Read Nyishi 2 SAMUYEL 20 Bible Online

2 SAMUYEL 20 - Nyishi bible

2 SAMUYEL 20

¹Hoqho dooxa bo nyi ak doonum, mwwg eminv Seba, Benjamin nyob hoqg Bikrig ko tuupv. Hoo mwv tuuly miql hoo benum, “Debid ho ngulam hog jibwq sanam dooma, hoo Jesse ko tuup ho ngulv hog otu nvvsiq sanam dooma; Israela, nyiicwr-cwrxiv mwwg tombub wtku!”

²‍Hoqgab Israelwg nyi tulungv Debid hoqgv lengla yukul Bikrig ko tuup Sebanvn wmin gvnum. Hvbmabde Judag nyi tulungv lvpw atam anya jaqb Jordon hoqgv Jerusalem namgub wmin gvnum.

³‍Hoo Debid Jerusalemho mwwg namho haanum. Hoo lvpw atv nammam kaal doog mvdwb apnum xwwbaq nywxw wyw ham naaknum hoo bulam rvkil daqg ko namho doomnum hoo bul gab dvs-twwsam jinum, hvbmabde bulug dookub wmanum. Ho bulug sinam aal xaqb bulam mutum tvl apnum, bulv xwwmy hvb swwl doonum.

⁴‍Ho lvpw atv Amasanvn benum, “Aal loum uraho Juda nyi mwlwngam goqkum to, hoo no kam hoqho doola ka.”

⁵‍Hoqgab Amasa wnv Juda nyi tulungam goqnum, hvbmabde mwam mood jinam ho mwv goqkum nyok maanum.

⁶‍Hoo Debid Abisainvn benum, “Bikrig ko tuup Seba Absolomnvn kam alyamab ngulam nyipa ku. Noqg bir lvpw atwg nyera tulungam naalayil hoo mwam ruqmin gvta, hvbmab nyiloqkam mwv atv gurum nwqtumnam bopam urab haatayi hoo ngulug hoqgv keleq tai.”

⁷‍Hoo bulug lvgab Joabg nyi tulu ngvla Keret nyi tulu ngvla Pelet nyi tulungv, hoo atorl haakam bo nyi mwlwngv wmin gvnum. Bulv Jerusalem hoqgv Bikrig ko tuup Sebanvn ruqmin gvtab wnum.

⁸‍Hwdlo bulv wlw pwt dook Gibeon ho hvvc yin, Amasa bulam kvvrwqtab haanum. Hoq moodho Joab sipai vjam koonum, hoo mwwg hwwpo ho lyoqr orioqkam buqxa ho xwqlwq tvl soruq lvgab kartinum, hoo hwdlo mwv otuqb wikam hoqhv yoqlinum.

⁹‍Hoo Joab Amasanvn benum, “Ngoqg vbw-bor no al sud yv?” Hoo Joab mwwg lvqbwq alaq lvgab Amasag coqyum mam gvbw tvl mwam moopupnum.

¹⁰‍Hvbmabde Joabg alaqho lyoqr orioq bwwnam mam Amasa kaapa maanum. Ho Joab mwam hoq lvgab kepo ho nwqlwql mwwg vx-aiyeqkam kedho yaqs-yaqp dvb nwqnum, ho mwam lwnyi nwqtin kumab hoo mwv siknum. Ho Joab la mwwg vbw-bor Abisai Bikrig ko tuup Sebanvn ruqmin gvnum.

¹¹‍Hoo Joabg yaapa ak Amasag bviywrho daqtwl hoo benum, “Hiyv xeq Joabnvn mwwsw dvn, hoo hiyv xeq Debid gab doodwn, Joabnvn wmin gvto.”

¹²‍Hoo Amasag svmangv ui rooxo tvl lamta paada ho doonum. Hoo hiyv hoqb wpeq bo nyi vxiv mwam kaapa yin, doqnunum. Hoo nyiilu mwlwngv doqnul kaanam mam nyi akv kaapanum, ho mwv Amasag svmangam lamta paada hoqgv nyorob baqpaqnum hoo mwam vj pomlupnum.

¹³‍Hwdlo mwv ham lamta paada hoqgv naapaq yukun, nyiilu mwlwngv Joab kokwb Bikrig ko tuup Sebanvn ruqmin gvtab wnum.

¹⁴‍Hoo Seba Israel nyob mwlwngam wpeq laikul Bet-maaka Abel ho haaknum, hoo Bikrig nyob mwlwngv hookum layil hoo mwam wmin gvnum.

¹⁵‍Hoo Joab lvgab wmin gvnbo nyi mwlwngv bulam Bet-maakag Abel ho nyob pvlwql doqyum kunum. Bulv bopam mam ceekol nwqtumnum, hoo hoqg gurum nwqtumnam mam mvpia dvb mvnum, hoo bulv gurum tabto mvdwb kvnyi jwwnum.

¹⁶‍Ho mwwlaqbo nyem dvn ak bopam hoqgv goqnum, “Tato! Tato! Joabnvn betam to, ‘Soqb mwam haam to, ho ngo mwam agam gootayin.’”

¹⁷‍Hoo mwv mwnwg ogumb hvvnwqnum, hoo nyem dvn hv mwam benum, “No Joab yv?” Mwv birwqnum, “Ngo lak.” Ho mwn mwam benum, “Noqg paqnwg gomcwr sam tato.” Hoo mwv birwqnum, “Ngo tal doodu dvn.”

¹⁸‍Ho mwn benum, “Otuq moodho bulv bekynum, ‘Hvbnyis jaqkam hvbmabde bulam Abel wgdvl tomswr-hony mvka to,’ hoo bulv pagoqkam pvvb mvknum.

¹⁹‍Ngo Israel ho swrso bvla dengky bo akv. Israelwg bopam hoqg annam no mvcaq-mviyaq dvb meekar dvn. Hoggub no At Swg otungam dvmeq tadwn?”

²⁰‍Joab birwqnum, “Ngo dvmeq tanam mam la twrtanam mam, ngoqg hoqgv ham aado mvto, ham aado mvto!

²¹‍Hoq hv jvqtw ma. Hvbmabde Iprayimg diisw gvda hoqgv Bikrig ko tuup Seba mwwg alaqkam Lvpw at Debidnvn irab paku. Mwam jilin twqto, hoo ngo bopam soqgv lengde kun.” Hoo nyem dvn ak hv Joabnvn benum, “Kaato, mwwg dumpongam nam gurum lvvgwb hurlin jitayin.”

²²‍Ho nyem dvn ak hoqg mwwlaq ko-gab nyiilu mwlwngv mwnwg dookub wnum. Hoo bulv Bikrig ko tuup Sebag dumpongam pvriqnum hoo ham Joabnvn gurum lvvgwb hurlin jinum. Ho mwv tuuly miqnum, hoo bulv bopam hoqgv mwwg at nammwb nyiicwr-cwrxiv wknum. Hoo Joab lvpw at dook Jerusalemb wkur kunum.

²³‍Joab Israelwg sipai mwlwngam saab nyiilo nyig bob nyinum; hoo Jehoiadag ko tuup Benaia Keret nyi tulungam la Pelet nyi tulungam saab nyiilo nyig bob nyinum;

²⁴‍hoo nyera-paqn tulug bon nyinam mam Adoramnvn kaaya mvdwb jinum; hoo Ahiludwg ko tuup Jehosapat hog mwlwngam xiqtu yaanbo gob nyinum;

²⁵‍hoo Seba svkretvri gob nyinum; hoo Jadok la Abiyatar nyub gob nyinum;

²⁶‍hoo Jairait hoqg Ira kam Debidg nyub ak gob nyinum.