Read Nyishi 1 LVPW ATWG 14 Bible Online

1 LVPW ATWG 14 - Nyishi bible

1 LVPW ATWG 14

¹Hoq moodho Jeroboamwg ko tuup Abija vcnum.

²‍Hoo Jeroboam mwwg nywxwngam benum, “Gorab to, hoo no atv gwwly to, ho no Jeroboamwg nywxwngv hvl nyi akkam cengm mvmabv, hoo Silob wn. Kaato, alo nyiqry kaal benbo Ahija doodwn, hiyv ngam benum ngo soq nyiilug aoso lvpw at gob swwta yi hvl.

³‍Noqg lvgab kabnam wtw lo tvqyw go, cwwnam wtw lo meeg, hoo tong ngola lo pvtaq go bwwlayil, hoo mwwg dookub wn. Ko si hoggv nyitayin mwv nam betam tayin.”

⁴‍Jeroboamwg nywxwngv hvb nyinum. Mwn gorabnum hoo Silob wnum hoo Ahijag namho haanum. Ho Ahija mwwg nyekam ko-gab mwwg vnyiqkv kaapa kumanum.

⁵‍Hoo At Sw Ahijanvn benum, “Kaato, Jeroboamwg nywxwngv noqg dookub haal mwnwg ko tuup vcbo pagoqkam nam tox tayin. Soq sib jaq no mwnwn beto.” Hwdlo mwn haai yikho mwn nyem asaq hvb nyinum.

⁶‍Hvbmabde hwdlo mwn viyap lwkw ho hvvnwq yin, Ahija mwnwg lvpia yal dunam mam tapanum, mwv benum, “Jeroboamwg nywxw haato. Hoggub no asaq nyem hvb nyitwl haadwn? Hoggab noqgab ngo cwqla maanam pui ak doodo.

⁷‍Wn, Jeroboamnvn betam ta, ‘Soq sib Israelwg Pwnbo, At Sw bedo: “Ngo nam nyiilug pengko hoqgv yuumnum hoo ngoqg nyiilu Israel aoho ngo nam nyigbo peelo gob mvnum

⁸‍hoo Debidg nombu hoqgv lvpw-hatiam mvpin hoo ham nam jinum, hoo hvbsujaqkam no ngoqg nyera Debid hvb nyikma, hiyv ngoqg gaml tulungam pvvnum hoo mwwg hvvjw lvgab ngoqg lvgab wmin gvnum, ho ngoqg vnyiq kvvlwqnam tulungam aro nyinum,

⁹‍hvbmabde noqg otuqho swwnbo mwlwngam no alman boam nyilv yaapa ku hoo ngam hang lengm dvb no atv asaq pwnbo tulug lvgab hoo yoqdwr guss tulu lvgab wpa ku, hoo ngam noqg langkwb hurpaq paku,

¹⁰‍hoqgab kaato, ngo Jeroboamwg nombungam vs-axaqkam haam tayin hoo Israel ho nyet ge hoo nyera ge nyega mwlwngam mvpaq tayin, hoo nyi akv kac-kanyiaqkam rvmtwrl rampaqnam hvb Jeroboamwg nombungam rampaq tayin.

¹¹‍Bopam uraho Jeroboamwg dvpar hoqgv nyi sib nyiloqkam ham iky tulungv dvtayin, hoo hiyv gon bvbin ho sib nyiloqkam doag pvtangv ham dvtayin, hoggab soq sam At Sw agam goopa kun.” ’

¹²‍Hoqgab gorab to, noqg nammwb wn. Hwdlo noqg lvpiangv bopam ho korlwq kalam kongv sitayin.

¹³‍Hoo Israel mwlwngv mwwg gab xabl-riil hoo mwam svma liitayin, hoggab mwam aro Jeroboamwg dvpar hoqgv nyubu ho liitayin, hoggab Israelwg Pwnbo At Sw mwwg aoho hog hempnam ak doonum, Jeroboamwg nombu uraho.

¹⁴‍Hoq aoho, At Sw mwv atv Israelwg aoho lvpw at ak swwrab mvtayin, hiyv Jeroboamwg nombungam soolo galoqkv kol namgub twryum tayin. Hoo hoqgab,

¹⁵‍tvtwq nwwbungam iss lo hwqdinam hvb At Sw Israelam jwwtayin, hoo bulug ab tulungam albo gvdangam jinam hoqgv Israelam buusuq xaatayin hoo bulam Iupratas lvvg alo cwrsaq-twqb mvtayin, hoggab bulv Aserim mam mvtwl At Swn haaxaq dvb hang nyiluq paku.

¹⁶‍Hoo Jeroboamwg nyic nyigam gab Israelam mwv apaq tayin, mwv nyic nyinum hoo Israelam nyic nyim dvb mvpa ku.”

¹⁷‍Ho Jeroboamwg nywxwngv gorabnum hoo wknv Tirjaho haanum. Hoo mwn nam deela ho hvvc kalam kongv siknum.

¹⁸‍Hoo At Sw mwwg nyera nyiqry benbo Ahijanvn gomcwr gooknam hvb, Israel mwlwngv mwam svma liinum hoo mwwg gab nyix-nyemar xabnum.

¹⁹‍Jeroboamwg asaq bon nyinam mwlwngam, hoggub mwv nyob panum hoo hoggub mwv pvvb bwwl doognum, kaato, hoq mwlw ham Israelwg Lvpw at tulug Nwd Kitap lo xiqtul ap pakun.

²⁰‍Hoo Jeroboam vnyw camnyi leq nywnyi go pvvb bwwl doognum. Hoo mwam mwwg ab tulug lvgab liiknum, hoo mwwg kwlib mwwg ko tuup Nadab pvvb bwwl doognum.

²¹‍Solomonwg ko tuup Rehoboam Judangam pvvb bwwl doognum. Hwdlo mwv pvvb bwwl doorab yikho, Rehoboam vnyw campy leq nywkin go akam kunum, ho mwv Jerusalemho vnyw camleq kvn go pvvb bwwl doognum, hogloq bopam ham At Sw Israelwg nyob pengko ho mwwg eminam pvvdwb xuqlinum. Mwwg ann hoqg eminv Naama, Ammon hoqgv.

²²‍Hoo Judangv At Swg kaagaho alman nyinum, hoo bulug ab tulungam koi yaadwb bulv nyicam nyinv bulv mwam kaaneq dvb hang nyiluqnum.

²³‍Hoggab bulv yorn yorxy ho hoo jeeneqbo svvn nwwxy niikum ho bulug atgab puutu aoho xumk nammam hoo pwlw soogwngam hoo Aserim mvnum,

²⁴‍hoo gvdag xumk nam tuluho nyega meqjo jookarbov doonum. Israelwg nyiilu aga hoqgv At Swg nyob tulungam ruqpaqnam tulug bulum-kac dvb nyinam mam bulv nyinum.

²⁵‍Lvpw at Rehoboam vnyw nywng go swwyikho, Ijipt gv lvpw at Sisak Jerusalem mam ceeko taab caanum.

²⁶‍Mwv At Swg dvrwq namlog gumnam la lvpw atwg nam hoqg gumnam naal wgnum. Mwv hog mwlwngam naal wgnum. Mwv Solomonwg hun svtam mvnam mwlwngam naal wgnum,

²⁷‍hoo Lvpw at Rehoboam hoq tulu kwlib tama svtam mam mvnum, hoo hiyv lvpw atwg yabgab kaaya bo, saab tulug alaqho hoq tulu ham gvqlwql apnum.

²⁸‍Hoo hog hwdgo lvpw atv At Swg dvrwq namlob wnum, rvky bo tulungv ham baql wgnum hoo ham hvrab pvvcum tvl rvkyko wrw ho boqkur kunum.

²⁹‍Rehoboamwg asaq bon nyinam mam la mwwg hog mwlwngam nyinam mam, Judag Lvpw at tulug Nwd Kitap lo xiqtul ap map nvi yv?

³⁰‍Hoo Rehoboam la Jeroboam bunyig pengko ho lwxiam nyob pal dookynum.

³¹‍Hoo Rehoboam mwwg ab tulug hvb siknum hoo mwwg ab tulug lvgab Debidg bopam ho liiknum. Mwwg ann hoqg eminv Naama, Ammon hoqgv. Hoo mwwg kwlib mwwg ko tuup Ahijam pvvb bwwl doognum.