Read Nyishi 1 LVPW ATWG 2 Bible Online

1 LVPW ATWG 2 - Nyishi bible

1 LVPW ATWG 2

¹Hwdlo Debid sid moodv ogumb hvvnwq yukho, mwwg ko tuup Solomonnvn mwv gaml jil hoo begamv,

²“Ngo swcw soqgv wta dukun. Hoqgab ator to, hoo no atv nyega gob mwwto,

³‍hoo noqg Pwnbo At Swg benam mam pvvg dvl hoo mwwg lamtab wto, hoo mwwg pvvb tulungam, mwwg gaml tulungam, mwwg nyij-mujam, hoo mwwg swwi-swwcangam Mojesg pvvb ho xeqpnam hvb nyil wto, ho noqg nyinam hog mwlwngv hoo no hogloq bvxeq wjaqkam niqtuq lengtayin,

⁴‍ho At Sw mwv ngam agam goonam mam nyim tayin, ho begamv, ‘Noqg ko tuup tulungv tagabl bulug lamta wkam hengabl ngoqg agaho dengky jaqb bulug hang lvgab hoo yvj lvgab wb nyiloqkam, noqg hoqgv Israel pwqlwngam doog bongv nywywngam xooram.’

⁵“Hoq aoho, Jeruiyag ko tuup Joab ngam hoggv nyiknum, ho hoggub mwv Israelwg sipai saab vnyiam, Nerwg ko tuup Abner, hoo Jeterwg ko tuup Amasanvn mwwg mengnam hamkam no cengtayin. Swrso moodho nyob pal nyi mengnam mam kwly naanum, hoo nyob pal ywlw twwnam mam mwwg hwwpo soruqlo hoo mwwg lvpia samtaq nanho tulwqtayin.

⁶‍Hoqgab noqg mwwlaq hoqgv nyito, hvbmabde mwwg dumpongam dumpu layil swrsob Sux-ywlwb im mvmabv.

⁷‍Hvbmabde Gilead hoqgv Barjillaiywg ko tuup tulu lvgab hingkib nyila ka, hoo bulam noqg tebol ho dvmin gvnbo pengko ho doom laka, hoggab hwdlo ngo noqg vbw Absolom hoqgv keginl dooyikho ngo bul galoqkv hvbjaq xinam mam kaapanum.

⁸‍Hoo Bahurim hoqgv Benjamin nyobwg Gerag ko tuup Simei kam doon kun, hwdlo ngo Mahanaim ho haai yikho hiyv ngam beec-beyangam beenum. Hvbmabde Jordon ho mwv ngam kvvrwqtab innum, At Swg emin ho ngo mwam dingrwl benum, ‘Lyoqr orioq lvgab ngo mwam mengram.’

⁹‍Hoqgab sija mwv nyixiaq dooma pan mwwma bvka, hoggab no mwwlaq bo nyi akv. Mwam hoggv no nyitayin ham no cengdwn, hoo mwwg dumpu bo dumpongam no ywlw-twwl Sux-ywlw ho im laka.”

¹⁰‍Ho Debid mwwg ab tulu lvgab yubknum hoo Debidg bopam uraho liiknum.

¹¹‍Hoo Debidg vnyw campy gob Israel aoho pvvb bwwl doog kunam moodv wnya kunum. Mwv Hebron ho vnyw kvn go hoo Jerusalemho vnyw cammum leq nywum go pvvb bwwl doognum.

¹²‍Hoqgab Solomon mwwg ab Debidg pwqlw ho doonum, hoo mwwg lvpw-hatiam hwngkw dvb mvp kunum.

¹³‍Ho Haggitwg ko tuup Adonija Solomonwg ann Betsebag dookub haanum. Hoo mwn benum, “So no swrso gab haad nvi yv?” Mwv benum, “Swrso gab.”

¹⁴‍Ho mwv benum, “Ngo nam hog bes ak doodo.” Mwn benum, “Gooto.”

¹⁵‍Mwv benum, “No cengdo lvpw-hativ ngoqgv su, hoo Israel mwlwngv ngam pvvb bwwl doog mvdwb mwwnum. Hvbsujaqkam, lvpw-hativ luusaq gob nyiknum hoo ngoqg bor gab ya dooknum, hoggab hoqham mwam At Sw jinum.”

¹⁶‍Hoo sija ngo nam kos loq ak kodwb mwwdo; ham ngam maak hvmabv.” Mwn mwam benum, “Gooto.”

¹⁷‍Hoo mwv benum, “Anya mwwpa gvdwl Lvpw at Solomonnvn toxto—mwam nam haqpaq mvmabv—Sunam nyi Abisagnvn ngoqg nywxwb jim tvbv.”

¹⁸‍Betseba benum, “Hv aljaqpa; noqgab ngo lvpw atam agam gooj tayin.”

¹⁹‍Hoqgab Betseba Adonijag bidub Lvpw at Solomonwg dookub gootab wnum. Hoo lvpw atv gorabl mwnwn kvvrwqnum hoo mwnwn pvxwl xumnum. Ho mwv mwwg pwqlw ho doonum hoo lvpw ann gab dootam ak bwa jinum, hoo mwwg lvqbwq taqc ho mwn doonum.

²⁰‍Ho mwn benum, “Ngo nam anyo ko kosloq ak kotab haaiyin; ngam maak hvmabv.” Hoo lvpw atv mwnwn benum, “Ngoqg ann, noqg kosam koka tvna, hoggab nam ngo maak hvram.”

²¹‍Mwn benum, “Sunam nyi Abisagnvn noqg bor Adonijanvn mwwg nywxwb jito.”

²²‍Lvpw at Solomon mwwg annam birwqnum, “Hoggub no Sunam nyi Abisagnvn Adonija gab kodwn? Mwwg gab lvpw-hatiam kam kot ke, hoggab mwv ngoqg vbwngv, hoo mwwg lvgab nyub Abiyatar hoo Jeruiyag ko tuup Joab doodwn.”

²³‍Ho Lvpw at Solomon At Sw ho dingrwl begamv, “Pwnbov ngam laqm-baqm to hoo sid bvkam mvto, soq gomcwr si Adonijag swwgam naama yinyiloqkam!

²⁴‍Hoqgab sija At Sw swwl doody deedib, hiyv ngam hwngkw dvb mwjnum hoo ngoqg ab Debidg pwqlw ho doom dvb jinum, hoo mwwg dingrnam hvb hiyv ngam nammam mwjnum, soq aal so Adonijanvn sidwb mengtayin.”

²⁵‍Hoqgab Lvpw at Solomon Jehoiadag ko tuup Benaianvn kanamnum, hoo mwv mwam patabnum, hoo mwv sinum.

²⁶‍Hoo nyub Abiyatarnvn lvpw atv benum, “Noqg at gvda Anatotwb wno, hoggab no sidwb nyido. Hvbmabde soq mood so ngo nam sidwb mvram, hoggab ngoqg ab Debidg otuqb no Pwnbo At Swg pvvb uddum mam jool wnum, hoo ngoqg abwg hentwr yukho no kam hemba jinum.”

²⁷‍Hoqgab Solomon At Swg nyubwb swwn bo Abiyatarnvn roopaqnum, Silo ho mwv Ilig imiq dvpar gab agam gooknam mam At Swg gomcwram niqtuq lengm kunum.

²⁸‍Ho puiyv Joab dookho hvvcnum—hoggab Joab Absolom gab nyemaq daqma sunum hvbmabde Adonija gab mwv nyemaq daqnum—Joab At Swg tombub kenum hoo yugw cwwrwho cwwgwl doonum.

²⁹‍Hoo hoq puiyam Lvpw at Solomonnvn betamnum, “Joab At Swg tombub kepa ku, hoo kaato, mwv yugw bviywrho doodo,” Solomon Jehoiadag ko tuup Benaianvn kanaml begamv, “Wn, mwam patab lota.”

³⁰‍Ho Benaia At Swg tombu ho haanum hoo mwam benum, “Lvpw atv gaml jido, ‘agwb lengto.’” Hvbmabde mwv benum, “Ma, ngo so sitayin.” Ho Benaia gomcwram lvpw atam lokta baqa jinum begamv, “soq sib Joab benum, hoo soq sib mwv ngam birwqnum.”

³¹‍Lvpw atv mwam birwqnum, “Mwv hoggub bepan hvb nyita, mwam patab ta hoo mwam liita, hoo pagoq doomab Joabg ywlw twwnam hijum gorgiam ngoqg soqgv la ngoqg abwg nombu soqgv naapaqto.

³²‍Mwwg ywlw twwnam gorgiam At Sw mwwg dumpo ho haam dvb jikur gvnka, hoggab ngoqg ab Debidg cengma dvb mwwg lyoqr orioq lvgab mwv nyi vnyi go mwam lootw yaab la al yaan boam, Nerwg ko tuup Abner, Israelwg sipai saabam hoo Jeterwg ko tuup Amasa, Judag sipai saabam mengnum.

³³‍Hoqgab bulug hijum mam Joabg dumpo hoola mwwg hosiq tuluho nwrba gob haam tayin. Hvbmabde Debid gab la mwwg hosiq tulu gab hoo mwwg pwqlw gab At Swg swrsongam nwrba gob dootayin.”

³⁴‍Ho Jehoiadag ko tuup Benaia wnum hoo mwam patabl hoo mengnum. Hoo deexa-rara mwwg atwg nam uraho mwam liiknum.

³⁵‍Lvpw atv Jehoiadag ko tuup Benaianvn Joab kwlib sipai saab gob mvknum, hoo lvpw atv nyub Jadoknvn Abiyatar kwlib mvknum.

³⁶‍Ho lvpw atv pui kanam tvl Simeinvn goqa mvnum hoo mwam benum, “Noqgab no atv Jerusalemho nam loq namg mvgdvl hoqho doogw to, hoo hoqgv hogloqkam asaq nyookub wlin maabv.

³⁷‍Hogloq aalam no Kidron kucw hoqgv korbo baloqkam ho cengto no sitayin. Noqg hijumv noqg atwg dumpo ho haatayin.”

³⁸‍Hoo Simei lvpw atam benum, “Hoggv no bedwn hv aldo; ngoqg bir lvpw at hoggub benum, noqg nyerangv hvb nyitayin.” Ho Simei Jerusalemho oyu mood gob doonum.

³⁹‍Hvbmabde soq sib nyinum, vnyw nywum vtwr-anya moodho Simeig nyera vnyi go Gatwg lvpw at Makkag ko tuup Akis dookub kenum, “Kaato, noqg nyerangv Gat ho doodo,”

⁴⁰‍Simei gorab layil hoo svdamb caonum hoo mwwg nyera tulungam meegaq taab Gatwg Akis dookub wnum. Simei wnum hoo mwwg nyera tulungam Gat hoqgv boanum.

⁴¹‍Hoo hwdlo Solomonnvn Simeig Jerusalem hoqgv Gatwb wpel hoo hookurnam mam betam yin,

⁴²‍lvpw atv Simeinvn goqanum hoo mwam benum, “At Swg emin ho ngo nam dingl hingky jaqb beo-belam begamv, ‘Hogloq aalam no soqgv lvvgwb leng nyiloqkam hoo hogloq nyook bvjaqkam wb nyiloqkam ho cengto no sitayin’? Hoo no ngam benum, ‘Hoggv no bedwn hv aldo; ho ngo tvjw tayin.’

⁴³‍Hoggub no At Swg emin ho noqg dingrnam mam pvvmanum hoo nam ngoqg gaml jinam mam no tamanum?”

⁴⁴‍Lvpw atv Simeinvn benum, “Noqg atwg hang ho no cengdo ngoqg ab Debidnvn noqg almab nyinam mwlwngam. Hoqgab At Sw noqg almab nyinam mam noqg atwg dumpo ho hookur mvtayin.

⁴⁵‍Hvbmabde Lvpw at Solomonnvn lvqc citayin, hoo Debidg pwqlwngam At Swg agaho nwrba gob mvl aptayin.”

⁴⁶‍Ho lvpw atv Jehoiadag ko tuup Benaianvn gaml jinum, hoo mwv lengnv hoo mwam patabnum, hoo mwv sinum. Hoqgab lvpw-hativ Solomonwg alaqho dooknum.