Read Nyishi 1 LVPW ATWG 1 Bible Online

1 LVPW ATWG 1 - Nyishi bible

1 LVPW ATWG 1

¹Lvpw at Debid nyekam kunum hoo vnywngv wlar kunum. Hoo bulv mwam vjv pvmj sunum, hvbmabde mwv og hempa maanum.

²‍Hoqgab mwwg nyera tulungv mwam benum, “Ngoqg bir lvpw atgab nyem nyijwr lo meegaq to, hoo mwnwn lvpw atam kaal doog mvto hoo mwwg bonam nyimto. Noqg laqpo ho mwnwn karm to, ho ngoqg bir lvpw at og tayin.”

³‍Hoqgab bulv Israel dwrbu-dwrya mwlw ho nyem nyijwr anya ak meegaqnum, hoo Sunam hoqgv Abisagnvn meepanum, hoo mwnwn lvpw at dookub boanum.

⁴‍Nyem nyijwr ak hv anya jaqnum, hoo mwn lvpw atam kvvi-kaacal hoo bon nyijnum, hvbmabde lvpw atv mwnwn hog cengmanum.

⁵‍Haggitwg ko tuup Adonija atv-atam jooiyin-joorab sul begamv, “Ngo lvpw atwb swwtayin.” Hoo mwv atv ceriot tulungam la svpur xarl wgbo tulungam mwv mwx-mvaqnum, hoo mwwg otuqb nyi camng go xarco mvdwb mvnum.

⁶‍Mwwg abv nywywngam mwam hemp maab nyimanum hoo hvl tox kvka maanum, “Hoggub no soq sib nyipa kun?” Mwv kam kaapbo nyega ak gob nyinum, hoo Absolom kokwb mwam dwrbuqnum.

⁷‍Jeruiyag ko tuup Joab la nyub Abiyatar lvgab goobwq kunum. Hoo bulv Adonijanvn nyimin gvnum hoo mwam svkanum.

⁸‍Hvbmabde nyub Jadok la Jehoiadag ko tuup Benaia hoo nyiqry benbo Natan hoo Debidg atorbo nyi Simei la Rei Adonija lvgab doomanum.

⁹‍Adonija sviyangam hvvbam, hoo jwwtw bo svv-ngam Wlw Hvreqbo lvgab En-rogel bviywrho pwr jinum, hoo lvpw atwg ko tuup tulu mwwg vbw-bor mwlwngam hoo Judag xinam saab mwlwngam mwv goqnum,

¹⁰‍hvbmabde mwv nyiqry benbo Natan ho Benaia ho atorbo nyi tulungam ho mwwg bor Solomonnvn goqmanum.

¹¹‍Ho Natan Solomonwg ann Betsebanvn benum, “Haggitwg ko tuup Adonija lvpw at gob nyipa ku, no ham tapa dvi yv hoo ngulug bir at Debid ham hoqg cengma ta?

¹²‍Hoqgab sija soqb haato, ngo nam tomswr tayin ho no atv noqg swwgam hoo noqg ko tuup Solomonwg swwgam ywwlin tayin.

¹³‍Sija da lvpw at Debid dookub wn hoo mwam beta, ‘Ngoqg bir lvpw ata, noqg paqnam no hvl bel dingr maan mvi yv, “Noqg ko tuup Solomon ngoqg kokwb pvvb bwwl doog tayin, hoo mwv ngoqg pwqlw so dootayin”? Hoggub sija Adonija lvpw atwb nyipa kun?’

¹⁴‍Ho hwdlo no hoqhvb lvpw atwg lvgab goodul dooikam, ngo kam noqg kokwb haatayin hoo noqg gomcwr benam tulu ham twwswl betayin.”

¹⁵‍Hoqgab Betseba lvpw atwg mwwg pwqlwb haanum (hoq moodho lvpw atv nyekam konguq kunum, hoo Sunam hoqgv nyem nyijwr Abisa lvpw atam kvvi-kaacal doonum).

¹⁶‍Betseba lvpw atam dumpo pvxwl xumnum, hoo lvpw atv benum, “Hoggv noqg mwwbynamv?”

¹⁷‍Mwn mwam benum, “Ngoqg bir at, noqg Pwnbo At Swg eminho noqg paqnam no dingrwl begamv, ‘Noqg ko tuup Solomon ngoqg kokwb pvvb bwwl doog tayin, hoo mwv ngoqg pwqlw ho dootayin.

¹⁸‍Hoo sija kaato, Adonija lvpw at gob nyipa ku, ngoqg bir lvpw at no hoqham hog cengma yv.

¹⁹‍Mwv hvvbam, jwwtw bo svv-ngam, hoo sviyangam naleqgo pwr jinum, hoo lvpw atwg ko tuup mwlwngam, nyub Abiyatarnvn, hoo sipai saab Joabnvn goqnum, hvbmabde noqg nyera Solomonnvn mwv goqmanum.

²⁰‍Hoo sija ngoqg bir lvpw at, Israel mwlwg vnyiqkv nam tuugab do, ngoqg bir lvpw atv bulam betam jito noqg kokwb hiyv pwqlw ho dootayin.

²¹‍Hvbmab hoqhv wleq kubnyiloqkam, hwdlo ngoqg bir lvpw at mwwg ab tulug lvgab yubyi kun, ho ngo la ngoqg ko tuup Solomonnvn alman gob xita yuku.”

²²‍Hwdlo mwn lvpw at lvgab agam goodu yukho, nyiqry benbo Natan urab haanum.

²³‍Hoo lvpw atam bulv betamnum, “Soq si nyiqry benbo Natan.” Hoo hwdlo mwv lvpw atwg agaho haanum, ho mwwg nyuqm mam kedwb nywbabl pvxwl xumnum.

²⁴‍Hoo Natan benum, “Ngoqg bir lvpw at, no ben mvi yv, ‘Noqg kokwb Adonijanvn pvvb bwwl doog mvdwb, hoo noqg pwqlw ho mwam doom dvb’?

²⁵‍Hoggab mwv soq aal so ilayil hvvbam, jwwtw bo svv-ngam, hoo sviyangam naleqgo pwr jipa kun, hoo lvpw atwg ko tuup mwlwngam, sipai saab tulungam, hoo nyub Abiyatarnvn goqnum. Hoo kaato, bulv dvl-twwl mwwg agaho begamv, ‘Lvpw at Adonija swwiyu nvka!’

²⁶‍Hvbmabde ngam, noqg nyera nyub Jadok, hoo Jehoiadag ko tuup Benaia, hoo noqg nyera Solomonnvn mwv goqmanum.

²⁷‍Soq pagoq sam ngoqg bir lvpw atam cengm nvm yv hoo hiyv ngoqg bir lvpw atwg kokwb mwwg pwqlw ho dootayin noqg nyera tulungam no betam maan mvi yv?”

²⁸‍Ho Lvpw at Debid birwqnum, “Betsebanvn ngoqg dookub goqa tvb.” Ho lvpw atwg agaho mwn haanum hoo lvpw atwg otuqho daqnum.

²⁹‍Hoo lvpw atv dingnv begamv, “At Sw swwl doody deedib, hiyv ngoqg yvjam vs-axaq hoqgv pvlyw naalin bov,

³⁰‍Israelwg Pwnbo At Swg eminho nam ngo dingl begyin, ‘Noqg ko tuup Solomon ngoqg kokwb pvvb bwwl doog tayin, hoo ngoqg pwqlw ho ngoqg kwlib mwv dootayin,’ soq sam ngo soq aal so kam nyim tayin.”

³¹‍Ho Betseba mwnwg nyuqm mam deela ho pvxwl hoo lvpw atam xuml benum, “Ngoqg bir lvpw at Debid nwrba gob dooky nvka!”

³²‍Lvpw at Debid benum, “Nyub Jadok nvla nyiqry benbo Natannvn, hoo Jehoiadag ko tuup Benaianvn goqto.” Ho bulv lvpw atwg agaho haanum.

³³‍Hoo lvpw atv bulam benum, “Noqg bir atwg nyera tulungam noqg lvgab boola yi hoo ngoqg ko tuup Solomonnvn ngoqg atwg svdam aoho caol wwm to, hoo mwam Gihon ho boal igto.

³⁴‍Hoo nyub Jadok nvla nyiqry benbo Natannvn hoqho mwam Israelwg aoho lvpw at gob xuqlin mvto. Ho tuuly miql dvl hoo beto, ‘Lvpw at Solomon swwiyu nvka!’

³⁵‍Mwwg kokwb nulv ho caamin gvta, hoo ngoqg pwqlw ho mwv dootayin, hoggab ngoqg kwlib mwv lvpw at gob nyitayin. Hoo mwam ngo Israel la Judag aoho pvvb bwwl doog mvdwb xuqlin pakun.”

³⁶‍Hoo Jehoiadag ko tuup Benaia lvpw atam birwqnum, “Hvbjaq nyimto! Ngoqg bir lvpw atwg Pwnbo At Swa, soq sib nyimto.

³⁷‍Ngoqg bir lvpw atwg lvgab At Sw doonum, hoq hvbkalam mwv Solomonwg lvgab doon ka, hoo ngoqg bir Lvpw Debidg pwqlwngam mwwg pwqlwngv koi yaan ka.”

³⁸‍Hoqgab nyub Jadok, nyiqry benbo Natan, hoo Jehoiadag ko tuup Benaia hoo Keret nyi tulungv hoo Pelet nyi tulungv ilayil hoo Solomonnvn Lvpw at Debidg svdam ho cao mvtwl hoo mwam Gihon ho boanum.

³⁹‍Nyub Jadok hoqho kuty uddu duug tombu hoqgv naalayil hoo Solomonnvn kuty paql xuqlinum. Ho bulv tuuliam miqnum, hoo nyiilungv benum, “Lvpw at Solomon swwiyu nvka!”

⁴⁰‍Hoo nyiilungv mwwg kokwb piul tabl, hoo vcjaqb hwnyir-hvmarl rumd goqrwl wmin gvnum, ho bulug yal dugam gab swcw gv tvqnyi gob taqcnum.

⁴¹‍Adonija la mwwg lvgab nyiin dooba bo mwlwngv bulug durum dvnam mam dvnyia yukho bulv hoqham tapanum. Hoo hwdlo tuuly miqnam yalam Joab tapa yin, mwv benum, “Hoggv yu bopam ura bolo hur-marab dug dvn bv?”

⁴²‍Hwdlo mwv agam goodu yukho, kaato nyub Abiyatarwg ko tuup Jonatan haanum. Hoo Adonija benum, “Urab haato, hoggab no xinam nyiingv hoo tugu puiyam baqa panv.”

⁴³‍Jonatan Adonijanvn birwqnum, “Ma, ngulug bir Lvpw at Debid Solomonnvn lvpw at gob mvg nukba,

⁴⁴‍hoo lvpw atv nyub Jadok, nyiqry benbo Natan, hoo Jehoiadag ko tuup Benaia, Keret nyi tulu ngvla Pelet nyi tulug lvgab mwam kanam gvnkun. Hoo mwam bulv lvpw atwg svdam ho caol wwm gvnkun.

⁴⁵‍Hoo nyub Jadok la nyiqry benbo Natan mwam Gihon ho lvpw at gob kuty paql xuqlin gvnkun, hoo bulv hoq hoqgv hvnyir-hvmarl caan kun, hoqgab bopam ura lo hur-marab dudu dvn. Hoq yalam sulak nulv tapa pakun.

⁴⁶‍Solomon xinam pwqlw ho dood ku.

⁴⁷‍Hoq aoho lvpw atwg nyera tulungv ngulug bir Lvpw at Debidnvn haalayil aljaqb nyipa hvl poqkumnv begamv, ‘Noqg Pwnbov Solomonwg eminam nam yuubin yaadwb mvg nvka, hoo mwwg pwqlwngam noqg pwqlwngam koi yaadwb mvg nvka.’ Hoo lvpw atv mwv atv mwwg kartam nanho siknum.

⁴⁸‍Hoo lvpw atv hvlkam benum, ‘Israelwg Pwnbo At Sw xinam jaqkv, hiyv soq aal so ngoqg pwqlw lo nyi ak doom dvb jilin paku, ho ham ngoqg atwg vnyiqkv kaapa paku.’”

⁴⁹‍Ho adonijag nyiin mwlwngv tvmdwrnum hoo bulv gorab laikul hoo mwwg at atwg lamtab wknum.

⁵⁰‍Hoo Adonija Solomonnvn bosnum. Ho mwv gorab layil hoo yugw cwwrwho cwwgwl doonum.

⁵¹‍Ho hoqham Solomonnvn betamnum, “Kaato, Adonija Lvpw at Solomonnvn bosnum, hoggab kaato, mwv yugw cwwrwho cwwgwl doodo, ho begamv, ‘Lvpw at Solomonnvn otuqcob mwwg nyerangam lyoqr orioq lvgab sim dvb mvram hvl mwam dingr mvto.’”

⁵²‍Hoo Solomon benum, “Mwv atv xinam nyi gob kaakin baloqkam mwwg dum soog nvkam gvdaho yoql ram, hvbmabde nyic-nyiangam mwwg ho kaapa baloqkam, mwv sitayin.”

⁵³‍Hoqgab Lvpw at Solomon pui bilwqtvl hoo bulv mwam yugw cwwrw cwwgw ko hoqgv boal boolnum. Hoo mwv haanum hoo Lvpw at Solomonnvn xumnum, hoo Solomon mwam benum, “Noqg nammwb wn ku.”