Read Nyishi 1 LVPW ATWG 15 Bible Online

1 LVPW ATWG 15 - Nyishi bible

1 LVPW ATWG 15

¹Nebatwg ko tuup lvpw at Jeroboam vnyw camleq piin go swwyikho, Abijam Judangam pvvb bwwl doorab gvnum.

²‍Mwv Jerusalemho vnyw nywum go pvvb bwwl doognum. Mwwg ann hoqg eminv Maaka, Abisalomwg nyem kov.

³‍Hoo mwwg abv mwwg agaho nyic nyinam mwlwngam mwv nyic nyil wnum, hoo mwwg hangv mwwg Pwnbo At Swn, mwwg ab Debidg nyinam hvb nyimanum.

⁴‍Hvbsujaqkam, mwwg Pwnbo At Sw Debidg emin gab mwam Jerusalemho lempam jinum, mwwg kokwb mwwg ko tuupam doosiq mvnum, hoo Jerusalem mam swrsob doom dvb mvnum,

⁵‍hoggab At Swg vnyiq kaagaho Debid albo bonam nyinum hoo Hittait nyi Uriyag nywxwngam naanam lvvg hoqgv mwwg swwn bumpw ho mwam gaml jinam tulu ham vcwr gokam nyixiaq maab nyinum.

⁶‍Rehoboam la Jeroboam bunyig pengko ho mwwg swwn bumpw ho nyob pal doonum.

⁷‍Abijamwg asaq bon nyinam mam la mwwg hog mwlwngam nyinam mam, Judag Lvpw at tulug Nwd Kitap lo xiqtul ap map nvi yv? Hoo Abijam la Jeroboam bunyig pengko ho nyob panum.

⁸‍Hoo Abijam mwwg ab tulug sinam hvb siknum, hoo bulv mwam Debidg bopamho liiknum. Hoo kwlib mwwg ko tuup Asa pvvb bwwl doognum.

⁹‍Israelwg lvpw at Jeroboam vnyw camnyi go swwyikho, Asa Judangam pvvb bwwl doorab gvnum,

¹⁰‍hoo mwv Jerusalemho vnyw campy leq nywkin gob pvvb bwwl doognum. Mwwg ann hoqg eminv Maaka, Abisalomwg nyem kov.

¹¹‍Hoo Asa mwwg ab Debidg nyinam hvb jvqtwngam At Swg vnyiq kvvlwq dvb nyinum.

¹²‍Mwv gvdag xumk nam tuluho nyega meqjo jookarbo tulungam gvda hoqgv mvpaqnum hoo mwwg abwg murty mvnam tulungam mvpaqnum.

¹³‍Mwv mwwg ann Maakanvn kam vi-koorib swwn boam mvpaqnum hoggab mwn bulum-kac dvb Aserag guss sam mvmnum. Hoo Asa mwnwg guss sam pageq lonv hoo ham Kidron kucw ho parpaqnum.

¹⁴‍Hvbmabde puutu aog xumk nam tulungam mvpaq maatanum. Hvbsujaqkam, Asag hangv mwwg swwnam bumpw ho At Swn mwwjwl doonum.

¹⁵‍Hoo mwv At Swg dvrwq namlo uraho mwwg abwg la mwwg dvrwqbo lvqc tulungam, rupam, hoo hunam, hoo dupum-dvrab pam baqanum.

¹⁶‍Hoo Asa la Israelwg lvpw at Baasa bunyig swwdy aalho nyob paky twql doonum.

¹⁷‍Israelwg lvpw at Baasa Judangam nyob panum hoo Rama ho gurum nwqtumnum, ho mwv nyi akkam Judag lvpw at Asag dookub haam kama ho lengm kamanum.

¹⁸‍Ho Asa rupam la hunam, At Swg dvrwq namlo ho gumn doon boam la lvpw atwg namho gumn vkiq-amaq doon boam naanum hoo hoq tulu ham mwwg nyera tulug alaqho jilwqnum. Hoo lvpw at Asa hoq tulu ham Damaskas ho doonbo Siriyag lvpw at, Hejionwg ko hosiqg Tabrimmonwg ko tuup Ben-hadadnvn kanaml begamv,

¹⁹“Kuj ngunyig pengko lo no la ngo birnam pvvb loq ak mvtuj, hoggub ngoqg ab la noqg ab pvvb mvnam hvb mvtuj. Kaato, noqgab ngo rupam hoo hunam kanam nvmlwq pan. Wn, noqg Israelwg lvpw at Baasa lvgab birnam pvvb mvnam ham mvpia to, ho mwv ngoqg soqgv wkur taikun.”

²⁰‍Hoo Ben-hadad Lvpw at Asag benam mam tanum hoo mwwg sipai tulungam Israel bopam tulungam nyob pamnum hoo Ijon, Dan, Abel-bet-maaka, hoo Kinnerot gvda lvgab Naptali gvda mwlwngam naaknum.

²¹‍Hoo hwdlo Baasa hoq ham tapa yin, mwv Rama gurum mam mvk maanum, hoo mwv Tirjaho doonum.

²²‍Ho Lvpw at Asa Juda mwlwho puiyam jinum, hoo Baasag Rama ho gurum mvn nan wlw tulungam la hoqg svvtaqkam bulv Rama hoqg baqnum, hoo hoq tulu hoqgv Lvpw at Asa Benjaminwg gvda Gebangam la Mijpangam gurum nwqtumnum.

²³‍Asag asaq bon nyinam mam la mwwg atornam la mwwg hog mwlwngam nyinam mam, hoo mwwg bopam tulu mvnam mam, Judag Lvpw at tulug Nwd Kitap lo xiqtul ap map nvi yv? Hvbmabde mwwg nyekam dvk aalho mwwg lvpia ho vc ak cinum.

²⁴‍Hoo Asa mwwg ab tulug sinam hvb siknum hoo mwwg ab tulug svma liik mwwg ab Debidg bopam ho liiknum, hoo mwwg kwlib mwwg ko tuup Jehosapat pvvb bwwl doognum.

²⁵‍Lvpw at Asa Judaho vnyw nywnyi go swwyikho Jeroboamwg ko tuup Nadab Israelwg aoho pvvb bwwl doognum, hoo mwv Israelam vnyw nywnyi go pvvb bwwl doognum.

²⁶‍Mwwg abwg nyinam hvb mwv At Swg kaagaho almanam nyinum, hoo mwwg nyic nyigam gab Israelv nyic nyinum.

²⁷‍Issakarwg nombu hoqgv, Ahijag ko tuup Baasa, mwam hima bwwnum. Hoo Palistan nyi tulug gvda Gibbeton ho Baasa mwam patabnum, hoggab Nadab la Israel mwlwngv Gibbetonam naareql doognum.

²⁸‍Hoqgab lvpw at Asa Judaho vnyw nywum go swwdu yukho Baasa Nadabnvn mengnum hoo mwwg kwlib mwv pvvb bwwl doognum.

²⁹‍Mwv lvpw atwb swwda kalam, mwv Jeroboamwg nombungam mingtwrnum. At Sw mwwg nyera Silon hoqg Ahijanvn agam gooknam hvb mwv Jeroboamwg nombungam akkam swwm kumanum, mwv bulam twrkiq-twrmal twryumnum.

³⁰‍Jeroboamwg nyic nyigam gab hoo mwv Israelam nyic nyim dvb mvnum, hoo hoggab Israelwg Pwnbo, At Swn mwv hang nyiluqnum.

³¹‍Nadabwg asaq bon nyinam mam la mwwg hog mwlwngam nyinam mam, Israelwg Lvpw at tulug Nwd Kitap lo xiqtul ap map nvi yv?

³²‍Hoo Asa la Israelwg lvpw at Baasa bunyig swwdy aalho nyob paky twql doonum.

³³‍Lvpw at Asa Judaho vnyw nywum go swwyikho Ahijag ko tuup Baasa Tirjaho dootwl Israelwg aoho pvvb bwwl doorab gvnum, hoo mwv camnyi leq nywpy go pvvb bwwl doognum.

³⁴‍Mwv At Swg kaagaho almanam nyinum hoo Jeroboamwg nyicw-mwwcwngam nyinum hoo mwwg nyic nyinamv Israelam nyic nyimnum.