Read Nyishi 2 SAMUYEL 17 Bible Online

2 SAMUYEL 17 - Nyishi bible

2 SAMUYEL 17

¹Hoq aoho, Ahitopel Absolomnvn benum, “Ngam nyi loq cam leq vnyi lwwyw go xuqlin mvtbv, hoo ngo wgdvl hoo soi Debidnvn ruqmin gvta deen.

²‍Hwdlo mwv agartvl hoo hang hopaqtvl dooikam ngo mwwg dookho haatayin, hoo mwam bos dvb mvtayin, hoo mwwg lvgab dooba bo nyiilu mwlwngv keleq tayin. Ngo lvpw at aro ham patab tayin,

³‍hoo nyemv mwnwg nyol nammwb haanam hvb nyiilu mwlwngam ngo bookurl boatayin. No nyi akinwg swwgam meegaq do, hoo nyiilu mwlwngv swrso yin pv.”

⁴‍Hoo Absolom gvla Israel nyiixa tulug vnyiq kaagaho tomswrnam si al kaapanum.

⁵‍Ho Absolom benum, “Arkit hoqg Husai nvkam goqa to, hoo ngulv taka tuj mwv soq pagoq so hog hvl bedwn.”

⁶‍Hoo hwdlo Husai Absolom dookho haaikam, Absolom mwam benum, “Ahitopel soq sib agam goopa; ngulv mwwg benam hvb nyib yv? Kvtaq maaloqkam, no beka to.”

⁷‍Ho Husai Absolomnvn benum, “Soq mood so Ahitopel tomswr-honynamv alma.”

⁸‍Husai benum, “Noqg ab la mwwg nyi tulungv atorbo nyiingv, hoo sutum annv mwnwg kongam nyoro lo naalil kegnam hvb bulv ator loodab nyob padwn. Hoq lvg-lvgab, noqg abv nyob pvx looda bov; mwv ai yubg kam nyiilu lvgab doonyi ram.

⁹‍Kaato, sija kam mwv atv ung golo maalo nyook asaq golo dood nvpv. Hoo hwdlo nyiilungam nyob pat-palwl paiyikam, hiyv xeq ham tapa bov betayin, ‘Absolomnvn wmin gvnbo nyiilug pengko lo mengmin sun kuba.’

¹⁰‍Ho mwlwngam haakam yaan bov hiyvg hangv sony nyot akwg hang hvb baqn bov kam bosil jiqpaq tayin, hoggab Israel mwlwngv cengdo noqg abv atorbo nyiingv, hoo mwwg lvgab dooba bo nyi tulu hvvkam atorl haakam bo nyiingv.

¹¹‍Hvbmabde ngo hvl tomswr-hony dvn sa-svlog xuqx hvb, Israel nyi mwlwngam Dan hoqgv Beerseba namgub rvkil daqg mvto, hoo no atv jaq apongv nyob patab wto.

¹²‍Hoqgab ngulv mwam meepa deek nyook tuugin ho mwam ngulv meegaq taab haatayin, gumsiv kedho dil kalam ngulv mwam wm tolwq tayin, hoo mwam la mwwg lvgab dooba boam akkam peqlin-peqa mvmab mengtayin.

¹³‍Mwv bopam urab kilwq baloqkam, ho Israel nyi mwlwngv oso bwa layil bopam mam oso hoqlwqtvl, hoo ngulv ham wlw pwgkam kaapa maadwb lywpa urab namgub seea tayin.”

¹⁴‍Hoo Absolom la Israel nyi mwlwngv benum, “Arkitwg Husai tomswr-honynam si Ahitopel gam alyado.” Hoggab At Sw xuqbwq paku Ahitopelwg tomswr-honynam si nyob paiya mvdwb tomswr-hony do, hoqgab At Sw Absolomnvn hog nyim mvma dvb soq sam bekin pa.

¹⁵‍Ho Husai nyub Jadok nvla Abiyatarnvn benum, “Soq sib Ahitopel Absolom nvla Israelwg nyiixa tulungam tomswr-honynum, hoo soq sib ngo tomswr-hony pakun.

¹⁶‍Hoqgab sija nyebia jaqb nyi kanam tvl hoo Debidnvn betam mvto, ‘Soi hoggub nyijaqkam deexa-rara pobu sugurho dooma bvk hvl betam mvto, hvbmabde hoggub nyijaqkam pobungam rabtwk hvl betamto, hvbmab nyiloqkam lvpw atv la nyiilu mwlwngv mwam dvmeq tayi.’”

¹⁷‍Ho Jonatan la Ahimaaj En-rogel ho kaaya yaal doonum. Paqn ak wlayil bulam betam keenum, hoo bulv wlayil hoo lvpw at Debidnvn betam dvb nyinam, hoggab bulug bopam urab haanam mam nyi kaapa mvmab wdwb nyinum.

¹⁸‍Hvbmabde yaapa ak bulam kaapanum hoo Absolomnvn betamnum. Ho vnyiv nyebia jaqb wleq kunum hoo Bahurim ho nyi ak nam uraho doodu ko baagwb haanum. Hoo bulv ura jaqb haanum.

¹⁹‍Hoo nyem akv ung gambam anya jaqb piucwngv piutum tvl am mam hoqho yaqp tvl ham hingky jaqb mwrs-mwrtwr tvl apnum, hoo ham akkam cengmanum.

²⁰‍Hwdlo Absolom gv nyera tulungv nyem akwg namho haanv, bulv benum, “Hogloq Ahimaaj la Jonatan?” Hoo nyem akv bulam benum, “Bulv pobu kucw kvtinb rabnwn.” Hoo bulv meegaqnum hoo bulam meepa maanum, bulv Jerusalemb wkur kunum.

²¹‍Bulv wxo kokw so nyi vnyiv ung hoqgv lengknum, hoo lvpw at Debid dookub wknv betamnum. Bulv Debidnvn benum, “Gorabto, nyebia jaqb pobu kvtinb rabto, hoggab Ahitopel nam nyob pam dvb tomswr-hony paku.”

²²‍Ho Debid la mwwg lvgab wba bo nyiilu mwlwngv gorabnum, hoo bulv Jordon pobungam rabknum. Ar huto namgub Jordon pobungam rama bo nyi akkam dook maanum.

²³‍Hwdlo Ahitopel mwwg tomswr-honynam mam tama yin, mwwg svdamho mwv cao nv hoo mwwg atwg bopam nammwb wnum. Mwwg nammam mwv dengky jaqb mucum-mvp pel hoo mwv atv pvqswrl sinum, hoo mwv siknum hoo mwwg abwg nyubu ho mwam liiknum.

²⁴‍Ho Debid Mahanaim ho haanum. Hoo Absolom la mwwg lvgab Israel nyi mwlwngv Jordon pobungam rabknum.

²⁵‍Absolom Joabnvn tuugabnam mam apaq pel Amasanvn ya sipai tulungam gaml jitwl tuugab mvnum. Amasa Itra gv ko tuup Ismaiyel nyob hoolungv, hiyv Nahaswg nyem ko Abigalnvn nyem naanum, Joabg ann, Jeruiyag bwrmv.

²⁶‍Hoo Israel rvla Absolom Gilead gvdaho svmcw mvl doonum.

²⁷‍Hwdlo Debid Mahanaim ho haai yikho, Ammon nyi tulug Rabba hoqgv Nahaswg ko tuup Sobi, hoo Lo-debar hoqgv Ammielwg ko tuup Makir, hoo Rogelim hoqgv Gilead nyi tulug Barjillai,

²⁸‍kartam nannam, peekaram, deekam pwcwngam, wtw am mam, tanyeqkam, wtw xunam mam, am ramknam mam, peerinam hoo xaqyangam,

²⁹‍ngolangam hoo doxingam hoo sviya ngamla oxam, Debid gab la mwwg lvgab wba bo tulungam dvm dvb baqa jinum, hoggab bulv benum, “Deexa-raraho nyiilungv kano hvngwrl hoo nyelin paku.”