Read Nyishi 2 SAMUYEL 21 Bible Online

2 SAMUYEL 21 - Nyishi bible

2 SAMUYEL 21

¹Debidg pvvb bwwl doog dvk moodho vnyw nyw-nyw kokwb nywum go dwr wnum. Hoo Debid At Swg nyuqm mam meegaqnum. Hoo At Sw benum, “Soul la mwwg nombungv ywlw twwpa, hoggab mwv Gibeon nyi tulungam mengnum.”

²‍Hoqgab lvpw atv Gibeon nyi tulungam goqnum hoo bulam goonum. Gibeon nyi tuluhv Israelwg nyiilu ma hvbmabde Amor hoqg boumnamv. Israel nyiilungv bulam ceetorl hoocuml doog dvb dingrnum, hvbmabde Soul mwv Israel la Juda nyiilungam kaaneq ko-gab bulam mengpaqnum.

³‍Hoo Debid Gibeon nyi tulungam benum, “Hoggv ngo nulgab nyitayin? Hoo hoggub ngo nyic pwram jitayin, ho nulv At Swg otungam lvqc citayin?”

⁴‍Gibeon nyi tulungv mwam benum, “Ngul gvla Soul ho mwwg imiq dvparwg pengko so rupv la hunv hog hvvtw ma; ho hoq pagoq gab ngulv Israel nyi gotwq bol mengdwb nyima.” Hoo mwv benum, “Ngam nulgab hog ak nyim dvb, hoggv nulv bedwn?”

⁵‍Bulv lvpw atam benum, “Hiyv ngulam dvmeqnum hoo ngulam mingtwr dvb mwwnum, hoqgab ngulv Israelwg dwrbu-dwrya mwlw ho nyook akkam dook maanum,

⁶‍hoqgab mwwg ko tuup kvn gon ngulam jitbv, ho ngulv At Sw xuqlin kunam, Soulwg Gibea ho At Swg agaho bulam paqyin tayin.” Hoo lvpw atv benum, “Ngo bulam jitayin.”

⁷‍Hvbmabde lvpw atv Soulwg ko tuup Jonatanwg ko tuup Mepibosetnvn jimanum, hoggab At Swg eminho Debid la Soulwg ko tuup Jonatan bunyi dingrnum.

⁸‍Lvpw atv Aiaywg nyem ko Rijpag ko tuup vnyi gon naanum, mwn Soulnvn Armoninvn la Mepibosetnvn dwrbuqjnum; hoo Soulwg nyem ko Merabg ko tuup ang gon naanum, Mehola hoqg Barjillaiywg ko tuup Adrielnvn mwn dwrbuqjnum;

⁹‍hoo bulam mwv Gibeon nyi tulug alaqho jilwqnum, hoo bulam bulv At Swg agaho puutu aoho paqyin kunum, hoo bul kvnv lvkin gob siknum. Bulam vly naarab dvk otuq aalho mengnum, hoqhv tanyeq vly naarab dvk moodwb nyinum.

¹⁰‍Ho Aiaywg nyem ko Rijpa tuila vjam naanum hoo hoqham mwn atv wlw aoho puutwl, vly naarab yuk hoqgv doorab layil bulam nyodo poolwg nyodo hoiyaq namgub doonum. Hoo bulug svmangam doa pvtangam aalam dvm mvmab ho dwr-pee-ngam aiyam dvm mvmab mwn rvkil doognum.

¹¹‍Hwdlo Debidnvn Aiaywg nyem ko Rijpa, Soulwg xwwbaq nywxw hv hoggv nyiknum ham betam yin,

¹²‍Debid wnum hoo Soul la mwwg ko tuup Jonatanwg alo tulungam Jabes-gilead nyi tulu hoqgv naanum, hogloq ho Palistan nyi tulungv, Soulnvn Gilboa ho mengtwl hoq aalho bulam paqyin ko hoqgv, alo tulungam bulv Bet-san nyi tulug deela hoqgv dvconum.

¹³‍Hoo Soul la mwwg ko tuup Jonatanwg alo tulungam mwv hoq hoqgv baqanum; hoo hiyam paqyinum hoq alo tulungam bulv doorkum kunum.

¹⁴‍Hoo bulv Soul la mwwg ko tuup Jonatanwg alo tulungam Benjaminwg gvda Jila ho mwwg ab Kisig nyubu bviywrho liiknum. Hoo lvpw atwg gaml jinam mwlwngam bulv nyiknum. Hoo hoq kokwb Pwnbov gvda gab xumnam mam birwq xiqnum.

¹⁵‍Hoqho lokta Palistan nyi tulu ngvla Israel nyi tulungv nyob panum, hoo Debid la mwwg nyera tulungv lvkin gob wnum, hoo bulv Palistan nyi tulungam nyob panum. Hoo Debid vigo nyelinum.

¹⁶‍Hoo nyiiram tamo hotam hoqgv lengn bo Isbi-benob eminam nyi ak doonum, hiyvg nwwxo vgwngv tama lwum sikil gob nyinum hoo hiyv nitbo lyoqr orioqkam poobw tvl Debidnvn mengdwb mwwnum.

¹⁷‍Hvbmabde Jeruiyag ko tuup Abisai mwam svka taab haanum hoo Palistan nyi tulungam nyob pvlwqnum hoo mwam mengnum. Ho Debidg nyi tulungv mwam dingrnum, “Soolo galoqkv no ngulug lvgab nyob patab wmin gvk yo, hvbnyima baloqkam Israelwg lempam mwmiq tado.”

¹⁸‍Soq kokw so lokta Gob ho Palistan nyi tulungam nyob panum. Ho Husa hoqg Sibbekai nyiiram tamo bo hotam hoqg Sapnvn mengnum.

¹⁹‍Hoo Gob ho lokta Palistan nyi tulungam nyob panum, hoo Betleham hoqg Jaare-oregim gv ko tuup Elhanan Gittwg Goliatnvn mengnum, mwwg nwwxo nwwliv vj cumn bog tvvp hvb nyinum.

²⁰‍Hoo Gat ho lokta nyob panum, hoqho nyi nyiiram tamo bo ak doonum, hiyvg lwcw-lvqcwngv taqcgon cwx hoo taqcgon cwx kalam doonum, hoo ham odum-suikam camnyi leq cipy go doonum, hoo mwv kam nyiiram tamo bo hotam hoqgv dwrbuqlinum.

²¹‍Hoo mwv Israelam benyi-beyanum, Debidg bor Simeig ko tuup Jonatan mwam patabnum.

²²‍Soq nyi vpy si Gat hoqg nyiiram tamo bo hotam hoqgv lengnum, hoo bulv Debid gvla mwwg nyera tulug alaqho haaknum.