Read Nyishi 1 LVPW ATWG 18 Bible Online

1 LVPW ATWG 18 - Nyishi bible

1 LVPW ATWG 18

¹Aal vigo kokw so At Swg gomcwrv Ilijanvn vnyw nywum deenho haanum, hoo begamv, “Wn, no atv Ahabnvn kaatam suta, hoo swcw nvg aoso ngo nyodongam kanam tayin.”

²‍Hoqgab Ilija wnv mwv atv Ahabnvn kaatamnum. Ho Samariya ho dwr-kanongv dwqdwq loodab wnum.

³‍Hoo nammam kaaya bo Obadiyanvn Ahab goqnum (Obadiya At Swn vc loodab bosnum,

⁴‍hoo hwdlo Jejebel At Swg nyiqry benbo tulungam mengpaq yukho, Obadiya nyiqry benbo tulungam lwwg boolayil hoo bulam camng-camng gob lwwpwq ho kvsil apnum hoo bulam wtwngam la issam jinum.)

⁵‍Hoo Ahab Obadiyanvn benum, “Gvda mwlwg iss subuq buqlin koob hoo haapa mwlwg dwaqb wn. Lokam ngulv nwmw kaapa twqto hoo svpur tulungam la svdam tulungam dvtwl swwm dvb, hoo svdin tulungam yuupaq mvma dvb.”

⁶‍Hoqgab bulv gvdangam mvpin sulayil hoqb wnum. Ahab mwv atv taqcgonwb wnum, hoo Obadiya asaq taqcgonwb mwv atv wnum.

⁷‍Hoo Obadiya lamta ho wdu yikho, kaato, Ilija mwam kaapanum. Hoo Obadiya mwam kaalaqnum hoo mwwg nyuqmv pvxwl tvl hoo benum, “No yv, ngoqg nyiit at Ilija?”

⁸‍Hoo mwv mwam birwqnum, “Vv ngo lak. Wn, noqg nyiit atam, ‘Kaato, Ilija si doodo hvta.’”

⁹‍Hoo mwv benum, “Hoggv ngo nyic nyinum, ho noqg nyerangam no Ahab alaqho jilwq tvl ngam mengm tagdvn?

¹⁰‍Noqg Pwnbo At Sw swwl doody deedib, ngoqg nyiit atv gvda mwlwngam ho lvpw-haty mwlwngam nam meepa dvb meemanam dooma. Hoo hwdlo bulv benum, ‘Mwv so yvma hvikam,’ bulam nam kaapa ma hvl, mwv lvpw-hatiam la gvdangam dingnum.

¹¹‍Hoo no sija bedo, ‘Wn, noqg nyiit atam, “Kaato, Ilija si doodo hvta.” ’

¹²‍Hoo ngo noqg hoqgv wleq kalam twqda, At Swg Yalv nam cengma ko nyook golo baqp tayin. Hoo hwdlo ngo haal hoo Ahabnvn betam yin hoo mwv nam kaapa maaiyin, ngoqg yaapa hoqgv jaq At Swn noqg nyerangv bosil swws jaqkam, mwv ngam mengtayin.

¹³‍Ngoqg nyiit ata, nam soq sam betam maai yv, hoggv ngo nyinum hwdlo Jejebel At Swg nyiqry benbo tulungam mingtwr dvb mengyikho, ngo At Swg nyiqry benbo tulungam lwwgwb boolayil camng-camng gob lwwpwqho kvsil apnum hoo bulam wtwngam la issam dvd-twwdwb jima nam yv?

¹⁴‍Hoo no sija bedo, ‘Wn, noqg nyiit atam, “Kaato, Ilija si doodo hvta” ’; hoo ngam mwv mengtayin.”

¹⁵‍Hoo Ilija benum, “Nyiit At Sw swwl doody deedib, hiyvg agaho ngo daqdwn, ngo atv soolo jvqtw jaqb mwam kaatam tayin.”

¹⁶‍Hoqgab Obadiya wknv Ahabnvn kvvrwqnum, hoo mwam betamnum. Hoo Ahab Ilijanvn kvvrwqtab wnum.

¹⁷‍Hwdlo Ahab Ilijanvn kaapa yin, Ahab mwam benum, “No i, no yv Israelam vs-axaq gob nyim bov?”

¹⁸‍Hoo mwv birwqnum, “Ngo Israelam hog vs-axaq dvb nyima, hvbmabde no lak, noqg ab tulug nombu ngvlak, hoggab no At Swg gaml tulungam apaq paku hoo Baal tulug lvgab wmin gvdku.

¹⁹‍Hoqgab sija ngoqg dookub Karmel Puutu ho Israel nyi mwlwngam hookum mvto, hoo Baalwg nyiqry benbo 450 tulungam la Aserag nyiqry benbo 400 tulu, hiyv Jejebelwg tebol ho dvmin gvnum hoq tulu ham kanamta.”

²⁰‍Hoqgab Ahab Israel nyiilungam kanamnum hoo nyiqry benbo tulungv lvkin gob Karmel puutu ho hookumnum.

²¹‍Hoo Ilija nyiilu dookub ogum hvvnwqnv hoo benum, “Nulv hog hwdgo mwwdar maab lwwnyig pengko ho lvca dvn hvb wl dootayin? At Sw Pwnbo gonyiloqkam, mwam wmin gvto; hvbmabde Baal nyiloqkam ho mwam wmin gvto.” Hoo nyiilungv mwam agam gamg kam birwq maanum.

²²‍Ho Ilija nyiilungam benum, “At Swg nyiqry benbo tulungv ngo aro twq doodku, ngo twqku, hvbmabde Baalwg nyiqry benbov 450 go nyiingv doonum.

²³‍Ngulam hvvb lo dornyi go jitbv, hoo bulam atam dorgwn nvvbwq gvdwl hoo patabl haam vmwq gob twqtwl wsw aoho joop mvto, hvbmabde hoqho wm parlwq maabv. Hoo ngo dorgwn ham hvb mwx-mvaq tayin hoo ham wsw aoho aptayin hoo wm parlwqram.

²⁴‍Hoo nulv pwnboam nulv goqto, hoo ngo At Swg eminho goqtayin, hoo hiyvg Pwnbov wm lvgab birwqtayin, mwv Pwnbov.” Hoo nyiilu mwlwngv birwqnum, “Hv aljaqb bedo.”

²⁵‍Ho Ilija Baalwg nyiqry benbo tulungam benum, “Nulv atv hvvb dorgwn xuqto hoo ham otuqb nulv mwx-mvaq mvto, hoggab nulv nyiingv mvqlw do, hoo nulug pwnbog eminam goqto, hvbmabde hoqho wm parlwq maabv.”

²⁶‍Hoo bulv bulam hvvb jinam ham naanum, hoo bulv ham mwx-mvaqnum hoo ar hoqgv aal lvpa namgub Baalwg eminam goql begamv, “Oa Baala, ngulam birwq tvbka! Hvbmabde hoqho yal dumanum, hoo akkam birwq maanum. Hoo bulug yugw mvnam ho bulv pojuq-lvbeql juql yvnum.

²⁷‍Hoo aal lvpa yukho Ilija bulam bej-beparnum bulam begamv, “Vcib sogoq to, hoggab mwv pwnbov. Lokam mwv tangaql dookam pade, ho mwv atv doonul dookam dvn pv, ho mwv nyiody bookam pade, ho mwv lokam yubkam pade hoo mwam goqul goqrab mvto.”

²⁸‍Hoo bulv vcjaqb xabnum hoo bulug ab apa tulug nyicwb bulv lyoqr orioq lvgab bulv atwg gv-ngam uiyv lengma deedib bulv peegin-peeyin sunum.

²⁹‍Hoo aal lvpangv wleq yukho, bulv pwr jid mood namgub sogoq goqdul doonum, hvbmabde hoqho yal akkam tapa maanum. Nyi akkam birwq maanum; nyi akkam ruucw kwrgab maanum.

³⁰‍Ho Ilija nyiilu mwlwngam benum, “Ngoqg ogumb hvvnwqto.” Hoo nyiilu mwlwngv mwwg ogumb hvvnwqnum. Hoo At Swg yugwngam mvpianam mam mwv mvdarnum.

³¹‍Ilija Jakubg ko tuup tulug nyob camleq vnyig eminb wlw camleq pwnyi go naanum, hiyam At Swg gomcwrv haal begamv, “Noqg eminam Israel hvl goqtayin,”

³²‍hoo wlw tulu lvgab mwv At Swg emin ho yugw ak mvnum. Hoo mwv yugw bviywr mwlwngam uppum pupy go iss tool biql wjaqkam wg namgub silam mam joqnum.

³³‍Hoo mwv wswngam anya jaqb pvvlwqnum hoo hvvbam vmwq-vmwq gob pvmwq tvl hoo ham wsw aoho joopnum. Hoo mwv benum, “Pvtaq tvqpy gob iss loq bwa to hoo ham boyuqnam aky hoola wsw aoho tooiyaq to.”

³⁴‍Hoo mwv benum, “Ham lwnyi dvb nyito.” Hoo bulv lwnyi dvb nyinum. Hoo mwv benum, “Ham luum dvb nyito.” Hoo bulv ham luum dvb nyinum.

³⁵‍Hoo issiv yugwngam hwwiyumnum hoo issiv silam joqnam hookam bwwrnum.

³⁶‍Hoo pwr aky jid moodv haaikun, nyiqry benbo Ilija ogumb hvvnwqnv hoo benum, “At Swa, Abraham gv, Aisakwg, hoo Israelwg Pwnboa, soq aal so no Israelwg Pwnbov hvl cengm to, hoo ngo noqg nyerangv, hoo noqg gomcwr ho ngo soq mwlw sam nyipa kun.

³⁷‍Ngam birwq tvb, At Swa, ngam birwq tvb, ho soq nyiilu si At Swa, no Pwnbov hvl nam ceng dvb, hoo bulug hangam no lokta mwwkur mvtku.”

³⁸‍Ho At Swg wmv yoqlnum hoo boyuqnam akiam hoo wswngam hoo wlw tulungam hoo diimwram dvmeqnum, hoo silam ho iss doon boam rub wm oggv xaml xvmtwrnum.

³⁹‍Hoo hwdlo nyiilungv hoq ham kaaiyikho, bulug nyuqm mam bulv pvxwl hoo benum, “At Sw, mwv Pwnbov; At Sw, mwv Pwnbov.”

⁴⁰‍Hoo Ilija bulam benum, “Baalwg nyiqry benbo tulungam nootu to; akkam bulam keleq mvmabv.” Hoo bulam bulv nootunum. Hoo Ilija bulam Kison kucw ho boolayil hoo bulam hoqho mengnum.

⁴¹‍Hoo Ilija Ahabnvn benum, “Gorabto, dvto hoo twwto, hoggab nyodo honam yalv dua duku.”

⁴²‍Hoqgab Ahab caanv dvk-twwknum. Hoo Ilija Karmel puutu aob caanum. Hoo mwwg nyuqm mam mwwg lwbw pwnyi pengko hoo mwv atv ked namgub pvxwnum.

⁴³‍Hoo mwv mwwg nyerangam benum, “Sija aob caag dvl, sa-svlo daiyab kaaka ta.” Hoo mwv caanv hoo kaanum hoo benum, “Hog dooma.” Hoo mwv benum, “Lokta caan,” ho kvn mood go hvb nyigdvl kaato.

⁴⁴‍Hoo kvn deen moodho mwv benum, “Kaato, nyi alaq hwiyw go sa-svlo hoqgv anyo go doomwqkv caalin lingdo.” Hoo mwv benum, “Ahab dookub wgdvl beta, ‘Noqg ceriotam mwx-mvaq layil hoo ipoq tuku, hvbmab nyiloqkam nyodongv nam hotum tai yi.’”

⁴⁵‍Hoo oyu maadab doa hoqgv kaiya poogub nyirab banv doomwq kvla dooiyv nyinv, hoo hoqho vc loodab nyodo honum. Hoo Ahab xarl Jejreelwb wknum.

⁴⁶‍Hoo At Swg alaqkv Ilijag aoho doonum, hoo mwwg vjam nookum layil hoo mwv Ahab otuqb Jejreel haagab xarknum.