Read Nyishi 1 LVPW ATWG 16 Bible Online

1 LVPW ATWG 16 - Nyishi bible

1 LVPW ATWG 16

¹Hoo Baasanvn ceeko mvdwb At Swg gomcwrv Hananig ko tuup Jehunvn haanum hoo begamv,

²“Ngo nam diimwr hoqgv joorabnum hoo ngoqg Israelwg nyiilu aoho nam ngo xilo gob nyig mvdwb mvnum, hoo no Jeroboamwg lamta wkwb wpa ku hoo ngoqg Israel nyiilungam nyic nyim paku, ho bulug nyic nyinamv ngam haaxaq dvb hang nyiluq paku,

³‍kaato, ngo twrkub Baasa la mwwg nombungam mvpaq tayin, hoo noqg nombungam Nebatwg ko tuup Jeroboamwg nombu hvb ngo mvtayin.

⁴‍Baasag dvparv hiyv lajaqkam bopam uraho sib nyiloqkam ham iky tulungv dvtayin, hoo hiyv lajaqkam rongo ho sitayin ham doag pvtangv dvtayin.”

⁵‍Baasag asaq bon nyinam mam la mwwg hog mwlwngam nyinam mam, hoo atornam mam Israelwg Lvpw at tulug Nwd Kitap lo xiqtul ap map nvi yv?

⁶‍Hoo Baasa mwwg ab tulug sinam hvb siknum hoo Tirjaho liiknum, hoo mwwg kwlib mwwg ko tuup Ela pvvb bwwl doognum.

⁷‍Hoq aoho, Baasanvn la mwwg nombungam ceeko mvdwb At Swg gomcwrv Hananig ko tuup nyiqry benbo Jehunvn haanum, mwam la mwwg nombu gab haanam si hvb nyiloqkam, bulv At Swg kaagaho almab mwwg alaq bonam nyinam hoqgv mwam haaxaq dvb hang nyiluqnum, hoqgab Jeroboamnvn twrmnam hvb mwwg nombungam twryumnum.

⁸‍Judag lvpw at Asa camnyi leq nywx go swwyikho, Baasag ko tuup Ela Tirja hoqgv Israelam pvvb bwwl doorab gvnum, hoo mwv vnyw nywnyi go swwnum.

⁹‍Hvbmabde mwwg ceriot papo gon kaal nyigbo sipai saab Jimri hima bwwl mwam mengnum. Hwdlo mwv Tirjaho Arjag namho, hiyv Tirjag nombungam kaaya bo dookho twwxum yukho, mwwg nyera Jimri,

¹⁰‍Jimri urab haanum hoo mwam patabl hoo mwam mengnum, hoo mwwg kwlib mwv pvvb bwwl doognum, ho Judaho lvpw at Asa vnyw camnyi leq kvn go swwnum.

¹¹‍Hwdlo mwv pvvb bwwl doorab gvda kalam, mwwg pvlw doolwq kalam mwv Baasag nombungam mingyumnum. Mwwg imiq lwkwngam ho mwwg ajinam nyega akkam apaqmab mingtwrnum.

¹²‍Nyiqry benbo Jehu Baasanvn ceekol At Swg agam mam goonam hvb, Jimri Baasag nombungam twryumnum,

¹³‍hoggab Baasag nyinam mvla mwwg ko tuup Elag nyic nyinamv hoo bulug murty tulu lvgab Israelam nyic nyimnamv Israelwg Pwnbo At Swn hang haaxaq dvb nyiluqnum.

¹⁴‍Elag asaq bon nyinam mam la mwwg hog mwlwngam nyinam mam, Israelwg Lvpw at tulug Nwd Kitap lo xiqtul ap map nvi yv?

¹⁵‍Judag lvpw at Asa vnyw camnyi leq kvn go swwyikho, Jimri Tirjaho aal kvn go pvvb bwwl doognum. Palistan gvdag Gibbetonam nyob padwb sipai tulungv svmcw mvl doonum,

¹⁶‍hoo hoqho svmcw mvl doonbo sipai tulungv ham tapanum, “Jimri hima bwwnum, hoo mwv lvpw atam mengnum.” Hoqgab Israelwg mwlwngv sipai saab Omrinvn Israelwg lvpw at gob svmcw ho mvnum.

¹⁷‍Hoqgab Omri Gibbeton hoqgv caanum, hoo Israel mwlwngv mwwg lvgab doonum, hoo bulv Tirjangam naareqnum.

¹⁸‍Hoo Jimri hwdlo bopam mam naareqnam mam kaapa yukun, mwv lvpw atwg nam uraho haalayil hoo lvpw atwg nammam wm rwlwql hoo mwv siknum,

¹⁹‍hoggab mwv At Swg kaagaho almanam, mwwg nyic nyigam gab, ho Jeroboamwg lamtab wggam gab, hoo mwwg nyic nyinamv Israelam nyic nyimnum.

²⁰‍Jimrig asaq bon nyinam mam la mwwg hima bwwl nyinam mwlwngam, Israelwg Lvpw at tulug Nwd Kitap lo xiqtul ap map nvi yv?

²¹‍Ho Israel nyiilungv jvqnyi gob nyinum. Papo gon nyiilungv Ginatwg ko tuup Tibninvn lvpw at gob mvdwb loonum, hoo papo gon Omrinvn loonum.

²²‍Hvbmabde Omrinvn loomin gvnbo nyiilungv Ginatwg ko tuup Tibninvn loomin gvnbo nyiilungam mviyanum. Ho Tibni siknum, hoo Omri lvpw at gob swwknum.

²³‍Judag lvpw at Asa vnyw cammum leq nywkin go swwyikho, Omri Israelwg aoho pvvb bwwl doorab gvnum, hoo mwv vnyw camleq nywnyi go pvvb bwwl doognum; Tirjaho mwv vnyw nywx gob pvvb bwwl doognum.

²⁴‍Mwv Semer hoqgv Samariya yornam rup telent vnyi go rvnum, hoo mwv yornam gurum nwqtumnum hoo mwwg gurum nwqtumnam bopam ham yorn atwg Semerwg eminam naal Samariya hvl eminum.

²⁵‍Omri At Swg kaagaho almanam nyinum, hoo mwwg otuqho swwnbo mwlwngam mwv almab nyinam mam nyilvnum.

²⁶‍Hoggab mwv Nebatwg ko tuup Jeroboamwg nyinam hvb nyinum, hoo mwwg nyic nyinamv Israelam nyic nyimnum hoo bulug murty tulu lvgab Israelwg Pwnbo At Swn hang haaxaq dvb nyiluqnum.

²⁷‍Omrig asaq bon nyinam mam la mwwg hog mwlwngam nyinam mam, hoo atoram kaakinam mam, Israelwg Lvpw at tulug Nwd Kitap lo xiqtul ap map nvi yv?

²⁸‍Hoo Omri mwwg ab tulug sinam hvb siknum hoo Samariya ho liiknum, hoo mwwg kwlib mwwg ko tuup Ahab pvvb bwwl doog kunum.

²⁹‍Judag lvpw at Asa vnyw cammum leq piin go swwyikho, Omrig ko tuup Ahab Israelwg aoho pvvb bwwl doorab gvnum, hoo Omrig ko tuup Ahab Samariya hoqgv Israelam vnyw camnyi leq nywnyi go pvvb bwwl doognum.

³⁰‍Ahab At Swg kaagaho almanam nyinum, hoo mwwg otuqho swwnbo mwlwngam mwv almab nyinam mam nyilvnum.

³¹‍Hoo Nebatwg ko tuup Jeroboamwg nyic nyinam mam mwv hog gob kam mwwmanum, mwwg nywxw gab Sidonwg lvpw at Etbaalwg nyem ko Jejebelnvn mwv naanum, hoo mwv Baal kokwb wmin gvnum hoo mwam xumnum.

³²‍Mwv Samariya ho Baalam xumk nammam mvtwl hoo mwv Baal gab yugw ak mvnum.

³³‍Hoo Ahab Asera ak mvnum. Ahab Israelwg Pwnbo, At Swnvn, mwwg otuqho Israelwg lvpw at swwnbo mwlwg pengko hoqgv, mwv vc loodab At Swn haaxaq mvdwb hang nyiluqnum.

³⁴‍Mwwg moodho Betel hoqg Hiel Jerikongam mvnum. Nunwg ko tuup Josua At Swg gomcwram goonam hvb, mwv hoq gwwlam mvrab yukho mwwg ko tuup vbw cociq Abiram sinum, hoo hoqg toggoq tulug gwwlam mvrab yukho mwwg ko tuup honyia Segub sinum.