Read Nyishi 2 SAMUYEL 19 Bible Online

2 SAMUYEL 19 - Nyishi bible

2 SAMUYEL 19

¹Hoqham Joabnvn betamnum, “Kaato, lvpw atv xabl hoo Absolom gab nyix-riidu do.”

²‍Ho mviyanam aalv nyiilu gab nyix-riinam gob ya nyikubnum, hoggab hoq aalho nyiilungv tapanum, “Lvpw atv mwwg ko tuup gab hvvdwq dwql doonum.”

³‍Hoo nyiilungv hoq aalho bopam urab dvco bo nyiilungv jinga namhvb hoo nyob pak hoqgv paiya kotwl hvnyw layil keanam hvb haanum.

⁴‍Lvpw atv mwwg nyuqm mam pulupnum, hoo lvpw atv vcjaqb sogoql xabnum, “Oa, ngoqg ko tuup Absoloma, Oa Absoloma, ngoqg ko tuupa, ngoqg ko tuupa!”

⁵‍Ho Joab lvpw atwg nam urab haanum hoo benum, “Hiyv soq aal namgub noqg ko tuup tulug swwgam hoo noqg nyem ko tulug swwgam hoo noqg nywxw tulug swwgam hoo noqg xwwbaq nywxw tulug swwgam ywwlin boam, soolo noqg nyera tulug nyuqm mam no hvnyw lvgab pulup paku,

⁶‍hoggab hiyv nam oyum boam no aby paku hoo hiyv nam aby boam no oyum paku. Hoggab soolo pwbw paku sipai saab tulungv hoo nyera tulungv noqgab hog hvvtw kuma nyi, hoggab soolo ngo cengpa ku Absolom swwl dootwl hoo ngul mwlwngv sinyi loqkam, ho no vigo hemp dvde.

⁷‍Hoqgab sija gorabto, wgdvl noqg nyera tulungam anya agam mam gooto, hoggab ngo At Swg eminho dingdwn, no hvb nyima baloqkam soi noqg lvgab nyi akin gokam doomin gvkram, hoo hoqhv noqg yaapa swwca yuk hoqgv sija namgub mwlwngam alyama bo alman gob nyitayin.”

⁸‍Ho lvpw atv gorabnum hoo toggoqho mwv doonum. Hoo nyiilu mwlwngam betamnum, “Kaato, lvpw atv toggoqho doodu do.” Hoo nyiilu mwlwngv lvpw atwg agaho haanum. Israelwg nyiicwr-cwrxiv mwwg atwg nammwb keknum.

⁹‍Hoo Israelwg nyob nyiilu mwlwngv yolu paiyaq minsul begamv, “Lvpw atv ngulam ngulug ceebio tulug alaq hoqgv hoo Palistan nyi tulug alaq hoqgv ywwlinum, hoo mwv Absolomnvn keleqdvb gvda soqgv kelin kunum.

¹⁰‍Hvbmabde Absolomnvn, hiyam ngulv xuqlinum akv nyob pakho sin kuba. Hoqgab sija nulv hog nyitwl lvpw atam boal bookur dukub hog bema dvn i?”

¹¹‍Hoo hwdlo Israelwg gomcwr tuluhv lvpw atwg dookho hvvc yin, Lvpw at Debid soq pui sam nyub Jadok nvla Abiyatarnvn kanamnum, “Judag nyiixa tulungam beto, ‘Hoggub yu nulv lvpw atam mwwg namho bookur dvb dugub pakun?

¹²‍Nulv ngoqg vbw-borv; nulv ngoqg loobungv hoo ngoqg soodinv. Hoggub yu nulv lvpw atam bookur dukub dugub pakun?’

¹³‍Hoo Amasanvn beto, ‘No ngoqg loobu maai yv hoo ngoqg soodin maai yv? Joab kwlib ngo nam sipai saab gob mvma baloqkam, Pwnbov ngoqg aoso almab nyito hoo sid bvkam mvto.’”

¹⁴‍Hoo mwwg agam goonamv Juda nyi tulug hangam tvlwq dvb mvneqnum, ho bulv lvpw atam gomcwr bilwqnum, “No la noqg nyera tulu mwlwngv hookur tuku.”

¹⁵‍Hoqgab lvpw atv Jordon ho hookur kunum, hoo Judangv Gilgal ho lvpw atam wrwqtab haanum hoo lvpw atam Jordon ho rabg kunum.

¹⁶‍Hoo Benjamin nyob hoqg Gerag ko tuup Simei Bahurim hoqgv Juda nyi tulu lvgab Lvpw at Debidnvn kvvrwqtab nyebia jaqb innum.

¹⁷‍Hoo mwwg lvgab Benjamin nyiingv lwwyw go haanum. Hoo Soulwg nam hoqg nyera Jiba mwwg ko tuup cam leq ang ngam la mwwg nyera tulu camnyiam boolayil lvpw atwg otuqb Jordon ho nyebia jaqb innum,

¹⁸‍hoo bulv pobu ho lvpw atwg nombungam boorab dvb la mwam hemp dvb nyidwb haal dooiyanum. Hoo lvpw atv hwdlo mwv Jordonam rabsv twqb nyiyikho, Gerag ko tuup Simei lvpw atwg agaho geqpnum,

¹⁹‍hoo lvpw atam benum, “Ngoqg bir ata ngoqg nyimuram mwwg gab mabka ho ngoqg bir lvpw at Jerusalem mam wleq yuk aal so noqg nyerag nyimur kunam mam mwwpa jijaq mabka. Lvpw ata hoqham noqg hang ho pvvma bvka.

²⁰‍Hoggab noqg nyerangv cengdo ngo nyic nyit kuba. Hoqgab, kaato, ngo soq aal so haaikun, Josapg nombu hoqgv mwlwg otuqcob ngoqg bir lvpw atam kvvrwqtab iyin.”

²¹‍Jeruiyag ko tuup Abisai birwqnum, “At Swg xuqlinam akam been boam, Simeinvn mengdwb nyima dvn yv?”

²²‍Hvbmabde Debid benum, “Jeruiyag ko tuup hoggv ngo nulug lvgab nyisv doodwn, ho soq aal so ngam vs-axaqkam haam dvb nyita dvn i? Soq aal so Israel ho nyi mengdwb nyid yv? Hoggab soq aal so ngo Israelwg aoho lvpw at gob nyid kul hvl ngo cengma dvn yv?”

²³‍Hoo lvpw atv Simeinvn benum, “No siram.” Hoo lvpw atv mwam dingrnum.

²⁴‍Hoo Mepiboset Soulwg ko tuupv lvpw atam kvvrwqtab innum. Hwdlo lvpw atv wleq yuk hoqgv mwv swrsob hookurnam aal godab, mwv mwwg lvpiangam hvvmin kumanum ho mwwg nvm mamkam samanum ho mwwg vjam kam niixaq kumanum.

²⁵‍Hoo hwdlo mwv Jerusalemho lvpw atam kvvrwqtab haai yikho, lvpw atv mwam benum, “Mepiboset, hog nyitwl no ngoqg lvgab wmin gvmanum?”

²⁶‍Mwv birwqnum, “Ngoqg bir lvpw ata, ngoqg nyerangv ngam vm mvvpaqnum, hoggab noqg nyerangv mwam benum, ‘Ngam svdam golo jooca tvb ho ngo atv wgdvl hoo lvpw atwg lvgab wtayin hvnum.’ Hoggab noqg nyerangv lukum pa.

²⁷‍Mwv noqg nyerangam ngoqg bir lvpw atam bec-beyal vm mvvpaqnum. Hvbmabde ngoqg bir lvpw atv Pwnbog gumtw hvb nyidwn; hoqgab hoggv noqgab al kaapa dvn ham ngam nyito.

²⁸‍Hoggab ngoqg abwg nombu buupwngv ngoqg bir lvpw atwg agaho sidwb nyinbo dvparv, hvbmabde noqg nyerangam noqg tebol dvnbo pengko ho no ngam dvba bo ak gob mvnum. Hoq aoho hoggv ngo nam nyit bvk sija, lvpw atam xabtayin?”

²⁹‍Hoo lvpw atv mwam benum, “Hoggub noqg pagoqkam no vi jaqg agam goodwn? Ngo mwwbwq pakun: no la Jiba nunyi kedam mvpin baas to.”

³⁰‍Hoo Mepiboset lvpw atam benum, “Kv, mwam mwlwngam naam to, hoggab ngoqg bir lvpw at swrsob nammwb hookur paku.”

³¹‍Gilead nyi Barjillai Rogelim hoqgv innum hoo mwv lvpw atwg lvgab Jordon namgub wmin gvnum, ho mwam Jordonam wo gvnum.

³²‍Barjillai nyekam konguq bo akv, mwv vnyw cam piin kunum. Hwdlo lvpw atv Mahanaim ho dooyikho, mwv mwam dvs-twws jinum, hoggab mwv koiyib nyetbo nyiib nyinum.

³³‍Hoo lvpw atv Barjillainvn benum, “Ngoqg lvgab haamin gvto, hoo ngo nam Jerusalemho kvvyw-tada tayin.”

³⁴‍Hvbmabde Barjillai lvpw atam benum, “Hog hwd vnyw go ngo swwsv dootwl, ho ngo lvpw atwg lvgab Jerusalem caamin gvdwb nyidwn?

³⁵‍Soq aal so ngo vnyw cam piin dukun. Hoggv hempv hoo hoggv hemp maanv ham ngo cenglaq yin yv? Hoggv mwv dvdwn ho hoggv mwv twwdwn noqg nyerangv ham dvka twwka yin yv? Sija kam ngo dvn-tuup tulug bemin benam mam tvxiq kin yv? Hoggub noqg nyerangv ngoqg bir lvpw atam vs-axaq vgw dvb mvtayin?

³⁶‍Noqg nyerangv lvpw atwg lvgab meeg Jordon lamta namgub wtayin. Hoggub yu lvpw atv ngam swd jaqgo lvqcam jilwq tayin?

³⁷‍Anya mwwpa tvb noqg nyerangv wkur deekun, ho ngoqg ann-ab nyung nyubu ogumho ngoqg atwg bopam ho ngo sitayin. Hvbmabde soq si noqg nyera Kimham. Mwam ngoqg bir lvpw atwg lvgab wmin gvm tvb, hoo hoggv xeq no al kaapa dvn ham mwam nyij taab.”

³⁸‍Hoo lvpw atv birwqnum, “Kimhamnvn ngoqg lvgab wmin gvm to, hoo hoggv xeq noqgab al dvn ham ngo mwam nyij tayin, hoo ngoqg galoqkv noqg mwwbynam mwlwngam ngo mwam nyij tayin.”

³⁹‍Ho nyiilu mwlwngv Jordonam rabknum, hoo lvpw atv kam rabknum. Hoo lvpw atv Barjillainvn moopupnum hoo mwam lvqcnum, hoo mwwg atwg nammwb mwv wkur kunum.

⁴⁰‍Lvpw atv Gilgal namgub wnum, hoo Kimham mwwg lvgab wmin gvnum. Juda nyiilu mwlwngv hoo Israelwg nyiilu papo gon lvpw atam mwwg lamtab boolwqnum.

⁴¹‍Ho Israelwg nyi mwlwngv lvpw at dookub haanum hoo lvpw atam benum, “Hoggub ngulug vbw-bor tulu Judangv nam dvcol baql wleq gvnum hoo lvpw atam la mwwg imiq dvparam, hoo Debid lvgab nyi dooba bo tulungam Jordon kvtinb baqrabnum?”

⁴²‍Juda nyi tulungv Israel nyi tulungam birwqnum, “Hoggab lvpw atv ngulug imiq lwkwngv. Hoggub nulv soq pagoq gab hang lengdwn? Ngulv lvpw at hoqgv hog bwqm-yaqm dvb dvp-twwp yv? Ho mwv ngulam hog lvqc cipa yv?”

⁴³‍Hoo Israel nyi tulungv Juda nyi tulungam birwqnum, “Lvpw at ho ngulv wyw go naasam pvvl ap pan, hoo Debid nvkam ngulv nulam koi yaab naadwb nyidwn. Hoggub nulv ngulam vm mvvpaq pan? Lvpw atam bookur dukub ngulv otuqcob agam gooma bov yv?” Hvbmabde Israel nyi tulug agam goonam mam Juda nyi tulug gomcwr goonam tuluhv jarpeq-jaryeq yaadwb benum.