Read Nyishi 2 SAMUYEL 22 Bible Online

2 SAMUYEL 22 - Nyishi bible

2 SAMUYEL 22

¹Hoo hwdlo At Sw Debidnvn mwwg ceebio tulug alaq hoqgv la Soulwg alaq hoqgv ywwlin yukho, mwv At Swnvn soq bemin lvgab gomcwr goonum.

²‍Mwv benum, “At Sw ngoqg lwwnv hoo ngoqg cwwgw gurumv hoo ngam ywwlin bov,

³ngoqg Pwnbov, ngoqg lwwnv, hiyam ngo cwwgw dvn, ngoqg svtamv, hoo ngam ywwlin bo tuuliv, ngoqg mwwgwl cwwgw kov hoo ngoqg cwwgwngv, ngam ywwlin bov; no ngam vs-axaq hoqgv ywwlin do.

⁴Ngo At Swn goqdwn, hiyv paqdwb nyidwn, hoo ngoqg ceebio tulu hoqgv ngam ywwlinum.

⁵“Hoggab sigwg issiv ngam toyumnum, diidwr issiv ngam tolupnum;

⁶Sux-ywlwg osongv ngam hoqtunum; sigwg pwd-potongv ngam wrwqnum.

⁷“Ngoqg vs-axaqho ngo At Swn goqnum; ngoqg Pwnboam ngo goqnum. Mwwg dvrwq namlo hoqgv mwv ngoqg yalam tapanum, hoo ngoqg xabnam yalv mwwg nyuru ho haanum.

⁸“Ho swcwngv tvmdwrl hoo hwqdinum; doa nvg gwwlv tvmdwrnum hoo hwqdinum, hoggab mwv hang lengnum.

⁹Mwwg nyupum hoqgv mwkv juulinl juucanum, mwwg agam hoqgv lyomeq bo wmv; hwrn bo mopiongv mwwg hoqgv lengnum.

¹⁰Mwv doangam mvko layil hoo ipoqnum; kan twdwq bov mwwg lvpia niikum ho doonum.

¹¹Mwv cerub aoho dootwl xarl hoo jarnum; mwam alap gvtwl dooiho jardwb kaapanum.

¹²Mwwg taqg-loosaqkam mwv kan twdwqkam xwryum mvl mwwg pulup nan gob mvnum, kan twdwq bo doomwqkv issam boqkum doognum.

¹³Mwwg aga hoqgv kwlwq-kvlaqbo hutongv lengnum hwrl moily bioqlin bov lengnum.

¹⁴At Sw doa ao hoqgv doogum gumdwn, hoo Pwnbov mwwg yalam dulinum.

¹⁵Hoo mwv uppuqkam ablinum hoo hoq tulu ham cwrsaq-bvraq mvdwn; taiyam mam bioqlin mvl hoo ham bioqkeq-bioqyeq mvdwn.

¹⁶Ho At Swg yolu ruqyikam, mwwg nyupum hoqgv saqlin yin; sa-svlog silam mam kaapanum; gvda gvtwg gwwlam asar dvb kaapanum.

¹⁷“Mwv aoho hoqgv haanv hoo mwv ngam naanum; mwv ngam iss ura hoqgv seelinum.

¹⁸Ngoqg ator bo ceebio hoqgv, ho hiyv ngam oyum bo hoqgv mwv ngam pvlywnum, hoggab bulv ngoqgab vc loodab atorbo gob nyinum.

¹⁹Ngoq vs-axaq moodam bulv ngam nyob panum, hvbmabde At Sw ngam tornum.

²⁰Mwv ngam rooto ko nyook ho boolin pakun; mwv ngam pvlywnum, hoggab mwv ngoqg aoso hemp mwwpa dvn.

²¹Ngoqg nyedar lootwb nyigam gab At Sw ngam anya jaqb nyinum; ngoqg alaqkv dvrwq ko-gab mwv ngam lvqcnum.

²²Hoggab ngo At Swg lamtangam pvvnum hoo nyic-nyia nyil ngoqg Pwnbo hoqgv ngo wleq maanum.

²³Hoggab mwwg pvvb mwlwngv ngoqg agaho doonum, hoo mwwg pvvb hoqgv ngo wi maanum.

²⁴Mwwg agaho ngo timb dvb nyimanum, hoo nyimur hoqgv ngo atv atam aado sunum.

²⁵Hoo ngoqg nyedar lootw ko-gab, mwwg kaagaho ngoqg dvrwq ko-gab At Sw ngam lvqcnum.

²⁶“Aya mwwpa boam no atv aya mwwpanam mam kaakin dvn; timb dvb nyima bo nyiam no atv timb dvb nyimanam mam kaakin dvn;

²⁷dvrwq boam no dvrwqkam nyil wdwn, hoo nyic-nyia boam no atv kwr-kor gob kaakin dvn.

²⁸No yanbo nyiilungam ywwlin dvn, hvbmabde noqg vnyiqkv larn boam akob mvgeq dvb tuugab dvn.

²⁹Hoggab At Swa, no ngoqg lempv, hoo ngoqg Pwnbov ngoqg kanam huto huuj dvn.

³⁰Hoggab noqg ator hoqgv ngo sipai acam mam ceeko nyodwn, hoo ngoqg Pwnbo ho ngo dvgw layil gurum mam juqbo nyodwn.

³¹Soq Pwnbo si lak—mwwg lamtangv kvtaq-mvlaq dvn; At Swg gomcwr jvqtwngam kaakin dvn; mwam hiyv cwwgw dvn mwv hoq mwlw gab svtamv.

³²“Hoggab Pwnbov hiyv, hvbmabde At Sw? Hoo ngulug Pwnboam apaq tvl, hiyv lwwn pw si?

³³Soq Pwnbo si ngoqg atorb cwwgwngv hoo timb dvb nyima dvb ngoqg lamtangam mwj pakun.

³⁴Mwv ngoqg lvpiangam sudum lvpia hvb mvnum hoo ngam ao ko cumciq gvdaho pvvl ap pakun.

³⁵Mwv ngoqg alaqkam nyob pvswrnum, ho ngoqg laqpongv tama illiam seea latayin.

³⁶Noqg ywwlinam svtam mam no ngam jipa kun, hoo noqg nyum-nyumnamv ngam koi dvb mvnum.

³⁷Ngoqg lvpia dwql wkwb no ngam rooto bo nyookam jinum, hoo ngoqg lvpiangv duleq maanum;

³⁸ngoqg ceebio tulungam ngo ruqmin gvnum hoo bulam twryumnum, hoo bulam mingtwr maady deedib wkur maanum.

³⁹Ngo bulam dvmeqnum; ngo bulam nwqlwqnum, ho bulv gorab kumanum; bulv ngoqg lvpia niikum ho geqp kunum.

⁴⁰Hoggab nyob panan atoram no ngam tomswr-honynum; ho hiyv ngam ceekol daqrab boam no ngoqg urab yoqlwq mvnum.

⁴¹Ngoqg hoqgv xaal kem dvb no ngoqg ceebio tulungam mvnum, ho hiyv ngam oyumnum, hoo ngo bulam twryumnum.

⁴²Bulv kaanum, hvbmabde ywwlin bo akkam doomanum; bulv At Swn xabnum, hvbmabde mwv bulam birwq maanum.

⁴³Ngo bulam ked diimwr hvb jwwmwqnum; ngo bulam kiimwql mvnum hoo lamtag suiyu hvb caajab-caaiyabnum.

⁴⁴“Ngoqg taleqbo nyiilu hoqgv no ngam naalinum; nyob tulungam pvvb bwwl doog mvdwb no ngam nyiilo gob mvnum; ngoqg cengka maanam nyiilungv ngam bon nyijnum.

⁴⁵Nyoodo nyi tulungv dumpo pvxwl ngoqg agaho haanum; hwdlo bulv ngam tapa kalam, bulv ngam tvjwnum.

⁴⁶Nyoodo nyi tulungv hang honum hoo bulug gurum ura hoqgv tvmdwrl haanum.

⁴⁷“At Sw swwl doody deedib, hoo ngoqg lwwnv xinam jaqkv, hoo ngoqg Pwnboam koiyib yuumto, ngam ywwlin bo lwwnv,

⁴⁸Pwnbov hiyv ngam ree daqm dvb jinum hoo nyiilungam ngoqg ura lo doom dvb mvnum,

⁴⁹ngoqg ceebio tulu hoqgv hiyv ngam boolinum; ngam ceekol daqrab boam no ngam mviya mvdwb ator jinum; kwr-korbo nyi hoqgv no ngam naalinum.

⁵⁰“Hoggab soq sib nyigam gab, nyob tulug pengko ho, At Swa, nam ngo paqtayin, hoo noqg eminam bemin bel paqtayin.

⁵¹Mwwg lvpw atam mwv koiyib ywwlinam mam baqa jidwn, hoo Debid nvla mwwg hosiqkam nwrba xaqb mwwg xuqlinam mam, tumanam abiam kaakin tayin.”