Read Nyishi 2 SAMUYEL 6 Bible Online

2 SAMUYEL 6 - Nyishi bible

2 SAMUYEL 6

¹Debid lokta Israelwg xuqlinam nyi lwwyw cammum go goqkumnum.

²‍Hoo Debid la mwwg lvgab dooba nyiilu mwlwngv gorab layil Baale-juda hoqgv Pwnbog pvvb uddum mam baqa taab wnum, hoqham nyiit At Sw hvl eminum ho ham cerubim alap aoho doodwb mvnum.

³‍Hoo bulv Pwnbog pvvb uddum mam nitbo svv gaari ho baqnum hoo hoqham diisw nyookwg Abinadab gv nam hoqgv baqlinum. Hoo Abinadab gv ko tuupv Ujja la Ahio gaari-ngam mvl wgnum,

⁴‍Pwnbog pvvb uddum otuqb Ahio wco-wcol wgnum.

⁵‍Hoo Debid la Israelwg nombungv At Swg agaho hemp-hvnyirl bemin lvgab rwwxw-gunggangam, tamborin tulungam jwwl hoo dum-dum jwwl hoo tal dwwl soomin nyirminum.

⁶‍Hoo hwdlo bulv Nakonwg jurpy deela ho hvvc yukho Ujja mwwg alaqkv Pwnbog pvvb uddum mam joodarnum, hvvbv dwqtub ko-gab.

⁷‍Hoo At Swg hang lengnamv Ujjag aoho haanum, hoo mwwg nyimur ko-gab Pwnbov mwam hoqho jwwtabnum, hoo mwv Pwnbog pvvb uddum bviywrho siknum.

⁸‍Hoo Debid vcjaqb hang lengnum hoggab At Sw Ujjanvn ceekol sidwb laqm-baqmnum. Hoo soolo godab hoq nyook ham Perej-ujja hvl emin gvdwn.

⁹‍Hoo Debid hoq aalho At Sw bosnum, hoo mwv benum, “Hoggub yu At Swg pvvb uddum si ngoqg dookub haanyi tayin?”

¹⁰‍Hoqgab Debid At Swg pvvb uddum mam Debidg bopam urab bvqlwq nwwmanum. Hvbmabde Debid ham asaq yaab baqnv Gittitwg Obed-edomwg nammwb bvqlwqnum.

¹¹‍Hoo At Swg pvvb uddum mam pool borum gob Gittitwg Obed-edom ho doonum, hoo At Sw Obed-edom nvla mwwg nombu mwlwngam lvqc cinum.

¹²‍Hoo lvpw at Debidnvn betamnum, “Pwnbog pvvb uddum mam doog ko-gab, At Sw Obed-edomwg nombungam la mwwg doognam mwlwngam lvqc cigdo hvl tapanum.” Hoqgab Debid wknv hoo Pwnbog pvvb uddum mam Obed-edomwg nam hoqgv Debidg bopam ho hemp-hvnyir lvgab baqa kunum.

¹³‍Hoo hwdlo At Swg pvvb uddum mam joonbo tulungv korx go korl wxy kalam, mwv hvvb dorg la jwwtw bo svdin dorg pwr jinum.

¹⁴‍Hoo Debid At Swg agaho mwwg ator mwlwg lvgab noso soonum. Hoo Debid topum vj lolupam koonum.

¹⁵‍Hoqgab Debid la Israelwg nombungv At Swg pvvb uddum mam hemp goqr rol hoo tuuly miql baqal haagnum.

¹⁶‍Hwdlo At Swg pvvb uddum mam Debidg bopam ho hvvc yukun, Soulwg nyem ko Mikal pupum hoqgv nywcoql kaanamv Lvpw at Debid At Swg agaho pojuq jaal hoo noso soonum, hoo mwnwg hang uraho mwn mwam oyumnum.

¹⁷‍Hoo bulv At Swg pvvb uddum mam baqanum hoo ham pvvdwb hvl Debidg tombu mvpnam uraho hoqham pvvk namho pvvnum. Hoo Debid boyuqnam akiam la swrso gab pwr jinam akiam At Swg agaho jinum.

¹⁸‍Hoo hwdlo Debid boyuqnam akiam la swrso gab pwr jinam akiam jinya tvl, mwv nyiilungam nyiit At Swg emin ho lvqcnum

¹⁹‍hoo nyiilug pengko ho, Israelwg dumtwq-miilyw ko pengko ho, nyem ge hoo nyega ge seenam wtw gola vdin cwrg la hoo roo aaxy romnunam seenam wtwngam nyiicwr-cwrxiam jinum. Ho nyiilu mwlwngv mwwg at-at nammwb wpin-wra kunum.

²⁰‍Hoo Debid mwwg nombungam lvqc citab hookur kunum. Hvbmabde Soulwg nyem ko Mikal Debidnvn wrwqnv hoo benum, “Hoggub yu Israelwg lvpw atv soolo atv atam koi gob mvs dvn, soolo atv atam mwwg nyera-paqn tulug vnyiq kaagaho hog mwlwngam kaam dvb nyij paku, ho almanbo nyi akv hvnyw maab atv atam kaakinam hvb nyipa ku!”

²¹‍Hoo Debid Mikalnvn benum, “Hoqhv At Sw agaho nyinum, hiyv ngam noqg abam hoo mwwg imiq dvpar mwlwngam koi yaadwb xuqnum, ngam Israelwg aoho lvpw at gob xuqlinum, At Swg nyiilungv—hoo At Swg agaho ngo hemp-hvnyirl sooky tayin.

²²‍Ngo soq sam dooxa yaadwb atv atam hvraqb mvs tayin, hoo noqg vnyiq kaagaho ngo anyo bob nyitayin. Hvbmabde noqg goonam paqn tulug lvgab ngam vigo yuum tayin.”

²³‍Hoo Soulwg nyem ko Mikal mwnwg sinam xaqb ko doomanum.