lvpw at nyem akam birwqnum, “Nam ngo toxnam hog mwlwngam kvs maab ngam betam to.” Hoo nyem akv benum, “Ngoqg bir lvpw at beto.”

¹⁹‍Lvpw atv benum, “Soq mwlw sam Joab nam bilwqnam yv?” Nyem akv birwqnum hoo benum, “Jvqtw jaqb no swwl doodo, ngoqg bir lvpw at, nyi akkam lvqbwq bvkam ho laqc bvkam bikwq-swq dvb nyima ngoqg bir lvpw at benam hvvjaq. Soq mwlw sam noqg nyera Joab ngam gaml jinum; mwv soq gomcwr tulu sam ngoqg paqnwg agam lo bilwqnum.

²⁰‍Bvrwq pagoqkam tulu sam kwly mvdwb noqg nyera Joab soq sam nyinum. Hvbmabde ngoqg bir at Pwnbog gumtwngv mwwlaql swcw nvg aoso hog mwlw pagoqkam cengnam hvb cengnum.”

²¹‍Ho lvpw at Joabnvn benum, “Sija kaato, ngo sam loorwq gviyin; wno, yaapa Absolomnvn bookurl boa ta.”

²²‍Hoo Joab mwwg nyuqmv kedho pvxwl hoo modul xumnum hoo lvpw atam lvqcnum. Hoo Joab benum, “Soolo noqg nyerangv cengpa ku ngoqg bir lvpw at, noqg kaagaho ngam mwwswnam mam, ho lvpw atv mwwg nyerag xumnam mam loorwq paku.”

²³‍Ho Joab gorab layil Gesurb wnum hoo Absolomnvn Jerusalemb boanum.

²⁴‍Hoo lvpw atv benum, “Mwam mwwg at namho doogw mvto; mwam ngoqg kaaga so haam mvmabv.” Ho Absolom mwwg atwg namho doonum hoo lvpw atwg kaagaho haamanum.

²⁵‍Israel mwlwg pengko ho Absolomnvn kangam pak hvl paqnam hvb nyi paqnam akkam doomnum. Mwwg lvc koro hoqgv naarab dumrwq tvqyw namgub hog mwlwngv pwp xiipu pan hvb nyinum.

²⁶‍Hoo hwdlo vnywngam mwwg dum mam reqyikam (hoggab vnyw vtwr-anya aalam mwv dum sabkynum; hwdlo hoqhv vgw yin, mwv ham sapaqnum), mwwg dumpo hoqg dum vgwngv lvpw atwg xikanan xika yin lwwnyi sikil gob nyinum.

²⁷‍Absolomnvn ko tuup oum go dwrbuqjnum, hoo nyem ko ak doonum mwnwg eminv Tamar. Mwn kangam bo nyem gob nyinum.

²⁸‍Ho Absolom Jerusalem vnyi nywnyi bumpw go lvpw atwg kaagaho haamab doonum.

²⁹‍Ho Absolom Joabnvn nyi bilwq tvl, mwam lvpw atwg dookub kanam tvbwk hvl benum, hvbmabde Joab mwwg dookub haamanum. Hoo mwv lwnyi dvb kanamnum, hvbmabde Joab haamanum.

³⁰‍Ho mwv mwwg nyera tulungam benum, “Kaato, ngoqg rongo dvqsinv Joabg rongongv, hoo mwwg tanyeqkv doodo; wno hoo hoqham wm tolwqta.” Ho Absolom gv nyera tulungv rongongam wm tolwqnum.

³¹‍Ho Joab gorab layil Absolom gv nammwb wnum hoo mwam benum, “Hoggub noqg nyera tulungv ngoqg rongongam wm tolwqnum?”

³²‍Absolom Joabnvn birwqnum, “Kaato, ngo nam agam bilwqnum, ‘Soq haatwk hvl, ho ngo nam lvpw atwg dookub kanam tvl hog tox mvdwb mwwnum, “Hoggub ngo Gesur hoqgv so haanum? Ngo alo doonamv al yaat ba.” Hoqgab sija ngo lvpw atwg dookub wtayin, hoo ngo nyimur paloqkam, ngam sidwb mwam mengm to.’”

³³‍Ho Joab lvpw atwg dookub wnum hoo mwam betamnum, hoo mwv Absolomnvn goqanum. Ho mwv lvpw atwg dookho haanum hoo lvpw atwg agaho mwwg nyuqm mam kedho pvxwnum, hoo lvpw atv Absolomnvn moopupnum.