Read Nyishi 2 SAMUYEL 23 Bible Online

2 SAMUYEL 23 - Nyishi bible

2 SAMUYEL 23

¹Soq tulu si Debidg svxin benam gomcwrv: Jesse ko tuup Debidg gamt tonamv, nyi akwg gamt tonamv hiyam koi dvb mvcanum, Jakubg Pwnbog xuqlinam akv, Israelwg tiiswr dvb mwmin nwswr swrnamv:

²At Swg Yalv ngam agam goog dvn; mwwg gomcwram ngoqg lyol lo jilwqnum.

³Israelwg Pwnbov goonum; Israelwg lwwnv ngam benum: Hwdlo nyiingv jvqtw pvvbam bwwl doog yin, hv Pwnboam bosil pvvb bwwl doogdvn,

⁴bulug aoho mwv ar huto hvb huua jidwn, aram doomwq putum yin doonyi huulinam hvb nyidwn, kedho nyodo hoiyaq tvl nwmw jurab mvnam hvb nyidwn.

⁵Hoggab ngoqg nombungv Pwnbo lvgab daqma dvn yv? Hoggab ngoqg lvgab mwv kuiyum xaqb pvvb birnam mam pvvb mvpa kun, hog mwlw pagoqkv swrso dukun. Hoggab mwv swwm-geem dvb mvdwn ho ngoqg mwwbynam hog mwlw pagoqho ngam svka maad nvi yv?

⁶Hvbmabde dooxa bo nyi tulungv hurpaq kunam taa tulu hvb nyidwn, hoggab hoq tulu ham alaq lvgab nvvjiq maadkun;

⁷hvbmabde hiyv ham ika bo nyiv mwv atwg alaqkam lyoqdwr la nwwxo nwwliv nwqlwq dvn, hoo hoq tulu ham wm lvgab guiyum dukun.”

⁸‍Soq nyi emin tulu si Debidg doognam atorbo nyiv: Takemon hoqgv Joseb-bassebet; mwv dvpar oumg saab gob nyinum. Nyob lok nyob paiyikho, mwwg nwwxo hoqgv mwv lvkin ciqnyi ho nyi lwwg piin go mengnum.

⁹‍Atorbo oumg pengko hoqgv mwwg dvqsinv Ahohig ko tuupwg Dodog ko tuup Eleajar. Mwv Debid lvgab doonum hwdlo bulv nyob pakho Palistan nyi tulungam benyi-beyanum, hoo Israel nyi tulungv tobkurl wnum.

¹⁰‍Mwv gorab layil Palistan nyi tulungam mwwg alaqkv loqsum-loqyum daqdwb mengnum, hoo mwwg alaqkv lyoqr orioqho geetaqnum. Hoo At Sw hoq aalho koi jaqb mviya mvdwb jinum, hoo mwwg kokwb haanbo nyi tuluhv mengnam nyi tulug dumpum-dvrab pam nvvtwqnum.

¹¹‍Mwwg dvqsinv Harar hoqgv Ageeg ko tuup Samma. Lehi ho Palistan nyi tulungv lvkin gob hookumnum, hoqho peerin rongo rwqg doonum, hoo nyi tulungv Palistan nyi tulu hoqgv kenum.

¹²‍Hvbmabde mwwg daqkho mwv daqtwl hoo ham ceetornum hoo Palistan nyi tulungam mengnum, hoo At Sw koi jaqb bonam nyinv mviya mvnum.

¹³‍Hoo hwdlo Palistan nyi tulungv Repaim Lywpa ho svmcw mvl dooyikho, cammum peelo bo ura hoqgv oum gon vly nvvd moodho Debidg Adullam lwwpwq dookub innum.

¹⁴‍Hoq moodho Debid cwwgw ko ho doonum, hoo Palistanwg sipai tulungv Betleham ho doonum.

¹⁵‍Hoo Debid nammam mwungul benum, “Oa, ngam Betlehamg toggoq sookam iss hoqgv twwdwb jinbo nyi loq ak doonyi loqkam alpa!”

¹⁶‍Ho atorbo nyi oum hv Palistan nyi tulug svmcwngam damko layil hoo Betlehamg toggoqg sookam issam suqnum hoo ham baqlayil hoo Debidnvn bvqlwq jinum. Hvbmabde mwv ham twwmanum. Mwv ham At Swn toojnum

¹⁷‍hoo benum, ngoqg hoqgv ham aado mvto, At Swa, ho ngo sam nyiram. Hiyv bulug swwgam ludum peel iss bwanam mam ngo twbnyiloqkam bulug hijum mam twwnam hvb nyima yv?” Hoqgab mwv hoq ham twwmanum. Soq tulu sam atorbo sipai saab oumv nyinum.

¹⁸‍Jeruiyag ko tuup Abisai, Joabg borv, cammum hoqg peelo bob nyinum. Hoo mwwg nwwxo lvgab mwv nyi lwum mam nwqtabl hoo bulam mengnum hoo soq oum lvvgho mwam kam emin tapanum.

¹⁹‍Cammum ura hoqgv mwam yuubin yaanum hoo bulug saab gob nyinum, hvbmabde mwv oum mam juqc kumanum.

²⁰‍Hoo Kabjeel hoqg haakam bo nyi ak Jehoiadag ko tuup Benaia, koibo bonam naleqgo nyinum. Mwv Moabg yuunam koibo nyi vnyiam mengnum. Hwdlo tapamv yoqdu yukho mwv ungngwb haanv sony nyot dorg patabl mengnum.

²¹‍Hoo mwv kangam bo Ijipt nyi ak mengnum. Ijipt nyi ak hv mwwg alaqho nwwxongv doosnum, hvbmabde Benaia mwwg dookub wnv beqnyia lvgab Ijipt nyi alaq hoqg nwwxongam naareqnum hoo mwwg atwg nwwxo hoqgv mwam mengnum.

²²‍Jehoiadag ko tuup Benaia soq tulu sam nyinum hoo soq nyi oum lvvgho mwam kam emin yuumnum.

²³‍Mwv cammumwg pengko ho yuunum, hvbmabde sipai saab oum mam mwv juqc kumanum. Hoo mwam Debid mwwg rvky bob mvknum.

²⁴‍Joabg bor Asael cammum pengko hoqg akwn; Betleham hoqgv Dodog ko tuup Elhanan,

²⁵‍Harod hoqgv Samma, Harod hoqgv Elika,

²⁶‍Paltite hoqgv Helej, Tekoa hoqgv Ikkeswg ko tuup Ira,

²⁷‍Anatot hoqgv Abiejer, Husa hoqgv Mebunnai,

²⁸‍Ahohi hoqgv Jalmon, Netopa hoqgv Maharai,

²⁹‍Netopa hoqgv Baanag ko tuup Heleb, Benjaminwg nyiilug Gibea hoqgv Ribai gv ko tuup Ittai,

³⁰‍Piraton hoqgv Benaiai, Gaas kucw hoqgv Hiddai,

³¹‍Arbat hoqgv Abi-albon, Bahurim hoqgv Ajmabet,

³²‍Saalbon hoqgv Jonatanwg hosiq Jasen gv ko tuup Eliyaba,

³³‍Harar hoqgv Samma, Harar hoqgv Sararag ko tuup Ahiyam,

³⁴‍Maaka hoqgv Ahasaiywg ko tuup Elipelet, Gilo hoqgv Ahitopel ko tuup Eliyam,

³⁵‍Karmel hoqgv Hejro, Arbit hoqgv Paarai,

³⁶‍Joba hoqgv Natanwg ko tuup Igal, Gad hoqgv Bani,

³⁷‍Ammon hoqgv Jelek, Beerot hoqgv Naharai, Jeruiyag ko tuup Joabg nwwxo-svtam mam baqya boogub nyinum,

³⁸‍Itrait hoqgv Ira, Itrait hoqgv Gareb,

³⁹‍Hittait Uriya hoqgv: mwlwngam okum yin cammum leq kvn go nyinum.