Read Nyishi 2 SAMUYEL 9 Bible Online

2 SAMUYEL 9 - Nyishi bible

2 SAMUYEL 9

¹Hoo Debid benum, “Jonatanwg eminho ngo mwam anyangam kaakin dvb, Soulwg imiq hoqgv sija nyi akkam dook maai yv?”

²‍Soulwg nyera Jiba hvl eminam ak doonum, hoo bulv mwam Debid dookub goqanum. Hoo lvpw atv mwam benum, “No Jiba yv?” Hoo mwv benum, “Vv, ngo noqg nyerangv.”

³‍Hoo lvpw atv benum, “Soulwg imiq hoqgv nyi akkam sija dook maai yv, ho Pwnbog emin gab ngo mwam anyangam kaakin tayin?” Jiba lvpw atam benum, “Jonatanwg ko tuup ak dooxiq do; mwwg lvpiangv lukum dvn.”

⁴‍Ho lvpw atv mwam benum, “Mwv hogloq ho doodo?” Hoo Jiba lvpw atam benum, “Mwv Lo-debar ho Ammielwg ko tuup Makir namho doodo.”

⁵‍Ho lvpw at Debid nyi kanam tvl mwam Lo-debar ho Ammielwg ko tuup Makir namho hoqgv baqa mvnum.

⁶‍Hoo Soulwg ko tuupwg, Jonatanwg ko tuup Mepiboset Debid dookub haanum hoo mwwg nyuqm mam pvxwtvl hoo mwam modul xumnum. Hoo Debid benum, “Mepiboset!” Hoo mwv birwqnum, “Kaato, ngo noqg nyerangv.”

⁷‍Hoo Debid mwam benum, “Bos maabv, hoggab noqg ab Jonatanwg emin gab ngo nam anyangam kaakin tayin, hoo noqg ab Soulwg gvdangam nam ngo jikur taikun, hoo lwxiam no ngoqg tebol so dvmin gvtayin.”

⁸‍Hoo mwv modul xumnv hoo benum, “Ngo nyiloqkam iky sinbo homyin nwtwq su, noqg nyerangv hog hvvtwngv i?”

⁹‍Ho lvpw atv Soulwg nyera Jibanvn goqnum hoo mwam benum, “Soulwg gumna hvnam mam la mwwg imiq mwlwngam ngo noqg nyiit atwg ko hosiqkam jig yukun.

¹⁰‍Hoo no la noqg ko tuup tulungv hoo noqg nyera tulungv mwwg gvdangam rongo mwjto hoo dvsam noqg nyiit atwg ko hosiqkam dvm dvb jito. Hvbmabde Mepiboset noqg nyiit atwg ko hosiqkv lwxiam ngoqg tebol so dvmin gvtayin.” Jiba ko tuup cam leq ang go hoo nyerangv camnyi go doonum.

¹¹‍Ho Jiba lvpw atam benum, “Ngoqg nyiit at lvpw atv mwwg nyerangam gaml jinam hvb, noqg nyerangv nyitayin.” Hoqgab Mepiboset, lvpw atwg ko tuup ak hvb nyitwl Debidg tebol ho dvmin gvnum.

¹²‍Hoo Mepiboset ko tuup anyo bo ak doonum, mwwg eminv Mika. Hoo Jiba namho doonbo mwlwngv Mepibosetwg nyera tulub nyiknum.

¹³‍Hoqgab Mepiboset Jerusalemho doonum, hoggab mwv lwxiam lvpw atwg tebol ho dvnum. Mwwg lvpia dvvnyi-dvvnyiv lukumnum.