Read Nyishi 1 LVPW ATWG 11 Bible Online

1 LVPW ATWG 11 - Nyishi bible

1 LVPW ATWG 11

¹Lvpw at Solomon Parog nyem ko lvgab naleqgo nyoodo nyem tulungam abynum: Moab nyem mam, Ammon nyem mam, Sidon nyem mam, hoo Hittait nyem tulungam,

²‍hogloq nyob dvpar tulu ham At Sw Israel nyiilungam benum, “Nulv bulug lvgab nyem naama bvka, ho bulam kam nul galoqkv naam mvmabv, hoggab bulv bulug hangam bulug pwnboam mwwjw mvta yi.” Solomon soq tulu sam vcjaqb abynum.

³‍Mwv vi-koory nywxwngv 700 go, hoo xwwbaq nywxwngv 300 go doonum. Hoo mwwg nywxw tuluhv mwwg hangam aadob booxar kunum.

⁴‍Hoggab hwdlo Solomon nyekam yukho mwwg nywxw tulungv mwwg hangam asaq pwnbo tulungam xum dvb booxar kunum, hoo mwwg ab Debidg jvqtwnam hvb mwwg hangv mwwg Pwnbo At Swn jvqtw kumanum.

⁵‍Hoggab Solomon Sidon nyi tulug Astoret pwn annvn, hoo Ammon nyi tulug bulum-kacnam Milkomnvn xumnum.

⁶‍Hoqgab Solomon At Swg kaagaho almanam nyinum hoo mwwg ab Debidg At Swn wmin gvnam hvb wmin gvk maanum.

⁷‍Ho Solomon Moabg bulum-kacnam Kemos gab puutu aoho xumk nammam mwjnum, hoo Ammon nyi tulug bulum-kacnam Molek gab dou-cagag Jerusalem puutu ho mwjnum.

⁸‍Hoo mwwg nyoodo nywxw tulu gab mwv soq mwlw sam mwjnum, ho bulug pwnbo tulungam akiam la pwr jinam mam jimnum.

⁹‍Hoo At Sw Solomon lvgab hang lengnum, hoggab mwam lwnyi go kaakin bo, Israelwg Pwnbo At Sw hoqgv mwwg hangv aado kunum

¹⁰‍hoo mwam asaq pwnbo tulug kokwb wma bvk hvl soq pagoqkam mwam gaml jinum. Hvbmabde mwv At Swg gaml jinam mam pvvk maanum.

¹¹‍Hoqgab At Sw Solomonnvn benum, “Soq sam no nyil doopa ku hoo nam ngoqg gaml jil ngoqg birnam pvvbam hoo ngoqg nyij-mujam no pvvk ma, jvqtw jaqb lvpw-hatiam noqg hoqgv mvpin tayin hoo ham noqg nyerangam jitayin.

¹²‍Hvbsujaqkam noqg ab Debidg emin gab noqg swwl dood mood so ham ngo nyiram, hvbmabde noqg ko tuup alaq hoqgv ham tvqnyi gob mvpin tayin.

¹³‍Hvbsujaqkam, ngo lvpw-haty mwlwngam mvpin ram, hvbmabde ngoqg nyera Debidg emin gab hoo Jerusalem mam ngo xuqlin ko-gab, noqg ko tuup lvgab ngo nyob akwn jitayin.”

¹⁴‍Hoo At Sw Solomonnvn vs-axaqb ceeko mvdwb Idom hoqg Hadadnvn mvnum. Mwv Idom hoqg xinam imiq dvpar gob nyinum.

¹⁵‍Hoggab hwdlo Debid Idom ho dooyikho, hoo Joab sipai saab odumb caanv mengnam nyi tulungam svma liinum, mwv Idom ho nyega mwlwngam patabnum

¹⁶(hoggab Joab la Israel mwlwngv hoqho pool barx gob doonum, mwv Idom nyega tulungam mingtwr maady deedib doonum).

¹⁷‍Hvbmabde hwdlo Hadad ko anyo xiqyikho, Hadad la mwwg abwg nyera tulu gon la Idom nyi tulu go Ijiptwb kenum.

¹⁸‍Bulv Midian hoqgv lenglayil hoo Paran ho haanum hoo Paran hoqgv nyi meeg boolayil Ijipt lvpw at Parog dook Ijipt ho haanum, ho mwam nam namg la dvsv la gvdangam mwam jinum.

¹⁹‍Hoo Hadadnvn Paro vcjaqb vnyiq kvvlwql hoo mwwswnum, hoqgab mwv mwam mwwg nywxw, vi-koory Tapeneswg bwrm mam nyem jinum.

²⁰‍Hoo Tapneswg bwrm hv mwam mwwg ko tuup Genubatnvn dwrbuqjnum, hiyam Tapnes Parog namho sokamnum. Hoo Genubat Parog namho Parog ko tuup tulug pengko ho doonum.

²¹‍Hvbmabde hwdlo Hadad Debid sitkul mwwg abwg lvgab svma liiknam mam hoo sipai saab Joabg sinam mam tapa yin, Hadad Paronvn benum, “Ngam wwm tukub, ho ngoqg gvdab ngo wdwb mwwdku.”

²²‍Hvbmabde Paro mwam benum, “Hoggv no ngoqg lvgab dootwl pwwma-cwma tvl noqg atwg gvdab no wde kul hvl bedwn?” Hoo mwv mwam benum, “Ngam wwm dvb jila bv.”

²³‍Hiyv mwwg nyiit at Jobag lvpw at Hadadejer hoqgv kelin bo, Eliyadag ko tuup Rejonnvn Pwnbov mwam vs-axaql ceeko mvdwb mvnum.

²⁴‍Hoo Debid nyiam mengxo kokw so, mwv nyi tuugin goqkum layil hoo mwv taleqbo dvpar akam nyig bob nyinum. Hoo bulv Damaskaswb wnum hoo bulv hoqho doonum hoo mwam Damaskaswg lvpw at gob mvnum.

²⁵‍Solomonwg moodho mwv Israelam Hadadwg nyinam hvb lwxiam vs-axaq dvb nyil doonum. Hoo mwv Israel hoqgv lenglayil hoo Siriyangam pvvb bwwl doognum.

²⁶‍Iprayimg Jereda hoqgv Nebat gv ko tuup Jeroboam, Solomonwg nyerangv, mwwg ann eminv Jerua, xwwmy akv, hvvkam lvpw atam ceeko dvb nyirabnum.

²⁷‍Hoo mwv hoggub lvpw atam ceeko koorabnam si hvbnyiloqkam, Solomon Millo ho nam mvnum, hoo mwwg ab Debidg bopam yaqko bo tulungam mutumnum.

²⁸‍Jeroboam hog mwlwngam nyilaqbo nyi gob nyinum, hoo hwdlo Solomon yaapa akam kwr jaqb bon nyinam mam kaapa yin mwv mwam Josapg nombu ho nwwteql nyera-paqn hvb bon nyinbo tulungam nyig mvdwb xuqlinum.

²⁹‍Hoo hoq moodho, hwdlo Jeroboam Jerusalem hoqgv lvvgwb lengyikam, nyiqry benbo Silon hoqg Ahija mwam lamta ho kaapanum. Ahija mwv atv nitbo vjam koonum, hoo vnyiv vp-cwkwb rooto ko gvdaho yvnum.

³⁰‍Ho Ahija mwwg nit vj koonam mam gvbw tvl, hoo ham camleq vnyi gob swrmwqnum.

³¹‍Hoo mwv Jeroboamnvn benum, “No atv wyw gon naato, hoggab soq sib Israelwg Pwnbo, At Sw bedo, ‘Kaato, Solomonwg alaq hoqgv ngo lvpw-hatiam tvqnyi gob mvpin tayin hoo nam nyob wyw gon jitayin

³²(hvbmabde ngoqg nyera Debidg emin gab la Jerusalem bopam mam ngo Israelwg nyob tulu hoqgv xuqlin ko-gab, mwv nyob akin gon naatayin),

³³‍hoggab bulv ngam haqpaq paku hoo Sidon nyi tulug Astoret pwn annvn, Moabg pwnbo Kemosnvn, hoo Ammon nyi tulug Milkom pwnboam xumnum, hoo mwwg ab Debidg nyinam hvb bulv ngoqg lamtab wma, ngoqg kvvlwq koob nyima hoo ngoqg nyij-mujam la ngoqg pvvb tulungam pvvma.

³⁴‍Hvbsujaqkam, mwwg alaq hoqgv ngo lvpw-haty mwlwngam naareqram, hvbmabde mwwg swwnam xaqb ngo mwam pvvb bwwl doog mvtayin, hoggab ngoqg nyera Debidg emin gab, hiyam ngo xuqlinum, hoo hiyv ngoqg gaml tulungam la ngoqg nyij-muj tulungam pvvnum.

³⁵‍Hvbmabde mwwg ko tuup alaq hoqgv ngo lvpw-hatiam naatayin hoo hoqg nyob wyw gon nam ngo jitayin.

³⁶‍Hvbsujaqkam mwwg ko tuupam ngo nyob akin gon jitayin, ho ngoqg eminam doom dvb ngoqg daalinam bopam ho, ngoqg nyera Debid lwxiam Jerusalemho ngoqg agaho lemp akwb nyinum.

³⁷‍Hoo nam ngo naatayin, hoo noqg mwwby koob no pvvb bwwl doog tayin, hoo no Israel ho lvpw at gob nyitayin.

³⁸‍Hoo ngoqg nyera Debidg nyinam hvb, nam ngoqg benam mwlwngam tabnyiloqkam, hoo ngoqg lamta tulungam wb nyiloqkam, hoo ngoqg nyij-mujam la ngoqg gaml tulungam pvvl ngoqg vnyiq kaagaho hoggv jvqtw dvn ham nyibnyiloqkam, ngo noqg lvgab dooba tayin hoo Debidnvn lvpw at gob mvnam hvb nam ngo mvtayin, hoo nam ngo Israelam jitayin.

³⁹‍Hoo ngo Debidg hosiqkam vs-axaq dvb mvtayin, hvbmabde nwrba xaqb nyiyu ram.’”

⁴⁰‍Hoqgab Solomon Jeroboamnvn mengdwb meegaqnum. Hvbmabde Jeroboam gorabl Ijipt gv lvpw at Sisak dookub Ijipt urab kilwqnum, hoo Solomonwg sinam xaqb Ijipt ho doonum.

⁴¹‍Solomonwg asaq nyinam mwlwngam, hoo mwwg hoolu-deed nyinam mam, hoo mwwg mwwlaql nyijwq-nyegam gamnam mam Solomonwg Bon nyinam mam xeqp ko Kitap ho xeqp maap nvi yv?

⁴²‍Hoo Solomon Jerusalem hoqgv Israel mwlwngam pvvb bwwl doognamv vnyw campy gob nyinum.

⁴³‍Hoo Solomon mwwg ab lvgab siknum hoo mwwg ab Debidg bopam ho liiknum. Hoo mwwg kwlib mwwg ko tuup Rehoboam pvvb bwwl doognum.