Read Nyishi 1 LVPW ATWG 21 Bible Online

1 LVPW ATWG 21 - Nyishi bible

1 LVPW ATWG 21

¹Sija Samariyag lvpw at Ahabwg dook bviywrho, Jejreel hoqg Nabot, Jejreel ho roo boolu ak doonum.

²‍Hoo soq kokw so Ahab Nabotnvn benum, “Noqg roo boolungam ngam jitbv, ho hoq ham ngo oo boolub mvtayin, hoggab hoqhv ngoqg nam ogum si doodo, hoo hoq kwlib ngo nam alyan bo roo boolungam jitayin; ho no al mwwpa baloqkam, hoqg koram ngo twngkwb jitayin.”

³‍Hvbmabde Nabot Ahabnvn benum, “Ngoqg ab tulug gumnam nam jima bvk hvl At Sw bedo.”

⁴‍Hoo “Ngoqg ab tulug gumnam ngo nam jiram.” hvl Jejreel hoqg Nabot mwam begam gab, Ahab mwwg nam urab hang lengl hoo mwwdwqnv haanum. Hoo mwwg kartam ho mwwg nyuqm mam moopaq tvl mwv karl doonum hoo dvs dvmanum.

⁵‍Hvbmabde mwwg nywxw Jejebel mwwg dookub haanum hoo mwam benum, “Hoggub noqg yalv mwwdwql ho no dvs dvma dvn?”

⁶‍Hoo mwv mwnwn betamnum, “Ngo Jejreel hoqg Nabotnvn agam gool hoo mwam benum, ‘Noqg roo boolungam ngam jitbv ngo twngk jitayin, ho hvbmab no mwwlwq baloqkam, hoq kwlib ngo nam asaq roo boolu loq ak jitayin hvnum.’ Hoo mwv birwqnum, ‘Ngoqg roo boolungam ngo nam jiram.’”

⁷‍Hoo mwwg nywxw Jejebel mwam benum, “No sija Israelam pvvb bwwl doogdvn yv? Gorabto hoo wtw dvto hoo noqg hangv hemp-hvnyir to; Jejreel hoqg Nabotwg roo boolu ham ngo nam jitayin.”

⁸‍Hoqgab mwn Ahabwg emin ho pota tulungam xeqtwl hoo hoq tulu ham mwwg morxtubnam mam tubnum, hoo mwwg lvgab bopam ho doonbo nyiixa tulu ngamla nyiilo bo nyi tulungam mwn pota tulungam jilwqnum.

⁹‍Hoo mwn pota tuluho hvl xeqnum, “Dvma-twwmab aal loog vrr rwl doodwb puiyam baqm to, hoo Nabotnvn nyiilug koibo akwb mvto.

¹⁰‍Hoo mwwg taqcgon ho dooxa bo nyi vnyi go doorwql doom dvb mvto, hoo mwam bulam ceekol hvl bem dvb jito, ‘No Pwnboam la lvpw atam beenum.’ Ho mwam lvvgwb boolinl hoo sidwb wlw hurx mvto.”

¹¹‍Hoo mwwg bopamho doonbo nyiixa tulu ngvla nyiilo tulungv Jejebel hoggub bulam gomcwr bel jilwqnum hvb nyiknum. Pota tuluho mwn hoggub bulam nyim dvb xeqtwl jilwqnum hvb,

¹²‍bulv dvma-twwmab aal loog vrr rwl doodwb puiyam baqnum hoo Nabotnvn nyiilug pengko ho koibo gob mvnum.

¹³‍Hoo dooxa bo nyi vnyi go haamnum hoo mwam doorwq mvnum. Hoo dooxa bo nyi vnyi hv Nabotnvn nyiilu mwlwg kaagaho ceekol begamv, “Nabot Pwnboam la lvpw atam beenum.” Ho bulv mwam bopam lvvgwb boolinum hoo mwam wlw lvgab sidwb hurx kunum.

¹⁴‍Ho bulv Jejebelnvn pui kanaml begamv, “Nabotnvn wlw hurx paku; mwv sipa ku.”

¹⁵‍Jejebel Nabotnvn wlw hurl hoo hurx paku hvl ham tapa kalam twqda, Jejebel Ahabnvn benum, “Gorabto, Jejreel hoqg Nabot, mwv hogloq ham nam twngk jijaqkam jiram hvnam mwwg roo boolu ham gumn naato, hoggab Nabot swwl dook ma, hvbmabde sin kuba.”

¹⁶‍Hoo hwdlo Ahab Nabot sin kuba hvl tapa twqda kalam, Ahab Jejreel hoqg Nabotwg roo boolu ham gumn naadwb gorabnum.

¹⁷‍Ho At Swg gomcwrv Tisbeg Ilijanvn haanv begamv,

¹⁸“Gorabto, Samariya ho doonbo Israelwg lvpw at Ahabnvn igdvl kvvrwqta; ho kaato, mwv Nabotwg roo boolungam gumn naanum uraho mwam kaapa tayin.

¹⁹‍Hoo no mwam hvl betayin, ‘Soq sib At Sw bedo, “No nyiingam mengtwl hoo mwwg gumnam rub noqgab naap ku i?” Hoo no mwam hvl betayin, ‘Soq sib At Sw bedo: Ikiv hogloq ho Nabotwg uiyam lyal dvnum hoqho noqg uiyam kam lyaql dvtayin.” ’ ”

²⁰‍Ahab Ilijanvn benum, “Oa, ngoqg ceebiongv, no ngam kaapanum i?” Mwv birwqnum, “Ngo nam kaapanum, hoggab no atv atam almanam nyidwb At Swg kaagaho puqpaq sunum.

²¹‍Kaato, noqg aoho ngo ciqcaq-bviyaqkam haam tayin. Ngo nam twrkiq-twrmal twryum tayin, hoo nyera ge ho danyib swwn bo Israel urag Ahabwg nyegam mwlwngam twrkub mengpaq tayin.

²²‍Hoo noqg ngam vc loodab hang lengdwb nyiluq ko-gab, noqg nombungam ngo Nebatwg ko tuup Jeroboamwg nombu hvb, hoo Ahijag ko tuup Baasag nombu hvb mvtayin, hoo hoggab no Israelam nyic nyim dvb mvpa ku.

²³‍Hoo At Sw Jejebelnvn kam benum, ‘Jejreelwg gurum uraho iky tulungv Jejebelnvn dvtayin.’

²⁴‍Ahab dvpar hoqgv hiyv lajaqkam bopam uraho sib nyiloqkam iky tulungv dvtayin, hoo mwwg gv hiyv lajaqkam deela bvbin ho sib nyiloqkam doag pvtangv dvtayin.”

²⁵(Hiyv kam atv atam almanam nyidwb At Swg kaagaho Ahab hvb atam puqmanum, hiyv mwwg nywxw Jejebelnvn bilwq kotwl nyinam hvb nyinbo doomanum.

²⁶‍Hiyam At Sw Israel nyiilug agaho hoqgv ruqpaqnam Amor nyi tulug nyinam hvb mwv bulum-kac looda dvb murty tulungam xumnum.)

²⁷‍Hoo hwdlo soq gomcwr tulu sam Ahab tapa yukho, mwwg vjam mwv pumwqnum hoo mwwg gv-ngam tuila vj hoqgv koolupnum hoo dvma-twwmab vrr rwl hoo tuila vj hoqgv karnum hoo vc loodab mwwdwqnum.

²⁸‍Hoo At Swg gomcwrv Tisbeg Ilijanvn haanv begamv,

²⁹“Ahab atv mwv hoggub ngoqg agaho yannam mam no kaapa dvi yv? Hoggab mwv ngoqg agaho yan ko-gab, ngo mwwg swwl dood mood so ngo ciqcaq-bviyaqkam haam jiram; hvbmabde mwwg ko tuup swwl dood moodam ngo mwwg nombu ho ciqcaq-bviyaqkam haam tayin.”