Read Nyishi 1 LVPW ATWG 19 Bible Online

1 LVPW ATWG 19 - Nyishi bible

1 LVPW ATWG 19

¹Ahab Jejebelnvn Ilijag hog mwlw nyiknam mam, hoo hoggub mwv nyiqry benbo tulungam mengnum ham betamnum.

²‍Ho Jejebel pui baqn boam Ilijanvn kanaml begamv, “Aaram soq mood so no hoggub bulug swwgam mvnum hoq akwg kwlib ngo noqg swwgam mvma baloqkam, pwnbo tulungv ngam laqm-baqm to hoo sid bvkam mvto.”

³‍Hoo mwv bosnum, hoo mwv gorabnum hoo mwwg swwgab kenum hoo Juda gvdag Beerseba ho haanum, hoo hoqho mwwg nyerangam apaqnum.

⁴‍Hvbmabde mwv atv aal loog wnam gob nyoro roodwb nyiody wnum hoo haanv mwv taja jvvrw niikum golo doonum. Hoo mwv atv benum mwv sik nyiloqkam alpa hvl begamv, “Hwd gotwq kumab; sija At Swa, ngoqg swwgam naatku, hoggab ngoqg ab tulungam ngo alyama.”

⁵‍Hoo mwv doanum hoo taja jvvrw niikum ho yubnum. Hoo kaato, gumtw ak mwam idaq banv hoo mwam benum, “Gorabto hoo dvto.”

⁶‍Hoo mwv kaanum, hoo kaato, mwwg dumpo dookho wtw cwwnam ak la iss pvtaq taqg doonum. Hoo mwv dvk-twwknum hoo lokta yubkurnum.

⁷‍Hoo At Swg gumtwngv lokta haanv mwam lwnyi dvb idaqnum hoo benum, “Gorabto hoo dvto, hoggab noqgab nyodo wnamv vijaq paku.”

⁸‍Hoo mwv gorabnum hoo dvk-twwknum, hoo mwv hoq dvn-twwnam hoqgv ator kaapa layil Pwnbog puutu Horeb mwv aal-ai campy go wnum.

⁹‍Hoqho mwv lwwpwq golo haanv hoo doonum. Hoo kaato, At Swg gomcwrv mwam haanum, hoo mwv mwam benum, “Ilija, no so hoggv mudu dvn?”

¹⁰‍Mwv benum, “Nyiit At Sw Pwnbo gab ngo vigo mwwi lalal bon nyiknum. Hoggab Israel nyiilungv noqg birnam pvvbam haqpaq paku, noqg yugwngam papia paku, hoo lyoqr orioq hoqgv noqg nyiqry benbo tulungam mengpa ku, hoo ngo, ngo aro twq doodku, hoo bulv ngam kam mengdwb, bulv ngoqg swwgam naaxa dvb meegaqdo.”

¹¹‍Hoo mwv benum, “Agwb lengdvl puutu ho At Swg agaho daqto.” Hoo kaato, At Sw ator jaqb pwd dooiyib heqanv puutungam vmwq yumgub mvnum hoo wlw mwlwngam At Swg agaho vmwq-vmwq gob mvnum, hvbmabde At Sw hoq ywt dooi ho doomanum. Hoo dooi yikho kokw so nyiobiv hwqnum, hvbmabde At Sw nyioby hwqnam hookam doomanum.

¹²‍Hoo nyioby hwqxo kokw so wmmwb bioqnum, hvbmabde At Sw wmho doomanum. Hoo wm kokw so tama-taja dvb jebs-jipeqnam yal ak tapanum.

¹³‍Hoo hwdlo Ilija ham tapayin, mwwg nyuqm mam mwwg vj lvgab mwv putumnum hoo lwwpwq haagag gamb ho lenglayil daqnum. Hoo kaato, hoqho yal dual hoo mwam benum, “Ilija, no so hoggv mudu dvn?”

¹⁴‍Mwv benum, “Nyiit At Sw Pwnbo gab ngo vigo mwwi lalal bon nyiknum. Hoggab Israel nyiilungv noqg birnam pvvbam haqpaq paku, noqg yugwngam papia paku, hoo lyoqr orioq hoqgv noqg nyiqry benbo tulungam mengpa ku, hoo ngo, ngo aro twq doodku, hoo bulv ngam kam mengdwb, bulv ngoqg swwgam naaxa dvb meegaq do.”

¹⁵‍Hoo At Sw mwam benum, “Noqg lamtab no Damaskas nyoro roodwb wkur nukun. Hoo hwdlo no hvvc yin, no Siriyag lvpw at Hajaelnvn kuty neel darxaq tayin.

¹⁶‍Hoo Nimsig ko tuup Jehunvn no Israelwg lvpw at gob kuty neel darxaq tayin, hoo noqg kwlib Abel-mehola hoqg Sapatwg ko tuup Ilisanvn nyiqry benbo gob kuty neel darxaq tayin.

¹⁷‍Hoo hiyv ak gon Hajaelwg lyoqr orioq hoqgv keleq boam Jehu mengtayin, hoo hiyv ak gon Jehug lyoqr orioq hoqgv keleq boam Ilisa sim tayin.

¹⁸‍Hvbsujaqkam hiyv Baalnvn lwbw kumbwl xumanum, hoo mwam moopup maanbo nyiicwr-cwrxiam, ngo Israelho lwwyw kvn go nyiam doom tayin.”

¹⁹‍Hoqgab mwv hoqgv wleqnum hoo Sapatwg ko tuup Ilisanvn kaapanum, mwwg agalo hiyv hvvb camleq dornyi go acam caml rongo tuql yvnum, hoo mwv camleq vnyi deenho yvnum. Ilija mwwg dookub wpeq layil hoo mwwg kamt vjam mwam koomnum.

²⁰‍Hoo mwv hvvbam apaq peel hoo Ilija kokwb xarmin gvnv hoo benum, “Ngoqg abam la annam ngam moopup dvb jila bv, hoo ngo nam wmin gvtayin.” Hoo mwv mwam benum, “Lokta wkur nuku, hoggab ngo hoggv nam nyijpa.”

²¹‍Hoo mwv mwam wmin gvnam hoqgv wkurnum hoo hvvb tulungam naalayil hoo ham pwr jinum hoo hvvb tulug vdinam hal beennan svvda hoqgv xeenu nanum hoo vdinam nyiilungam jinum hoo bulv dvnum. Hoo mwv gorabnum hoo Ilija kokwb wnum hoo mwam nyibanum.