Read Nyishi 2 SAMUYEL 15 Bible Online

2 SAMUYEL 15 - Nyishi bible

2 SAMUYEL 15

¹Soq kokw so Absolom mwv atv ceriot ak la svpur tulu go naanum, hoo nyi camng go mwwg otuqb xarl wwmnum.

²‍Hoo Absolom ar komcam gorabnv hoo toggoqg lamta bviywrho daqnum. Hoo hwdlo hiyv lajaqkam yolu doon bov lvpw at dookub pw-hwwbwq kutab haan boam, Absolom mwam goql hoo toxnum, “No hogloq bopam hoggv?” Hoo hwdlo mwv benum, “Noqg nyerangv hvk-hvkwg gvda hoqgv hoo hvk-hvkwg Israelwg nyobv hvl betam yin,”

³‍Absolom mwam bedwn, “Kaato, noqg benam si aldo hoo jvqtw do, hvbmabde noqg bvrwq sam tam dvb lvpw atv hvvky xuqlin ma.”

⁴‍Ho Absolom bedwn, “Oa ngo gvda so nyegam gob nyinyiloqkam al hitba! Ho nyiicwr-cwrxig bamy-taiyam ngoqg dookub haag dvn pv, hoo ngo mwam lootwngam pvvbam jid nvpv.”

⁵‍Hoo hwdlo jaqkam nyi akv ogum hvvnwql mwam modul xumn boam, mwwg alaqkv mwam nootul hoo mwam cegab tvl hoo mwam moopupnum.

⁶‍Soq sib Absolom lvpw atwg dookub pw-hwwbwq kota haanbo mwlwngam nyinum. Hoqgab Absolom Israel nyi tulug hangam dvco kunum.

⁷‍Vnyw nywpy kokw so Absolom lvpw atam benum, “Ngam anya mwwpa gvdwl Hebron ho At Swn, ngoqg dingrnam mam, ngam jitab wwm tvb.

⁸‍Hoggab noqg nyerangv Aramwg Gesur ho dooyikho dingrnam ak dingl benum, ‘At Sw ngam Jerusalem lokta bookur kuba lo, ho ngo At Swn xumnam akiam jitayin.’”

⁹‍Lvpw atv mwam benum, “Swrsob wn.” Hoqgab mwv gorab layil Hebronwb wnum.

¹⁰‍Hvbmabde Absolom kvsil pui baqn boam pui bilwqtvl Israelwg nyob vxiam begamv, “Hwdlo nulv tuuly miqnam yalam tapa twqda kalam ho beto, ‘Absolom Hebronwg lvpw atv!’”

¹¹‍Absolom lvgab nyiingv lwwnyi go Jerusalem hoqgv mwwg nyiin goqgam gab mwwg lvgab wmin gvnum, hoo bulv nyiisam nyiib nyitwl hoo hog cengmab wnum.

¹²‍Hoo hwdlo Absolom pwr akiam jidul dooyikho, mwv Debidg tomswr-hony bob Gilonvn hoqg Ahitopelnvn, mwwg bopam Gilo hoqgv goqa mvnum. Hoo hima bwwnamv gogwq yaiya kunum, hoo nyiilungv Absolom lvgab mvqlw kunum.

¹³‍Hoo pui baqn bo ak Debid dookub haanv begamv, “Israelwg nyi tulug hangv Absolom gab ya mwwxam duku.”

¹⁴‍Ho Debid mwwg nyera tulungam mwwg lvgab Jerusalem doon boam benum, “Gorabto hoo ngulv kenuj, ho hvbmab nyiloqkam ngulv Absolom hoqgv keleqko dooram. Nyebia jaqb wto, hvbmab nyiloqkam mwv ngulam nyebia jaqb ruqtin tayi hoo ngulam yuupaq dvb damgeq tai hoo bopam mam lyoqr orioq hoqgv mengtai.”

¹⁵‍Hoo lvpw atwg nyera tulungv lvpw atam benum, “Kaato, ngoqg bir lvpw at hog bvxeq nyitwk hvl bepa kun, noqg nyera tulungv mwx-mvaqpa.”

¹⁶‍Hoqgab lvpw atv lengleqnum, hoo mwwg imiq nyi mwlwngv mwwg kokwb wnum. Hoo lvpw atv xwwbaq nywxw wyw gon namho ap peel wleqnum.

¹⁷‍Hoo lvpw atv lengleqnum, hoo nyiilungv mwwg kokwb wnum. Hoo bulv nam vtwr-anya ho doonunum.

¹⁸‍Hoo mwwg nyera tulu mwlwngv mwam wbol wiyeqnum, hoo Keret nyi tulu mwlwngv, hoo Pelet nyi tulu mwlwngv, hoo Gat hoqgv Gittit nyi tulu lwwx go haamin gvnbo tuluhv lvpw atwg otuqb wconum.

¹⁹‍Ho lvpw atv Gittitwg Ittainvn benum, “Hoggub no ngulug lvgab wmin gviyin? Wkur no hoo lvpw atwg lvgab doomin gvta, hoggab no nyoodo nyi akv hoo noqg nam hoqgv nyumwb boonam akv.

²⁰‍No moiyo dara haanum, hoo soolo ngo nam ngulug lvgab gaqm nwwma, hoggab ngo hogloqb wdu dvn ham ngo cengma? Wkurto hoo noqg vbw-bor tulungam noqg lvgab naato, hoo At Swg tumanam abiam la dengkynam mam nam kaakin gvnka.”

²¹‍Hvbmabde Ittai lvpw atam birwqnum, “At Sw swwl doody deedib, hoo ngoqg bir lvpw at swwl doody deedib, hoglo noqg bir lvpw at dootayin, sijaqkam ho torjaqkam, hoqho noqg nyerangv doomin gvtayin.”

²²‍Hoo Debid Ittainvn benum, “Hvb panyiloqkam wto.” Hoqgab Gittwg Ittai mwwg nyi mwlw ngvla mwwg lvgab dooba ko anyo mwlwngv wmin gvnum.

²³‍Hoo nyiilungv hvb wikam gvdag nyiilungv vcjaqb xabnum, hoo lvpw atv Kidron kucwngam rabknum, hoo nyiilu mwlwngv diixa-rarab wknum.

²⁴‍Hoo Abiyatar caanum, hoo kaato, Pwnbog pvvb uddum mam joolayil, Jadok Lebi nyi mwlw lvgab haanum. Hoo nyiilungv bopam hoqgv lingyum maady deedib, bulv Pwnbog pvvb uddum mam joop tvl doonum.

²⁵‍Hoo lvpw atv Jadoknvn benum, “Pwnbog pvvb uddum mam bopam urab joa gvnku. At Swg vnyiqho ngam kvvlwq baloqkam, mwv ngam lokta bookur tayin hoo ngam lokta soq sam la mwwg doogw nyookam kaapa mvi nvpv.

²⁶‍Hvbmabde mwv ngam nam ngo hemp ma hvl bebnyiloqkam,’ kaato, ngo si doodwn, hoggv mwwg gab al kaapa dvn ham ngam nyin to.”

²⁷‍Lvpw atv nyub Jadoknvn hvl kam benum, “No nyiilo bo nyub maai yv? Noqg ko tuup Ahimaaj, hoo Abiyatarwg ko tuup Jonatan vnyig lvgab Bopamb swrsob wkur nuku.

²⁸‍Kaato, pobu kvtinwg diixa-rara alo noqg hoqgv ngam gomcwrv haama deedib ngo kaaya yaal dootayin.

²⁹‍Hoqgab Jadok la Abiyatar Pwnbog pvvb uddum mam Jerusalemb jookur kunum, hoo bulv hoqho dooknum.

³⁰‍Hvbmabde Debid mwv lvpia asarv hoo mwwg dumpongam putum tvl mwv xabjo nv Olib Puutu aob caanum. Hoo mwwg lvgab wba bo nyiilungv bulug dumpongam putum tvl, hoo bulv xabjo ywwl caanum.

³¹‍Hoo hoqham Debidnvn betamnum, “Ahitopel Absolom gv lvgab hima bwwmin gvnbo akv.” Hoo Debid benum, “Oa, At Swa, Ahitopelwg tomswr-honynamv paca gob ya nyikub mvto.”

³²‍Pwnboam xumk nyookho, hwdlo Debid xumtab hoodu yukho, kaato, Arkit hoqg Husai mwwg kamtv puc-pui tvl hoo mwwg dumpo ho kac-tanyiaq tvl mwam kvvrwqtab haanum.

³³‍Debid mwam benum, “No ngoqg lvgab wba baloqkam, no ngam vdwq-ak gob nyita yi.

³⁴‍Hvbmabde no bopamb wkurl hoo Absolomnvn beta, ‘Lvpw ata, ngo noqg nyerangv; otuqho noqg abwg nyerab ngo swwnum, ho sija ngo noqg nyerab swwtayin,’ ho no ngoqgab Ahitopelwg tomswr-honynamv mviya tayin.

³⁵‍Nyub Jadok la Abiyatar noqg lvgab dooba maai yv? Hoqgab lvpw atwg nam hoqgv hoggv xeq no tapa tayin ham nyub Jadok la Abiyatar bunyiam betam ta.

³⁶‍Kaato, bulug ko tuup vnyiv bulug lvgab doodwn, Ahimaaj, Jadokg ko tuupv, hoo Jonatan, Abiyatarwg ko tuupv, hoo bulug lvgab noqg hog mwlw tapanam mam ngam pui kanam ta.”

³⁷‍Hoqgab Husai Debidg ajin ak hv bopam urab haanum, hoq moodho Absolom Jerusalem urab hoodul doonum.