Read Nyishi 1 LVPW ATWG 13 Bible Online

1 LVPW ATWG 13 - Nyishi bible

1 LVPW ATWG 13

¹Hoo kaato, Pwnbo nyi ak Juda hoqgv At Swg gomcwram baqlayil Betel ho haanum. Jeroboam yugw lwkw ho aky jidwb doqdul doonum.

²‍Hoo nyi ak hv sogoql yugwngam ceekol At Swg gomcwram benum, “Yugwnga, yugwnga, soq sib At Sw bedo: ‘Kaato, Josiya eminam ko tuup ak Debidg nombu ho dwrbuq tayi, hoo nam aky jinya bo puutu tulug nyub tulungam mwv nam pwr jitayin, hoo noqg aoho nyia ko alongam wm partayin.’”

³‍Hoo aal lookin ho mwv kaacinam ak jilwl hoo begamv, “Soq si At Swg kaacin dvb agam goonamv: ‘Kaato, yugwngv yaqpia tayin, hoo hoqho mui doon boam tooiyiql toopaq tayin.’”

⁴‍Hoo hwdlo lvpw atv Pwnbog nyi ak Betelwg yugwngam sogoql ceekol benam mam tapa yin, Jeroboam mwwg alaqkv yugw hoqgv ijin banv benum, “Mwam nootu to.” Hoo nyi akam ceekol alaq ijin nanv mwwg alaqkv sengl laqyanum, ho mwwg alaqkam mwv atv siqkur nyok maanum.

⁵‍Pwnbog nyi akwg At Swg gomcwram benam hvbjaq, yugwngv yvqmwqnum, hoo yugw hoqg muiyam tooiyiql toopaqnum.

⁶‍Hoo lvpw atv Pwnbog nyi akam benum, “Ngoqg alaqkam ngam al mvdkub, sija noqg Pwnbo At Swg mwwswnam mam kotbv, hoo ngoqgab swgw tvbv.” Hoo Pwnbog nyi ak hv At Swn konum, hoo lvpw atwg alaqkv lokta otuq hvb alkunum.

⁷‍Hoo lvpw atv Pwnbog nyi akam benum, “Ngoqg lvgab nammwb haato, hoo no atv meeg doonul vjin-ata to, hoo ngo nam lvqc citayin.”

⁸‍Hoo Pwnbog nyi ak hv lvpw atam benum, “Noqg nam papo gon no ngam jis jaqkam, ngo noqg lvgab wmin gvram. Hoo soq nyook so ngo dvs gokam dvram ho iss gokam twwram,

⁹‍hoggab At Swg gomcwrv ngam gaml jil begamv, ‘No dvs gokam dvmabv ho iss gokam twwmabv ho noqg lamta haakwb no wkur kumabv.’”

¹⁰‍Hoqgab mwv lamta baasaqb wknum hoo Betel urab haak lamtab mwv wkur kumanum.

¹¹‍Nyiqry benbo nyekam ak Betel ho doonum. Hoo mwwg ko tuup tulungv mwwg dookub haalayil Betel ho Pwnbog nyi akv hoggv nyinam ham betamnum. Mwv hoggv lvpw atam gomcwr goonam hamkam bulv bulug abam betamnum.

¹²‍Hoo bulug abv bulam benum, “Hogloq lamtab mwv wnkun?” Hoo Pwnbog nyi ak hv Juda hoqgv haanum, mwwg ko tuup tulungv mwam hoqg lamtangam kaatamnum.

¹³‍Hoo mwwg ko tuup tulungam mwv benum, “Ngoqgab svdam mam mwx-mvaqto.” Hoqgab bulv mwwg gab svdam mam mwx-mvaqnum hoo mwv hoqb wnum.

¹⁴‍Hoo Pwnbog nyi akwg kokwb wmin gvnum hoo mwam kora svvn niikum ho doodu dvb kaapanum. Hoo mwv mwam benum, “No Juda hoqgv haanbo Pwnbog nyi ak hvvi yv?” Hoo mwv benum, “Ngo maab hoggv.”

¹⁵‍Ho mwv mwam benum, “Ngoqg lvgab nammwb haato hoo dvs loq dvto.”

¹⁶‍Hoo mwv benum, “Ngo noqg lvgab wkur lady ma, ho noqg lvgab wba dvb kam nyiram, ho soq nyok so ngo noqg lvgab dvs dvba dvb kam hoo iss twwba dvb nyiram,

¹⁷‍hoggab At Swg gomcwrv ngam benum, ‘No alo dvs gokam dvmabv ho iss gokam twwmabv, ho noqg haak lamtab no wkur kumabv.’”

¹⁸‍Hoo mwv mwam benum, “Ngo kam noqg hvb nyiqry benbo nyi akv, hoo At Swg gomcwram ngam gumtw begamv, ‘Mwam noqg nammwb bookur to ho mwam noqg namho dvsam dvm to hoo issam twwm to.’” Hvbmabde mwv mwam vm mvvnum.

¹⁹‍Hoqgab mwwg lvgab mwv wkurnum hoo mwwg namho dvsam dvnum hoo issam twwnum.

²⁰‍Hoo bulv tebol ho doonum, At Swg gomcwrv mwam bookur bo nyiqry benbo akam haanum.

²¹‍Hoo mwv sogoql Juda hoqgv haal Pwnbog nyi akam benum, “Soq sib At Sw bedo, ‘Hoggub no At Swg gomcwram tvjw maanum hoo noqg Pwnbov nam At Swg gaml jinam mam no pvvma pakun,

²²‍hvbmabde no hookur layil hoo dvsam dvpa ku hoo issam twwpa ku, mwv nam benum hoq nyookho, “Dvs dvmabv hoo iss twwmabv,” noqg gv apongam noqg ab tulug nyubu dookho hvvc kuram.’”

²³‍Hoo nyiqry benbo ak hv dvs-twwsam dvxo-twwxo gvpe kul, mwv mwwg bookurnam nyiqry benbo akam svdam ho caol wwm kunum.

²⁴‍Hoo mwv mwam wleq kunv lamta ho wdu yukho sony nyot dorg mwam wrwqnum hoo mwam cexnum. Hoo mwwg gv apongam lamta ho joopaq tvl doonum, hoo svdamv hoq bviywrho daqnum; ho sony nyotv svma bviywrho daqnum.

²⁵‍Hoo kaato, hoqb wpeq bo nyiingv gv apongam lamta ho joop tvl hoo sony nyotv svmangam daqdu gvnam mam kaapanum. Hoo nyiqry benbo nyekam dookwg bopam ho bulv haal hoqham betamnum.

²⁶‍Hoo hwdlo mwam bookur bo nyiqry benbo akv ham tapa yin mwv benum, “Soq si Pwnbog akv hiyv At Swg gomcwram tvjw maanum; hoqgab At Sw sony nyotho mwam jipa ku, ho At Sw mwam gomcwr gooknam hvb sony nyotv mwam cexwl hoo vmwq gob mvknum.”

²⁷‍Hoo mwv mwwg ko tuup tulungam benum, “Ngoqgab svdam mam mwx-mvaqto.” Hoo bulv ham mwx-mvaq jinum.

²⁸‍Hoo mwv wnum hoo mwwg gv apongam lamta ho joop tvl hoo svdam mvla sony nyotv svma bviywrho daqdu gvnam mam kaapanum. Sony nyot svmangam dvmanum hoo svdam mam cex maanum.

²⁹‍Hoo nyiqry benbo ak hv Pwnbog svmangam joorab layil hoo ham svdamho joop tvl hoo ham bopam urab boqkurl hoo xabl-riil mwam svma liinum.

³⁰‍Hoo mwv svmangam mwwg atwg nyubu ho joopnum. Hoo bulv mwwg gab xabl-riil begamv, “Oa, ngoqg bora!”

³¹‍Hoo kokw so mwam mwv liiknum, mwv mwwg ko tuup tulungam benum, “Hwdlo ngo siyi kun ngam Pwnbog nyi akam liik nyubu ho liila ka; ngoqg alo tulungam mwwg alo tulu bviywrho pvvla ka.

³²‍Hoggab Betel urab yugwngam la Samariya bopam tulug puutu aog xumk nam tulungam mwv ceekol At Swg gomcwr goonamv niqtuq lengtayin.”

³³‍Soq tulu si nyixo sujaqkam Jeroboam mwwg alman lamta hoqgv wkur maanum, hvbmabde puutu aog xumk nam tulu gab nyiilu hoqgv nyubam xuqlinl mvnum. Hiyv lajaqkam nyub swwnw boam mwv puutu aog xumk nam tulu gab nyubwb darxaqnum.

³⁴‍Hoo Jeroboamwg nombungv soq sib nyic nyigam gab, swcw nvg ao soqgv mwwg dvparam twrkiq-twrmal twrpaqnum.