Read Nyishi 2 SAMUYEL 3 Bible Online

2 SAMUYEL 3 - Nyishi bible

2 SAMUYEL 3

¹Soulwg nombu ngvla Debid nombungv oyu go nyob pal doonum. Hoo Debid ator-ator yaab swwknum, hvbmabde Soulwg nombungv ako-ako yaab laanyi kumanum.

²‍Hoo Hebron ho Debidnvn ko tuupv dwrbuqjnam tuluhv: Jejreelwg Ahinoam hoqgv Amnon, mwwg tuup vbw cociqkv;

³‍hoo Karmelwg Nabalwg xwwmy Abigail hoqgv, mwwg vnyi deenv tuupv Kileab; hoo Gesurwg lvpw at Talmai gv nyem ko Maaka hoqgv, mwwg oum deen tuupv Absolom;

⁴‍hoo vpy deenv Adonija, hiyvg annv Haggit; hoo ang deenv Sepatiya, hiyvg annv Abital;

⁵‍hoo ax deenv Itream, hiyvg annv Egla, soq tulu si Debidg nywxwngv. Soq ko tuup sam Debidnvn Hebron ho dwrbuqjnum.

⁶‍Hwdlo Soulwg nombungv la Debidg nombungv nyob paiyikho, Soulwg nombu hoqgv Abner mwv atv atam ator dvb mvsnum.

⁷‍Hoo Soul xwwbaq nywxw ak doonum hiyvg eminv Rijpa, Aiayag ko nyemv. Hoo Is-boset Abnernvn benum, “Hoggub no ngoqg abwg xwwbaq nywxw dookub wnum?”

⁸‍Ho Is-bosetwg agam benam ham Abner vc loodab hang lengnv hoo benum, “Ngo Judag iky dumpo ngvi yv? Soq aal namgub noqg abwg nombungam, mwwg vbw-bor tulungam, hoo mwwg ajin tulungam ngo tumanam abiam kaakinum, hoo nam kam Debidg alaq lo jilwq maapan. Hoo hvbsujaqkam no ngam nyem akwg pagoq gab yolu ruqdwn.

⁹‍At Sw hoggv Debidnvn dingr kunam ham ngo mwam niqtuq nyilin gvma baloqkam, Pwnbov Abnernvn kaaya to hoo mengla jaqkam mengto,

¹⁰‍lvpw-haty sam Soulwg nombu hoqgv jilin taikun hoo Debidnvn Israel la Judag lvpw pwqlwngam, Dan hoqgv Beerseba namgub jitayin.”

¹¹‍Hoo Is-boset Abnernvn lokta agam birwq maanum, hoggab mwv mwam bosnum.

¹²‍Hoo Abner mwwg duub pui baqn boam Debid dookub kanam tvl hoo begamv, “Gvda si hiyv gv? No pvvb loq ak ngam mwr tukub, hoo kaato, Israel mwlw sam nam naam dukub ngoqg alaqkv noqg lvgab doomin gvtayin.”

¹³‍Hoo mwv benum, “Alpa; ngo noqg lvgab pvvb birnam mam mvtayin. Hvbmabde no otuqcob soq nyis ak sam nyito; hoqhv, hwdlo no ngoqg nyuqm mam kaapa taab haaikam, otuqcob no ngoqg nyuqm mam kaapa taab Soulwg nyem ko Mikalnvn boa to.”

¹⁴‍Ho Debid Soulwg ko tuup Is-bosetnvn pui baqn boam kanaml begamv, “Ngoqg nywxw Mikalnvn ngam jitku, hoggab mwnwn ngo Palistan nyi tulug nyiilaq lwwg hoqgv soor rvl ap pakun.”

¹⁵‍Hoo Is-boset nyi kanam tvl mwnwn mwn nyol Lais gv ko tuup Paltiyel hoqgv naaknum.

¹⁶‍Hvbmabde mwnwg nyolv mwnwg lvgab Bahurim namgub xabjo mingwl wnum. Ho Abner mwam benum, “Wkur nuku.” Hoo mwv wkur kunum.

¹⁷‍Hoo Abner Israelwg nyiixa tulug lvgab pwbwb cengm dvb betamnv begamv, “Otuq moodho nulv Debidnvn nulug lvpw at gob mvdwb nulv meegaqnum.

¹⁸‍Sija hoqham haam tuku, hoggab At Sw Debidnvn dingrwl begamv, ‘Ngoqg nyera Debidg alaq hoqgv ngoqg Israel nyiilungam ngo Palistan nyi tulug alaq hoqgv, hoo bulug ceebio tulug alaq hoqgv ywwlin tayin.’”

¹⁹‍Abner Benjaminam kam goonum. Hoo Israel mwlwngv la Benjaminwg nombu mwlwngv mwwnamv hv alpa hvl benam mam Abner Debidnvn Hebron ho betam taab wnum.

²⁰‍Hwdlo Abner la mwwg lvgab nyi camnyi go Debid dook Hebron ho haanum, Debid Abner la mwwg lvgab wba bo nyi tulu gab durum dvdwb jinum.

²¹‍Hoo Abner Debidnvn benum, “Ngo wg dukul hoo Israel nyi mwlwngam ngoqg nyiit at lvpw atgab goqkum tade, ho noqg lvgab bulv pvvb birnam mam mvtayin, hoo noqg hang mwwlwq koob no mwlwg aoho pvvb bwwl doogto.” Ho Abnernvn wwm kunum, hoo mwv swrsob wknum.

²²‍Oyu maadab Debidg nyera tulungv la Joab nyob pak hoqgv naleqgo naareq kunam mam bulug lvgab baqlayil haanum. Hvbmabde Abner Debid lvgab Hebron ho dook maanum, hoggab mwv mwam kanam tukul wwm kunum, hoo mwv swrsob wknum.

²³‍Hwdlo Joab la mwwg lvgab sipai tulungv hvvc yukho, Joabnvn betamnum, “Nerwg ko tuup Abner lvpw at dookub haanum, hoo mwv mwam wwm gvnkun, hoo mwv swrsob wnkun.”

²⁴‍Ho Joab lvpw at dookub wnum hoo benum, “Hoggv no nyit kun? Kaato, Abner noqg dookub haat banyi. Hoggub no mwam kanam tukun, ho mwv wn kubanyi?

²⁵‍No cengdo Nerwg ko tuup Abner nam vm mvvpaq taab hoo noqg lengnam haanam mam, hoo noqg hog mwlw nyinam wnam mam cengtab mwv haanum.”

²⁶‍Hwdlo Joab Debid dook hoqgv lenglayil mwv Abner kokw pui baqn boam kanamnum, hoo bulv mwam Sirag sookam hoqgv bookur kunum. Hvbmabde Debid hoqham mwv cengmanum.

²⁷‍Hoo hwdlo Abner Hebron ho hookur yukun, Joab mwam toggoq bviywrho mwwg lvgab vpwb goos ak doodo hvl boobwq layil, hoo hoqho mwv mwwg kepongam nwqlwq kunum, ho mwv siknum, hoggab mwwg bor Asaelwg hijum kwliam naaknum.

²⁸‍Kokw so hwdlo Debid ham tapa yin, mwv benum, “Ngo la ngoqg lvpw-hativ nwrba gob At Swg agaho Nerwg ko tuup Abnerwg hijum gorgiam baqram.

²⁹‍Hvbmabde hoqhv Joab gvla mwwg abwg nombu aoho haai nvpv, hoo Joabg nombungv doola sarnamv, ho tviyiq nyinamv ho svmeq meqnamv ho lyoqr orioq niqtuqb wnamv ho dvpa maanamv nywywngam apaqram!”

³⁰‍Hoqgab Joab la Abisai mwwg bor Asaelnvn mengn bo Abnernvn mengnum, hoggab mwv bulug bor Asaelnvn Gibeon nyob pakho mengnum.

³¹‍Ho Debid Joab nvla mwwg lvgab yvba bo nyiilungam benum, “Nulug vj koonam mwlwngam pujarto hoo tuila vjam kooto hoo Abnerwg agaho nyix-riito.” Hoo Lvpw at Debid hulungam wmin gvnum.

³²‍Bulv Abnernvn Hebron ho liiknum. Hoo lvpw atv vcjaqb sogoqnv Abnerwg nyubu ho xabnum, hoo nyiilu mwlwngv xabnum.

³³‍Hoo lvpw atv Abner gab nyix-riil begamv, “Abner paca bo sinam hvb siyin nam yv?

³⁴Noqg alaqkam raql ap maanum; noqg lvpiangam tag kartin maanum; nyic-nyia bo akv yoql nam hvb no yoql paku.” Hoo nyiilu mwlwngv mwwg gab lokta xabnum.

³⁵‍Ho nyiilu mwlwngv Debidnvn aal deeda so dvs dvtwk hvl xaateqnum. Hvbmabde Debid dingrwl begamv, “Doonyiv haama deedib ngo hog dvs-twws dvka twwka baloqkam Pwnbo ngam jwwtab to hoo sim dvb mvto!”

³⁶‍Hoo nyiilu mwlwngv ham cengt kul hoo bulv ham hempnum, hoggab lvpw atwg hog mwlw nyinam hv nyiilu gab hemp dvb nyinum.

³⁷‍Hoqgab hoq aalho nyiilu mwlw ngvla Israel mwlwngv cengknum lvpw atv Nerwg ko tuup Abnernvn mengdwb mwwlwq maai banyi.

³⁸‍Hoo lvpw atv mwwg nyera tulungam benum, “Soq aal so lvpw atv la koibo nyiingv Israel ho yoqlnam mam nulv cengma yv?

³⁹‍Hoo lvpw at xuqlin namgob nyisjaqkam, soolo ngo nyum-nyum dvn. Soq nyi tulu si, Jeruiyag ko tuup tulungv ngam ya mwwdwq dwqbin yaado. At Sw almab nyin boam mwwg nyic-nyia nyinam kalam hvb kwly daqg nvka!”