Read Nyishi 2 SAMUYEL 18 Bible Online

2 SAMUYEL 18 - Nyishi bible

2 SAMUYEL 18

¹Ho Debid mwwg lvgab dooba bo nyi mwlwngam dvpar-dvpar gob mvnum hoo lwwyw aoho nyigbo saab ak hoo lwwg aoho nyigbo saab mvl apnum.

²‍Hoo Debid sipai tulungam joqum gob rool kanamnum, dvpar gon Joabg nyigko saab uraho, dvpar gon Jeruiyag ko tuup Abisaiywg nyigko saab uraho, hoo dvpar gon Gittwg Ittai nyigko saab uraho kanamnum. Hoo lvpw atv bulam benum, “Ngo atv kam nulug lvgab wmin gvtayin.”

³‍Hvbmabde nyi tulungv benum, “No wlin maabv. Hoggab ngulv kebaloqkam, bulv ngulam haajaqb hvvmin ram. Ngulv papo gon sijaqkam bulv ngulam haajaqb hvvmin ram. Hvbmabde no ngulug lwwyw cam kam xibin yaanamv. Hoqgab no bopam so dootwl ngulam svkangam kanamnamv alyado.”

⁴‍Lvpw atv bulam benum, “Hoggv xeq nulgab al kaapa dvn ngo ham nyitayin. Ho hwdlo sipai tulungv lwwg gogaqb hoo lwwyw gogaqb sool wiyikho, lvpw atv toggoq bviywrho daqnum.

⁵‍Hoo lvpw atv Joab hoo Abisai hoo Ittainvn gaml jinum, “Yaapa Absolomnvn ngoqgab mwwgdvl un-tar mvg maabka.” Hoo hwdlo lvpw atv nyigbo saab tulungam Absolom pagoq gab gaml jiyik ho nyiilu mwlwngv tapanum.

⁶‍Hoqgab Sipai tulungv Israelam ceekol nyob patab nyoro bvbinb lengl wnum, hoo Iprayim nyoro ho nyobam panum.

⁷‍Hoo Israelwg nyi tulungam Debidg nyera tulungv paiyanum, hoo hoq aalho vc loodab yuupaq-caapaq namgub nyinum, lwwyw camnyi go nyiingam mengnum.

⁸‍Nyob panamv gvda mwlw ho pvmw kunum, hoo hoq aalho nyiilug lyoqr orioq mengnam mam koi yaab nyoro ya ho siknum.

⁹‍Hoo Absolom haqmapaq golo Debidg nyera tulungam wrwqnum. Absolom svdam ao golo wnum, hoo svdamv terebin svvn nwwtaqg haqb kan twdwqko nyoro roodw urab wnum, hoo mwwg dumpongam kora svvn haqb ho haqxeqnum, hoo mwv doa gvla swcwg pengko ho boobiq biql doonum, hvbmabde mwwg wnam svdamv mwam boiyol doom peel wleqnum.

¹⁰‍Hoo nyi ak ham kaapa peel hoo Joabnvn betamnum, “Kaato, ngo Absolomnvn kora svvn ho paqyinl doodwb kaapa peen.”

¹¹‍Joab mwam betam bo nyi akam benum, “Hoggv lv, no mwam kaapa peen lv! No hog nyitwl mwam kedho pageq lomanum? Ngo nam hempwl rup tvqyw gola soruq ak jib nvpv.”

¹²‍Hvbmabde nyi ak hv Joabnvn benum, “Ngoqg alaq so rup vjwrv lwwyw gob vgw dvb jis jaqkam, ngoqg alaqkv lvpw atwg ko tuupam ngo idaqram, hoggab ngulug tapa dvb lvpw atv nam la Abisainvn hoo Ittainvn gaml jinum, ‘Ngoqgab mwwg dvl yaapa Absolomnvn roa tvk hvl benum.’

¹³‍Gamgwn si hvbnyiloqkam, ngo mwwg swwgam ceekol mengc-mengyal meng nyiloqkam (hoo lvpw atwg hoqgv hog akkam kvs ko dooram), ho no jijaqkam atv aado ho daqgin ban pv.”

¹⁴‍Joab benum, “Noqg lvgab soq sib mood-mooma bepaqram.” Hoo mwwg alaqho nwwxo soum go mwv naanum hoo hwdlo mwv hvraqb kora svvn ho torl dooxiq yin soum-soum mam Absolom gv hang ho cilwqnum.

¹⁵‍Hoo yaapa wyw, Joabg nwwxo-svtam mam baqya bo tuluhv Absolomnvn doqyumnum hoo mwam pageqnum hoo mwam mengnum.

¹⁶‍Ho Joab tuuliam miqnum, hoo sipai acamv Israelam ruqmin gvpe kul hookur kunum, hoggab Joab bulam ruqmin gvk maanum.

¹⁷‍Hoo bulv Absolomnvn naanum hoo mwam nyoro uraho ung ut jaqn bo ho joolwqnum hoo koi jaqb wlw cuudin dvb poolupnum. Hoo Israel mwlwngv mwwg at-at nammwb nyiicwr-cwrxiv keknum.

¹⁸‍Absolom mwwg swwl dood moodho mwv atv Lvpw atwg Lywpa ho wlw soogw ak diipnum, hoo mwv benum, “Ngoqg eminam mwwpa mvky dvb ngo ko tuup dook ma.” Mwv soogw ham mwwg at eminb mingnum, hoo hoqham soq aal namgub Absolom gv soogwngv hvl goqdwn.

¹⁹‍Ho Jadokg ko tuup Ahimaaj benum, “Ngo lvpw atam xarg dvl puiyam betam taden, At Sw mwam mwwg ceebio tulug alaq hoqgv naalin paku.”

²⁰‍Hoo Joab mwam benum, “Soolo no puiyam baqmabv. Aal loosaq golo no puiyam baqto, hvbmabde soolo no puiyam baqmabv, hoggab lvpw atwg ko tuupv sin kuba.”

²¹‍Ho Joab Kus nyi ak ham benum, “Hoggv nulv kaapa kun ham wgdvl lvpw atam betam ta.” Kus nyi ak hv Joabg agaho dumpo pvxw peel hoo xarnum.

²²‍Ho Jadokg ko tuup Ahimaaj Joabnvn lokta benum, “Hog nyidy maak, ngam kam Kus nyi kokwb xarm gvm tvb.” Hoo Joab benum, “Ngoqg ko, hoggub no xartayin, kaato soq pui baqjo gab no hog lvqc kaapa ram?”

²³‍Mwv benum, “Hoggv haajaqkam, “Ngo xardeen.” Ho mwam mwv benum, “Xarn.” Ho Ahimaaj haapa lamtab xarnum hoo Kus nyi ak ham xaryanum.

²⁴‍Debid toggoq goqnyig pengko ho doodunum, hoo rvkybo nyiingv toggoqg gurum aob geecanum, hoo hwdlo mwwg vnyiqkv nywrabl kaaikam kaato mwv nyi vp-cwkwb xardunam mam kaapanum.

²⁵‍Rvkybo nyi ak hv lvpw atam goqnv betamnum. Hoo lvpw atv benum, “Mwv vp-cwkw dvnyi loqkam, mwwg agam ho puiyam baqa yin pv.” Hoo mwv ogum-ogumb yaiyab hvvnwq kunum.

²⁶‍Rvky bov nyi asaq akta xardunam mam kaapanum. Hoo rvky bov toggoqkam goql hoo benum, “Kaato, nyi asaq akta vp-cwkwb xardu do!” Lvpw atv benum, “Mwv kam puiyam baqa yin pv.”

²⁷‍Rvkybo nyi ak hv benum, “Otuqb xarco bo ak hv Jadokg ko tuup Ahimaaj hvbjaq nyido.” Hoo lvpw atv benum, “Mwv albo nyiingv hoo tugu pui lvgab hoodu dvn pv.”

²⁸‍Ho Ahimaaj sogoql lvpw atam xabnum, “Hog mwlwngv aldo.” Hoo lvpw atwg agaho mwwg nyuqm mam kedho pvxw nv hoo benum, “Noqg Pwnbo At Sw xinam jaqkv, ngoqg bir lvpw atam ceeko bo nyi akam mviya paku.”

²⁹‍Hoo lvpw atv benum, “Yaapa Absolom al deen yv?” Ahimaaj birwqnum, “Hwdlo lvpw atwg nyera Joab ngam kanam yukho, noqg nyerangv ngo koi jaqb hur-matab namgo kaapa peen, hvbmabde hoqhv hoggv yu ham ngo cengma.”

³⁰‍Hoo lvpw atv benum, “Bviywrho daqyeq gvdwl hoqho daqto.” Ho mwv bviywrho daqyeql hoqho doqdunum.

³¹‍Hoo kaato, Kus nyi ak hv haanum, “Ngoqg bir lvpw atgab tugu puiyv! Hoggab At Sw soq aal so nam ceekol daqrab bo mwlwg alaq hoqgv nam naalin paku.”

³²‍Lvpw atv Kus nyiam benum, “Yaapa Absolom al deen yv?” Hoo Kus nyi ak hv birwqnum, “Ngoqg bir lvpw atwg ceebio tulungam hoo hiyv nam ceekol daqrab bo mwlwngam hoq yaapa akam almab nyinam hvb nyim to.”

³³‍Hoo lvpw atv vc loodab hvvdwqnum hoo pwqlw cwwrwg toggoqho caalayil vcjaqb xabnum. Hoo mwv wjo ywwtwl, mwv benum, “Oa ngoqg ko tuup Absoloma, ngoqg ko tuup, ngoqg ko tuup Absoloma! Ngo noqg kwlib sinyi loqkam al tvba, Oa Absoloma, ngoqg ko tuup, ngoqg ko tuupa!”