Read Nyishi 2 SAMUYEL 8 Bible Online

2 SAMUYEL 8 - Nyishi bible

2 SAMUYEL 8

¹Soq kokw so Debid Palistan nyi tulungam mviyanum hoo bulam mwwg uraho doomnum, hoo Debid Meteg-ammangam Palistan nyi tulug alaq hoqgv naareq kunum.

²‍Hoo mwv Moab nyi tulungam mviyanum hoo mwv bulam hib-hibib deela ho geqp mvtwl hoo bulam xinum. Hib biinyi go mengdwb xilinum hoo bumpw bo hib biigwn apaqdvb. Hoo Moab nyi tulungv Debid nyerab swwknum hoo nyooga jinam mam boqkum jinum.

³‍Jobag lvpw at Rehobwg ko tuup Hadadejer, hwdlo mwv mwwg pvvb bwwl doognam Iupratas pobu durbungam nookur taakub wdu yikho Debid mwam kam mviyanum.

⁴‍Hoo Debid mwwg hoqgv 1,700 go svpur xarg bo nyiingam, hoo 20,000 go lvpia wnbo sipai tulungam naareq kunum. Hoo Debid lwwgwb ceriot svpuram ap tvl hoo mwlwngam lukum-laqca dvb mvtwl apaqnum.

⁵‍Hoo hwdlo Damaskaswg Siriya nyi tulungv Jobag lvpw at Hadadejernvn svka taab haan boam 22,000 go Siriya nyi tulungam Debid mengnum.

⁶‍Ho Debid Damaskaswg Aram ho sipai svmcwngam mvl ap kunum, hoo Siriya nyi tulungv Debidg nyerab swwknum hoo nyoogangam boqkum jinum. Hoo Debid mwv hogloq-hogloqb wjaqkam At Sw mwam mviya mvdwb ator jinum.

⁷‍Hoo Debid Hadadejerwg nyera tulug hun svtam baqnam mam naareqnum hoo hoq tulu ham Jerusalemho baqanum.

⁸‍Hoo Hadadejerwg bopam tulu Beta hoqgv hoo Berotai hoqgv Lvpw at Debid naleqgo tamangam naaknum.

⁹‍Hwdlo Hamatwg lvpw at Toi, Hadadejerwg sipai tulungam Debidg mviyanam mam tapa yin,

¹⁰‍Toi mwwg ko tuup Joramnvn Lvpw at Debid dookub kanam tvl, ho mwwg al-kornam mam tox mvnum hoo mwam aljaqb nyipa hvl paqnum hoggab mwv Hadadejernvn nyob paiya paku, hoggab Hadadejer lwxiam Toinvn nyob paky twqnum. Hoo Joram mwwg lvgab rup, hun hoo tama dupum-dvrab pam baql haagnum.

¹¹‍Hoq tulu ham kam Lvpw at Debid At Swn gvqlwqnum, hoqg lvgab nyob asaq tulungam mwv mviya tvl rupam la hunam naanam mwlwngam lvkin gob darxaqnum,

¹²‍hoqhv Idom hoqgv, Moab hoqgv, Ammon hoqgv, Palistan hoqgv, Amalek hoqgv, hoo Jobag lvpw at Rehobwg ko tuup Hadadejer hoqgv.

¹³‍Hoo Debid mwv hwdlo Al Lywpa ho Idom nyi tulungam 18,000 go mengpe kul wkur yukho mwv atam emin tapa dvb nyinum.

¹⁴‍Ho mwv sipai svmcwngam Idomho mvp kunum; Idom gvda mwlw ho sipai dook svmcw tulungam mvp kunum, hoo Idom nyi tulungv Debidg nyerab swwknum. Hoo Debid mwv hogloq-hogloqb wjaqkam At Sw mwam mviya mvdwb ator jinum.

¹⁵‍Hoqgab Debid Israel mwlwngam pvvb bwwl doognum. Hoo Debid lootw bvla homyin dvb mwwg nyiilu mwlwngam kvvyw-tadal doognum.

¹⁶‍Jeruiyag ko tuup Joabnvn sipai tulungam kaam dvb jinum, hoo Ahiludwg ko tuup Jehosapat xiqtu yaan bov,

¹⁷‍hoo Ahitubwg ko tuup Jadok la Abiyatarwg ko tuup Ahimelek bunyiv nyubv, hoo Seraiya svkretvri ngv

¹⁸‍hoo Jehoiadag ko tuup Benaia Keret nyi tulungam la Pelet nyi tulungam kaaya bov, hoo Debidg ko tuup tulungv nyubv.