Read Nyishi 2 SAMUYEL 4 Bible Online

2 SAMUYEL 4 - Nyishi bible

2 SAMUYEL 4

¹Hwdlo Soul ko tuup, Is-boset Hebron ho Abnerwg sinam mam tapa yin, mwv haakam kumanum, hoo Israel mwlwngv mwwdwqnum.

²‍Soulwg ko tuup hv nyob pagbo sipai saab vnyi go doonum; akwn hoqg eminv Baana, hoo akwn hoqg eminv Rekab, Benjamin nyob hoolu hoqg Rimmonwg ko tuupv, mwv Beerot hoqgv (hoggab Beerot ham kam Benjamin dvpar gob xitaq dvn;

³‍Beerot nyi tulungv Gittaimb kenum hoo soq aal namgub hoqho bulv doodwn).

⁴‍Soulwg ko tuup, Jonatan lukum bo ko tuup ak doonum. Mwv vnyw nywng yukho Soul la Jonatannvn meng nukba hvl Jejreel hoqgv puiyv haaikam, hoo mwam sonbo akv mwam naalayil kegnum, hoo hwdlo mwn nyebia jaqb kegtak ho mwv yoqlnum hoo lukum kunum. Hoo mwwg eminv Mepiboset.

⁵‍Ho Beerot hoqg Rimmonwg ko tuup tulungv Rekab la Baana aal lvpa doonyi og rusuq yukho wnv Is-boset namho haanum hoo Is-boset aal lvpa ho doonul doodunum.

⁶‍Hoo bulv wtw kotab haanam hvb nam urab haanum, hoo bulv mwam kepo ho nwqlwqnum. Ho Rekab la mwwg bor Baana bunyiv hoqgv keleqnum.

⁷‍Hwdlo bulv nam urab haanum, mwv mwwg yubk wrwg kartam aoho geqp tvl doonum, bulv mwam patabnum hoo mwam mengtwql hoo mwwg dumpongam pvriqnum. Bulv mwwg dumpongam bwwlayil ai yupw Araba lamtab wiyinum,

⁸‍hoo Is-boset dumpongam Debid dook Hebron ho baqanum. Hoo bulv lvpw atam benum, “Soq si Is-boset dumpongv, Soulwg ko tuup, noqg ceebiongv hiyv noqg swwgam meegaqnum. At Sw Soul la mwwg hosiqkam ngoqg nyiit at lvpw atgab soq aal so ree daqpa ku.”

⁹‍Hvbmabde Debid Beerotwg Rimmonwg ko tuup Rekab nvla mwwg bor Baananvn benum, “At Sw swwl doody deedib, hiyv ngoqg swwgam aal looxig vs-axaq hoqgv pvlyw pakun,

¹⁰‍hwdlo nyi ak ngam betamnum, ‘Kaato, Soul sipa ku,’ hoo mwv tugu puiyam baqa sunum, hvbmabde ngo mwam nootunum hoo mwam Jiklag ho mengnum, ngo mwam tugu puiyam baqjo akiam hoqhvb jitkun.

¹¹‍Hvbnyiloqkam hog hwdgo almab nyiyin do, hwdlo nyic-nyia bo nyiingv nyedar bo nyiam mwwg atwg nam kartam ho mengn boam laqm-baqm yin do, hoqgab sija ngo mwwg hijum gab nulug alaq hoqgv naadwb nyitayin hoo nulam swcw nvg ao soqgv twrm dvb mvram yv?”

¹²‍Hoo Debid mwwg yaapa tulungam gaml jinum hoo bulv bulam mengnum hoo bulug all-alaqkam papaq tvl hoo bulam Hebronwg sviyin bviywrho paqyinl apnum. Hvbmabde bulv Is-bosetwg dumpongam naaknum hoo Hebron ho ham Abnerwg nyubu ho liiknum.