Read Nyishi 2 SAMUYEL 2 Bible Online

2 SAMUYEL 2 - Nyishi bible

2 SAMUYEL 2

¹Soq kokw so Debid At Swn toxnum, “Judag bopam tuluho ngo caadwb mwwdo? Hoo At Sw mwam benum, “Caan.” Debid benum, “Hogloq bopam ak ho ngo caadwb nyido?” Hoo mwv benum, “Hebron ho.”

²‍Hoqgab Debid la mwwg nywxw Jejreelwg Ahinoam la Karmelwg Nabalwg xwwmy Abigail vnyiv kam hoqb caamin gvnum.

³‍Hoo Debid la mwwg lvgab dooba bo nyi mwlwngam hoo mwwg imiq dvpar hoqg nyiicwr-cwrxiam caagnum, hoo bulv Hebron pamda tuluho doonum.

⁴‍Hoo Judag nyi tulungv haanum, hoo bulv Debidnvn Judag nombu ho lvpw at gob xuqlinum. Ho bulv Debidnvn benum, “Jabes-gilead nyi tulungv Soulnvn liinum,”

⁵‍Debid pui baqn boam Jabes-gilead nyi tulu dookub kanaml hoo bulam benum, “At Sw nulam lvqc cignvka, hoggab nulug nyiit at Soulnvn nulug modunam mam kaakin kunv hoo mwam liipa ku.

⁶‍Hoqgab At Sw nulam mwwg tumanam abiam la dengkynam mam kaakin gvnka. Hoo ngo nulam alboam nyij tayin hoggab nulv soq sam nyipa ku.

⁷‍Hoqgab sija nulug alaqkv atorto, hoo haakam to, hoggab nulug nyiit atv sin kuba, hoo Judag nombungv ngam bulug lvpw at gob xuqlin paku.”

⁸‍Hvbmabde Soulwg sipai saab Nerwg ko tuup Abner, Soulwg ko tuup Is-bosetnvn boolayil mwam Mahanaim ho boorabnum,

⁹‍hoo mwam Gilead la Asur hoo Jejreel la Iprayim hoo Benjamin la Israel gvda mwlw gab lvpw at gob mvknum.

¹⁰‍Soulwg ko tuup Is-boset vnyw campy kunum hwdlo mwv Israelam pvvb bwwl doog dvb swwrab yukho, hoo mwv vnyw nywnyi gob swwl doognum. Hvbmabde Judag nombungv Debidnvn nyimin gvnum.

¹¹‍Hoo Debid Hebron ho dootwl Judag nombungam lvpw atwb swwl doognam moodv vnyw kvn gola pool barx go nyinum.

¹²‍Nerwg ko tuup Abner la Soulwg ko tuup Is-boset nyera tulungv Mahanaim hoqgv Gibeon ho wnum.

¹³‍Hoo Jeruiyag ko tuup Joab la Debidg nyera tulungv wnv Gibeon sviyin ho wrwqnum. Hoo bulv doonum, dvpar gonhv sviyin kvtin gon ho hoo dvpar gonhv sviyin taqgwn ho doonum.

¹⁴‍Hoo Abner Joabnvn benum, “Yaapa tulungam gorab gvdwl ngulug aga so mvka mins mvto.” Hoo Joab benum, “Bulam gorab mvto.”

¹⁵‍Ho bulv gorabnum hoo homyin dvb nyiingv xuqlinum, Benjamin nyob hoqgv Soulwg ko tuup Is-boset hoqgv cam leq vnyi go, hoo Debid nyera tulu hoqgv cam leq vnyi go xuqlinum.

¹⁶‍Hoo nyiicwr-cwrxiv mwam mwrwqbo nyi dumpongam gvbw tvl mwwg lyoqr orioq lvgab mwam mwrwq boam nwqlwqnum, ho bulv lvkin gob tabtonum. Hoqgab hoq nyook ham Helkat-hajjurim hvl eminum, hoqhv Gibeon ho doodwn.

¹⁷‍Hoo hoq aalho vc looda bos dvb nyob pamin sunum. Hoo Abner la Israel nyi tulungam Debidg nyera tulungv mviyanum.

¹⁸‍Hoo Jeruiyag ko tuup oum hoqg eminv, Joab, Abisai, hoo Asael. Asael sudum xarnam looda hvb nyebia jaqb xarn bov.

¹⁹‍Hoo Asael Abnernvn ruqmin gvnum, hoo mwv laqc-lvqbwqb wwm maab Abnernvn ruqtw kwlwl ruqmin gvnum.

²⁰‍Ho Abner mwam kookurnv hoo benum, “Asael, soq si nooi yv?” Hoo mwv birwqnum, “Vv ngo.”

²¹‍Abner mwam benum, “Noqg laqc maalo lvqbwqb yaapa akwn ruqmin gvto hoo mwwg baqnam mam naareqto.” Hvbmabde Asael laqc-lvqbwqb wmab mwam ruqtw kwlwl ruqmin gvnum.

²²‍Hoo Abner lokta Asaelnvn benum, “Ngam ruqmin gvmabv. Hoggub yu ngo nam deela ho patab tayin? Hoggub ngoqg nyuqmv noqg vbw Joabnvn kvvrwq nyotayin?”

²³‍Hvbmabde mwv tamab hvraqb ruqmin gvnum. Hoqgab Abner mwam mwwg nwwxongv kepo ho nwqlwqnum, ho nwwxongv mwwg langk taqc ho xupeq lengnum. Hoo mwv hogloq ho daqnum ho dara tabto kunv hoo siknum. Hoo Asaelwg geqpwl sik nyook ho mwlwngv haalayil doqdunum.

²⁴‍Hvbmabde Joab la Abisai Abnernvn ruqmin gvnum. Hoo doonyiv haasv twqb nyiyikho bulv hvvcnum Ammag diisw ho, hoqhv Gia otuqg Gibeonwg deexa-rarangam haama taab doonum.

²⁵‍Hoo Benjaminwg nyiilungv Abner kokwb lvkin gob hookumnum hoo dvpar akin gob nyitwl bulv yorn akwg aoho daqnum.

²⁶‍Ho Abner Joabnvn goqnum, “Lyoqr orioq lvgab nwrba gob nyob paky bvi yv? Vtwr-anyangv kacaq tayin hvl no cengma dvn yv? Hog hwdgo noqg agaho noqg nyiilungam bulug vbw-boram ruqmin gvma bvk hvl beta yukun?”

²⁷‍Hoo Joab benum, “Pwnbo swwl doody deedib, no agam gooma nyiloqkam, jvqtw jaqb nyi tulungv bulug vbw-bor tulungam aaram namgub ruqngo tvl apaqram.”

²⁸‍Hoqgab Joab tuuliam miqnum, hoo nyi tulungv romonum hoo Israelam ruqmin gvk maanum, ho bulv nyob pak maanum.

²⁹‍hoo Abner la mwwg nyi tulungv ai yupw Arabangam wpeql wknum. Bulv Jordonam rabknum, hoo ar ropw daayob sooknv bulv Mahanaim ho haaknum.

³⁰‍Joab Abnernvn ruqngo peel wkur kunum. Hoo hwdlo mwv nyiilu mwlwngam lvkin gob hookum mvnum, ho Asael lvgab Debidg nyerangv cam leq kiya go niiknum.

³¹‍Hvbmabde Debidg nyera tulungv Benjamin nyob hoqg Abnerwg wgnam mam 360 go mengnum.

³²‍Hoo bulv Asaelnvn naaknum hoo Betleham ho mwwg abwg nyubu ho mwam liiknum. Hoo Joab la mwwg nyi tulungv ai yupw wiyin kunum, hoo bulv Hebron ho hvvc yukun huto kunum.