Read Nyishi 1 LVPW ATWG 12 Bible Online

1 LVPW ATWG 12 - Nyishi bible

1 LVPW ATWG 12

¹Rehoboam Sekemb wnum, hoggab mwam lvpw at gob mvdwb Sekem ho Israel mwlwngv hookumnum.

²‍Hoo Nebatwg ko tuup Jeroboam tapa twqda kalam (hoggab mwv Lvpw at Solomon hoqgv keleqlayil Ijipt ho mwv dooxiqnum), ho Jeroboam Ijipt hoqgv hookur kunum.

³‍Hoo bulv nyi kanam tvl mwam goqa mvnum, hoo Jeroboam la Israel nyi mwlwngv hookuml hoo Rehoboamnvn benum,

⁴“Noqg abv ngulam vigo vgw dvb mvnum. Hoqgab sija noqg ab ngulam vcjaqb vgw dvb bon nyimnam sam hvrab dvb mvto, hoo ngulv nam bon nyij tayin.”

⁵‍Mwv bulam benum, “Aal loum gob nulv soqgv wnku, ho lokta ngoqg dookub hookur ta.” Ho nyiilungv hoqgv wleqnum.

⁶‍Ho Lvpw at Rehoboam nyiixa tulu hoqgv tomswr-honyam naanum, hiyv mwwg ab Solomonwg swwl dooyikho mwwg agaho daqm tvl mwv begamv, “Soq nyiilu sam hoggub ngo birwq tayin ham ngam tomswrl bekin tvbv?”

⁷‍Hoo bulv mwam benum, “No soolo soq nyiilu sam bon nyij baloqkam hoo bulam albo agam mam birwql gooba loqkam, ho bulv noqg nyera-paqnwb nwrba xaqb swwtayin.”

⁸‍Hvbmabde mwv nyiixa bo tulug tomswr-honynam mam apaqnum hoo mwwg agaho yaapa acam go daqn bo hoqgv mwv tomswr-honynam mam naanum.

⁹‍Hoo mwv bulam benum, “Noqg abwg vgw dvb bon nyimnam sam ngulam hvrab dvb mvtbv hvl, ‘Ngam benbo nyiilug benam sam hoggv ngulv birwq tan nulv tomswr kaaka to’?”

¹⁰‍Hoo mwwg swwtam yaapa tuluhv mwam soq sib benum, “Noqg ab ngulam vgw dvb mvpa ku, hvbmabde no ngulam hvrab dvb mvtbv hvl, nam benbo nyiilu sam, no soq sib soq nyiilu sam beto, ‘Ngoqg lvqcw cwwnyia ri si ngoqg abwg gvvsam jwwkam yaadwn.

¹¹‍Hoo sija ngoqg abv nulam vgw dvb mvpa loqkam, ngo nulug vgwngam vbw yaiya tayin. Ngoqg ab nulam xoociq lvgab gwrnyiaq paloqkam, hvbmabde ngo nulam pooxu-yvs lvgab gwrnyiaq tayin.’”

¹²‍Hoqgab “Aal loum kokwngam ngoqg dookub lokta haata hvl benam hvb,” Jeroboam la nyiilungv aal loum kokw so lvpw at Rehoboam dookub haanum.

¹³‍Hoo lvpw atv mwam nyiixa tulug tomswr-honynam mam apaqtvl, mwv nyiilungam tac-taya dvb birwqnum,

¹⁴‍mwv bulam yaapa tulug tomswr-honynam hvb agam gool begamv, “Ngoqg abv nulam vgw dvb mvnum, hvbmabde ngo nulug vgwngam vbw tayin. Ngoqg ab nulam xoociq lvgab gwrnyiaq paloqkam, ngo nulam pooxu-yvs lvgab gwrnyiaq tayin.”

¹⁵‍Hoqgab lvpw atv nyiilu benam mam tamanum, hoggab hoqhv At Sw Silon hoqg Ahijanvn Nebatwg ko tuup Jeroboamnvn mwwg agam gooknamv niqtuq lengm dvb nyinum.

¹⁶‍Hoo hwdlo Israel mwlwngv kaaknamv lvpw atv bulug benam mam tama yin, nyiilungv lvpw atam birwqnum, “Debid ngul gab hoggv? Ngulv Jesse ko tuup hoqgv otu naas dookma. Israel nyi tulungv nulug tombu doogwb wtku! No Debid nombungam atv kaato.” Ho Israelv bulug tombu doogwb wknum.

¹⁷‍Hvbmabde Juda bopam ho doonbo Israelam Rehoboam nyiilungam pvvb bwwl doognum.

¹⁸‍Ho Lvpw at Rehoboam, nyera-paqn hvb nwwteq tvl bon nyin boam kaaya bo Adoramnvn kanamnum, hoo Israel nyiilungv mwam wlw lvgab hurxnum. Hoo Lvpw at Rehoboam nyebia jaqb mwwg ceriot ho caolayil Jerusalem keknum.

¹⁹‍Hoqgab soq aal namgub Israelv Debidg nombungam ceekol taleqnum.

²⁰‍Hoo hwdlo Israelv Jeroboam hookur pak hvl tapa yin, bulv pui kanam tvl hoo mwam dookumko ho goqanum hoo mwam Israelwg lvpw at gob mvnum. Hoqho Debidg nombungam nyimin gvnbo akkam dook maanum hvbmabde Juda nyob arongv doomin gvknum.

²¹‍Hwdlo Rehoboam Jerusalemho hvvc yukho, mwv Judag nombungam la Benjaminwg nyobam goqkumnum, ho Israelwg nombungam ceekol nyob pam dvb, nyob panbo nyi tulungam 180,000 go xuqlinum, Solomonwg ko tuup Rehoboam lvpw-hatiam nookur dukub nyinum.

²²‍Hvbmabde Pwnbog gomcwrv Pwnbog nyi Semaiyanvn haanum:

²³“Judag lvpw at Solomonwg ko tuup Rehoboamnvn la Judag nombungam hoo Benjaminwg nyobam la nyiilungam beto,

²⁴‘Soq sib At Sw bedo, Nulv caamabv ho nulug atwg imiq dvpar Israel nyiilungam nyob pamabv. Nyiicwr-cwrxiv mwwg nammwb wkur kunum, hoggab soq si ngoqg hoqgv haadwn.’” Hoqgab bulv At Swg gomcwram tape kul At Swg gomcwr bekjaqb lokta nammwb wkur kunum.

²⁵‍Ho Jeroboam Iprayimg diisw gvdag Sekem ho pamdangam mvtwl hoo doonum. Hoo mwv hoqgv lenglayil Penuel pamdangam mvnum.

²⁶‍Hoo Jeroboam mwwg hangho benum, “Sija lvpw-hativ Debidg nombub wkur tai yi.

²⁷‍Hoggab soq nyiilu si At Swg dvrwq namlo Jerusalemho caalayil pwr aky jibnyiloqkam, ho soq nyiilug hangv lokta bulug nyiit at Judag lvpw at Rehoboam dookub wkur tai yi, hoo bulv ngam mengta yi hoo Judag lvpw at Rehoboam dookub wkur tai ku.”

²⁸‍Hoqgab lvpw atv tomswr-honyam naanum hoo hun hoqgv svv ko dornyi go mvnum. Hoo mwv nyiilungam benum, “Nulv Jerusalemb wdwb vigo aado jaqdo. Israela, kaato nulug pwnbo tulu sam, hiyv nulam Ijipt gvda hoqgv boolin kunbov.”

²⁹‍Hoo mwv akwn Betel ho mvpnum, hoo akwn ham mwv Dan ho pvvnum.

³⁰‍Ho soq si nyic gob nyiknum, hoggab nyiilungv Dan ho namgub wnv hoq akwg agaho bulv xumnum.

³¹‍Mwv puutu aoho dvrwq namlongam mvnum hoo Lebi nyob dvpar maanbo nyiilu hoqgv mwv nyubam xuqlinum.

³²‍Hoo Judaho durum dvnam hvb, Jeroboam pool piinwg camleq loong aalam durum dvdwb aalam xuqlinl apnum, hoo mwv yugw ho pwr tulungam aky jinum. Hoqgab mwv Betel ho mwwg mvnam hun svv ko tulungam pwr jinum. Hoo puutu aog dvrwq namlo gab mwv nyub xuqlinam tulu ham mwv Betel ho pvvnum.

³³‍Pool piinwg camleq loong aalam mwwg hang mwwlwq koob mvpnam Betel urag yugw lwkw ho mwv caanum. Hoo mwv Israelwg nyiilu gab durum aalam xuqbwql xuqlinum hoo yugw ho aky jitab caanum.