Read Nyishi 1 LVPW ATWG 20 Bible Online

1 LVPW ATWG 20 - Nyishi bible

1 LVPW ATWG 20

¹Siriyag lvpw at Ben-hadad mwwg sipai mwlwngam lvkin gob goqkumnum. Mwwg lvgab lvpw atv cammum leq vnyi go, svpurv hoo ceriotv doonum. Hoo mwv caanum hoo Samariyangam nyob pal doqyumnum hoo hoqham ceekol nyob panum.

²‍Hoo mwv Israelwg lvpw at Ahabnvn bopam uraho pui kanam tvl hoo mwam benum, “Soq sib Ben-hadad bedo:

³‘Noqg rupv hoo noqg hunv ngoqgv; noqg dengky bo nywxw ngvla ko tulu hvvkam ngoqgv.’”

⁴‍Hoo Israelwg lvpw atv birwqnum, “Noqg benam hvb, ngoqg nyiit at, Lvpw ata, ngo noqgv, hoo ngoqg doognam hog mwlwngv noqgv.”

⁵‍Pui baqn bov lokta hookurnv benum, “Soq sib Ben-hadad bedo: ‘Ngo nam bilwq gvi yin, “Noqg rupam hoo noqg hunam, noqg nywxw-ko tulungam ngam jilwqto.”

⁶‍Hoq aoho aram mam soq mood so ngoqg nyera tulungam ngo kanam tayin, hoo noqg nammam hoo noqg nyera tulug nammam bulv hubyiq tayin hoo nulug tumanam mwlwngam bulv ham naal wgleq gvtayin.’”

⁷‍Ho Israelwg atv gvda hoqg nyiixa mwlwngam goqkuml hoo benum, “Sija mwwka to, hoo kaato hoggub soq nyi si vs-axaq nyidwb meegaq dvn, hoggab mwv ngoqg nywxwngam la ngoqg ko tulungam, hoo ngoqg rupam la ngoqg hunam jito hvl pui bilwql kanamnum, hoo mwam ngo ham vvk hvl loonum.”

⁸‍Hoo nyiixa tulu ngvla nyiilu mwlwngv mwam benum, “Ham vcwr gokam tamabv ho jikam maabv.”

⁹‍Hoqgab mwv Ben-hadadwg pui baqa bo tulungam benum, “Ngoqg nyiit at lvpw atam betam ta, ‘Noqg nyerangam noqg otuqb koconam ham ngo nyitayin, hvbmabde konyunam pagoq sam ngo nyila ram.’” Hoo pui baqn bov wknv hoo mwam lokta gomcwram baqa jinum.

¹⁰‍Ben-hadad mwam pui bilwql hoo benum, “Ngam wmin gvnbo nyiilungv Samariyangam diimwr yumgub mvtwl bulug alaqho bwwl wma yinyiloqkam, pwnbo tulungv ngam laqm-baqm tvbv hoo sid bvkam mvto.”

¹¹‍Hoo Israelwg lvpw atv birwqnum, “Mwam betam ta, ‘Nyob paka mins maatab, atv atam koi gob lardwb nyima dvn.’”

¹²‍Hwdlo Ben-hadad lvpw atwg opo twwk cwwrwho twwdul dooyikho soq pui sam mwv tapayin, mwwg nyi tulungam mwv benum, “Nulv mwx-mvaqto.” Hoo bopam mam ceeko dvb bulv at-atv mwx-mvaqnum.

¹³‍Hoo kaato, nyiqry benbo ak Israelwg lvpw at Ahab dookub haanum hoo benum, “Soq sib At Sw bedo, soq dumtwq miilyw bo nyi tulu bvlam kaapa dvi yv? Kaato, soq aal so bulam noqg alaqho jilwq tayin, hoo ngo At Swv hvl no cengtayin.”

¹⁴‍Hoo Ahab benum, “Hiyv hvl benum?” Mwv benum, “Soq sib At Sw bedo, dwrbug nyiit rad tulug nyera tulungv nyidwb nyitayin.” Ho mwv benum, “Hiyv nyob sam parab gvtayin?” Mwv birwqnum, “No lak.”

¹⁵‍Ho mwv dwrbug nyiit rad tulug nyera tulungam goqkumnum, hoo bulv 232 go doonum. Hoo bulug kokwb mwv Israel nyiilungam goqkumnum, ho hv lwwyw kvn go nyinum.

¹⁶‍Hoo hwdlo Ben-hadad mwv la cammum leq vnyi lvpw at tulungv mwwg lvgab opo twwk cwwrwho twwl hoo twwxum tvl dooiyik aal lvpaho bulv lvvgwb lengnum.

¹⁷‍Otuqcob dwrbug nyiit rad tulug nyera tulungv wconum. Hoo Ben-hadad rusil kaaya mvdwb kanamnam tulungv mwam pui baqanum, “Nyi acam go Samariya hoqgv lvvgwb hoodul doodo.”

¹⁸‍Mwv benum, “Bulv swrso gab lengd nyiloqkam bulam tordwb nootu to. Ho bulv nyob patab lengd nyiloqkam bulam tordwb nootu to.”

¹⁹‍Hoqgab dwrbug nyiit rad tulug nyera tulu ngvla sipai tulungv bopam ura hoqgv lvvgwb lengnum.

²⁰‍Hoo nyiicwr-cwrxiv mwwg nyiam mengnum. Siriya nyi tulungv keleqnum, hoo bulam Israelv ruqmin gvnum, hvbmabde Siriyag lvpw at Ben-hadad svpur xarn bo lvgab svpur hoqgv keleqnum.

²¹‍Hoo Israelwg lvpw atv lvvgwb lengb nv svpuram la ceriot tulungam mengnum, hoo Siriya nyi tulungam nyob paiyanum.

²²‍Ho nyiqry benbo akv Israelwg lvpw at ogum ho haanum hoo mwam benum, “Haato, no atv noqg atoram hwngkw dvb mvto, hoo noqg nyitanam hog mwlwngam hengab jaqb mwwka gvdwl nyito, hoggab dug poolam Siriyag lvpw atv lokta nam ceekol nyob patab haatayin.”

²³‍Hoo Siriyag nyera tulungv mwam benum, “Bulug pwnbov yorn tulug pwnbov, hoqgab bulv ngulam ator yaado. Hvbmabde kuj ngulv bulam haapa ho ceekol nyob patuj, hoo jvqtw jaqb ngulv bulam ator yaatayin.

²⁴‍Hoo soq sam nyito: lvpw at tulungam apaqto, bulug kwlib bulug sipai saab tulungam vlwqto,

²⁵‍hoo noqg sipaiyv hog hwdwg siknum hwdkalam go goqkum to, svpur gab svpur kalam loq, hoo ceriot gab ceriot kalam loq haam to. Ho ngulv bulam haapa ho ceekol nyob patayin, hoo jvqtw jaqb ngulv bulam ator yaatayin.” Hoo bulug benam mam mwv tanum hoo hoqhvb nyinum.

²⁶‍Dug pool ho Ben-hadad Siriya nyi tulungam goqkumnum hoo Israelam ceekol nyob patab Apek ho caanum.

²⁷‍Hoo Israel nyiilungam goqkumnum hoo nwwxo-svtam mam jinum hoo bulam ceekol nyob padwb wnum. Israel nyiilungv bulug agaho sibin dornyi go daqn bo hvb nyinum, hvbmabde Siriya nyi tulungv gvdangam pumlup tvl doonum.

²⁸‍Hoo Pwnbog nyi ak hv ogumb hvvnwqnv Israelwg lvpw atam benum, “Soq sib At Sw bedo, ‘Siriya nyi tulungv bedo, “At Sw yornwg pwnbov hvbmabde mwv haapag pwnbo ma hvdo,” hoqgab soq dwmtwq-miilyw nyi mwlw sam noqg alaqho ngo jilwq tayin, hoo ngo At Swv hvl no cengtayin.’”

²⁹‍Hoo bulv kvvrwq-kaataq dvb aal kvn gob svmcw mvl doonum. Ho aal kvn deen ho nyob patab wrwq minsnum. Hoo aal lookin ho Israel nyiilungv Siriya nyi tulug lvpiab wnbo sipai tulungam 100,000 go mengnum.

³⁰‍Hoo doonyu bo tulungv Apek bopam urab kilwqnum, hoo doonyu bo nyiam gurumv 27,000 nyi go tabjabnum. Ben-hadad kam kenum hoo bopam urab jaqg pwqlw urab haanum.

³¹‍Hoo mwwg nyera tulungam mwv benum, “Sija kaato, ngulv tapanum Israel nombug lvpw at tulungv aya mwwpa bo lvpw at tulungv hvl tapanum. Kuj ngulv tuila vjam ngulug hwwpo so hwwlwq tvl hoo lwwpo so osongam tulwq tvl hoo Israelwg lvpw at dookub wnuj. Lokam mwv ngulug swwgam swwm dvb jikam yin pv.”

³²‍Hoqgab bulug hwwpo ho bulv tuila vjam hwwlwq tvl hoo bulug lwwpo ho bulv osongam hoqlwq tvl hoo Israelwg lvpw at dookub wnv hoo benum, “Noqg nyera Ben-hadad bedo, ‘Anya mwwpa gvdwl ngam swwm dvb jitbvk hvl bedo.’” Hoo mwv benum, “Mwv hvraqb swwl dooxiq do i? Mwv ngoqg vbw-bor hvb nyidwn.”

³³‍Sija ho nyi tulungv muxnam mam kaagab peel, hoo bulv mwwg hoqgv nyebia jaqb naanum hoo benum, “Vv, Ben-hadad noqg vbw-borv.” Ho mwv benum, “Wgdvl hoo mwam boa ta.” Ho Ben-hadad mwwg dookub lvvgwb lengnum, hoo mwv mwam ceriot aoho cao mvdwb mvnum.

³⁴‍Hoo Ben-hadad mwam benum, “Noqg abwg hoqgv ngoqg abwg bopam tulu naaknam ham ngo nam jikur taikun, hoo no atv Damaskas ho kwm-kor mukumko nyookam mvs to, ngoqg ab Samariya ho hoggub hvb no nyito.” Hoo Ahab benum, “Ngo nam soq pagoq tulu gab wwm gvi kun.” Ho mwv mwwg lvgab birnam pvvbam mvtwl hoo mwam wwm kunum.

³⁵‍Hoo At Sw gaml jinam hoqgv nyiqry benbo ko tuup tulu akgon, mwwg ajinam benum, “Anya mwwpal, ngam jwwtwb.” Hvbmabde nyi ak hv mwam jwwramk hvl benum.

³⁶‍Ho mwv mwam benum, “No At Swg agam yalam tvjw ma, kaato, ngoqg soqgv no wleq kalam sony nyot dorg nam cextayin.” Hoo mwwg hoqgv mwv wleq kalam sony nyot dorg mwam wrwqnum hoo mwam cetabl hoo cexnum.

³⁷‍Ho mwv nyi akta kaapanum hoo benum, “Anya mwwpal, ngam jwwto.” Hoo nyi ak hv mwam jwwknv-jwwknv hoo mwam un jwwgnum.

³⁸‍Hoqgab nyiqry benbo ak hv hoqgv wleqnum hoo mwwg vnyiqkam un baqn bo hvb vm-akaqb vj puucw tvl lvpw atam lamta ho kaaya yaal doonum.

³⁹‍Hoo lvpw atv wpeq yin, mwv lvpw atam sogoql xabl benum, “Noqg nyerangv nyob padu koob wnum, hoo kaato, sipai ak hookurnum hoo ngoqg dookub nyi ak boa layil hoo benum, ‘Soq nyi sam hvvminl rvkil doogto; mwv nyiib nyiloqkam, mwwg swwg kwlib noqg swwgam naatayin, ho hvb mabnyiloqkam no rup telent ak jidwb nyitayin.’

⁴⁰‍Hoo noqg nyerangv toloq-boloqb nyomab nyidu yukho, mwv keleqnum.” Israelwg lvpw atv mwam benum, “Nam pw-hwwnam mam hvb hwwm to; hoq ham no atv pvvb mwbwq suknum.”

⁴¹‍Ho mwv nyebia jaqb mwwg vnyiq hoqg puucwnam mam pupaqnum, hoo Israelwg lvpw atv mwam nyiqry benbo tulug pengko hoqgv ak gon kunyi hvl kaacin kunum.

⁴²‍Hoo mwv mwam benum, “Soq sib At Sw bedo, ‘Hiyam ngo twrkiq-twrmal twryum tvk hvl benam nyi ak ham noqg alaq hoqgv tolin paku, hoqgab mwwg swwg kwlib gab noqg swwgam, hoo mwwg nyiilu kwly gab noqg nyiilungam naatayin.’”

⁴³‍Hoo Israelwg lvpw atv mwwg nammwb hang lengl hoo mwwdwql wknum hoo Samariya ho haanum.