Read Nyishi 2 SAMUYEL 5 Bible Online

2 SAMUYEL 5 - Nyishi bible

2 SAMUYEL 5

¹Ho Israel nyob mwlwngv Hebron ho haal Debidnvn benum, “Kaato, ngulv noqg loobu-looyaqkv.

²‍Otuq moodho hwdlo Soul ngulug lvpw at gob swwyikho no su ngulam boolin bo hoo Israel uraho boolwqnum. Hoo At Sw nam benum, ‘Ngoqg Israel nyiilungam no sviya rvky tayin hoo Israelwg aoso lvpw atwg ko tuup gob swwtayin.’”

³‍Hoqgab Israelwg nyiixa tulungv lvpw atwg dook Hebron ho haanum, hoo At Swg agaho Lvpw at Debid lvgab bulv pvvb birnam mam mvnum, hoo bulv Debidnvn Israel aoho lvpw at gob xuqnum.

⁴‍Hwdlo pvvb bwwl doorab gviyikho Debid vnyw cammum kunum, hoo mwv vnyw campy go pvvb bwwl doognum.

⁵‍Hebron ho mwv Judangam vnyw kvn gola pool barx go pvvb bwwl doognum, hoo Jerusalemho mwv Israelam la Juda mwlwngam vnyw cammum leq nywum go pvvb bwwl doognum.

⁶‍Hoo lvpw atv la mwwg nyi tulungv Jerusalemho nyiidu nyi doodu bo Jebus nyi tulungam ceeko taab wnum, hiyv Debidnvn benum, “No so haala deema, hvbmabde nyiqca bov la lukum bov nam soqgv ruqpaq tayin”—mwwgamv, “Debid hoqho haala ram mwwnum.”

⁷‍Hvbmabde Debid Jaiyonwg cwwgwnanam naaknum, hoqhv Debidg bopamv.

⁸‍Hoo Debid hoq aalho benum, “Hiyv xeq Jebus nyi tulungam mingnw bov, mwam iss silam dookub caag dvl ‘lukum boam hoo nyiqca boam mengto,’ hiyam Debidg yvjv oyum pakun.” Hoqgab hoqho benum, “Nyiqca bov hoo lukum bov nam urab haala kuram.”

⁹‍Hoo Debid hoq cwwgw nanho doonum hoo ham Debidg bopamv hvl eminum. Hoo Debid Millo ura hoqgv mvrab layil bopam taqg-loosaq mwlw ho bopam mam mvnum.

¹⁰‍Hoo Debid koi-koi yaiyab swwknum, hoggab Pwnbo nyiit At Sw mwam doobanum.

¹¹‍Hoo Taiyarg lvpw at Hiram Debid dookub pui baqn boam, hoo sidar svvnam, svvda mistri-ngam la simit mistri-ngam kanam tvl Debidg gab nam namg mvm jinum.

¹²‍Hoo At Sw mwam Israelwg aoho lvpw at gob mvko jipa kun hvl Debid cengnum, hoo mwv lvpw-hatiam mwwg Israel nyiilug emin gab yuumnum.

¹³‍Hoo Debid Hebron hoqgv Jerusalemb haaxo kokw so mwv naleqgo xwwbaq nywxw ngvla hoo nywxw loodangv Jerusalem hoqgv naanum.

¹⁴‍Hoo soq ko tulu sam Jerusalem dwrbuqnum: Sammua, Sobab, Natan, Solomon,

¹⁵‍Ibar, Elisua, Nepeg, Japia,

¹⁶‍Elisama, Eliyada, hoo Elipelet.

¹⁷‍Hwdlo Palistan nyi tulungv Debidnvn Israelwg lvpw at gob xuqpa ku hvl puiyam tapa yin, Palistan nyi mwlwngv Debidnvn meegaql nootu taab caanum. Hvbmabde Debid ham tapa tvl hoo mwv cwwgwl dookub ileq kunum.

¹⁸‍Palistan nyi tulungv haanum hoo Repaim Lywpa bumpw ho cwrsaq-twqb yvnum.

¹⁹‍Hoo Debid At Swn toxnum, “Palistan nyi tulungam ngo nyob patab caaiyin dvi yv? Bulam no ngoqg alaq so jilwq bvi yv?” Hoo At Sw Debidnvn benum, “Caan, hoggub nyijaqkam ngo Palistan nyi tulungam noqg alaqho jilwq tayin.”

²⁰‍Hoo Debid Baal-perajim ho haanum, hoo Debid bulam hoqho mviyanum. Hoo mwv benum, “At Sw ngoqg ceebio tulungam diidwr iss buqpurnam hvb ngoqg agaho mvnum.” Hoqgab hoq nyookam Baal-perajim hvl eminum.

²¹‍Hoo Palistan nyi tulungv bulug murty tulungam hoqho apaq peel wleqnum hoo Debid la mwwg nyi tulungv hoq tulu ham baqpaqnum.

²²‍Hoo Palistan nyi tulungv lokta hvraqb haanum hoo Repaim Lywpa bumpw ho cwrsaq-twqb yvnum.

²³‍Hoo hwdlo Debid At Swn tox yin, mwv benum, “No caamabv; hvbmabde bulug taqg-loosaqb wiyiql yvto, hoo balsam svvn tulug dook taqcgon hoqgv nyob pvlwqto.

²⁴‍Hoo hwdlo no balsam svvn tulug niqtuqho nyi sool wnam yalam tapa yin, ho no atv gorab to, hoggab At Sw noqg otuqb wco kunv Palistanwg sipai tulungam mingyum pakun.

²⁵‍Hoo Debid At Swg gaml jinam hvb mwv nyinum, hoo Palistan nyi tulungam Geba hoqgv Gejer namgub mengnum.