Read Nyishi 1 LVPW ATWG 22 Bible Online

1 LVPW ATWG 22 - Nyishi bible

1 LVPW ATWG 22

¹Vnyw nywum go Siriya ngvla Israelv nyob pamin sumab doonum.

²‍Hvbmabde vnyw nywum deenho Judag lvpw at Jehosapat Israelwg lvpw at dookub haanum.

³‍Hoo Israelwg lvpw atv mwwg nyera tulungam benum, “Ramot-gilead gvdangv ngulug nyookv, hoo ngulv cooikab doodo hoo Siriyag lvpw atwg alaq hoqgv ham ngulv nookur kuma, nulv ham cengs i?”

⁴‍Hoo mwv Jehosapatnvn benum, “No ngam Ramot-gilead ho nyob pamin gvb yv?” Hoo Jehosapat Israelwg lvpw atam benum, “Ngo noqgv, ngoqg nyiilungv noqg nyiilu hvb nyidwn, ngoqg svpur tulungv noqg svpur tulu hvb nyidwn.”

⁵‍Hoo Jehosapat Israelwg lvpw atam benum, “Otuqcob At Swg gomcwram hwwka coot ju.”

⁶‍Ho Israelwg lvpw atv nyiqry benbo tulungam lwwpy gob nyiingv lvkin gob goqkumnum, hoo bulam benum, “Ngo Ramot-gileadam nyob paiyin dvi yv, ma ngo apaq hind yv?” Hoo bulv benum, “Wn, hoggab At Sw ham lvpw atwg alaqho jilwq tayin.”

⁷‍Hvbmabde Jehosapat benum, “Hiyam ngulv taka dvb soq so At Swg nyiqry benbo asaqkv dooma dvn yv?”

⁸‍Hoo Israelwg lvpw at Jehosapatnvn benum, “Nyi ak doodwn, Imlag ko tuup Mikaiya, hiyv ngul gab At Swn hwwka jidwb nyila dvn, hvbmabde ngo mwam oyum dvn, hoggab mwv nywywngam ngoqgab alboam nyiqry bema dvn, alman boam twq.” Hoo Jehosapat benum, “Soq sib lvpw atv bema bv.”

⁹‍Ho Israelwg lvpw atv saab ak goqanum hoo benum, “Imlag ko tuup Mikaiyanvn nyebia jaqb soqb boa ta.”

¹⁰‍Sija Israelwg lvpw atv la Judag lvpw at Jehosapat bulug xinam vjam kootwl Samariyag haagag toggoqg deela ho bulv pwqlw ho doodunum, hoo bulug agaho nyiqry benbo tulungv nyiqry bidul doodunum.

¹¹‍Hoo Kenaanag ko tuup Jedekiya mwv atv yoqdwr hoqgv vrrw ata go mvnum hoo benum, “Soq sib At Sw bedo, ‘Soq tulu soqgv nulv Siriya nyi tulungam bulam twryum maady deedib ruqtayin.’ ”

¹²‍Hoo nyiqry benbo tuluhv nyiqry benum, “Ramot-gilead ho caan hoo mviya ta; At Sw lvpw atwg alaqho soq sam jilwq tayin.”

¹³‍Hoo pui baqn bov Mikaiyanvn goqa taab wnv hoo mwam benum, “Kaato, lvpw atgab nyiqry benbo tulungv lvkin gob mwv altai hvl bedo. Hoqgab noqg gomcwram kam bulam ak gon benam hvb bijto, hoo mwwg tvlwq dvb agam gooto.”

¹⁴‍Hvbmabde Mikaiya benum, “At Sw swwl doody deedib, hoggv At Sw ngam beto hvtayin, ngo ham betayin.”

¹⁵‍Hoo hwdlo mwv lvpw atwg dookho hvvc yukho, lvpw atv mwam benum, “Mikaiya, ngulv Ramot-gileadam nyob patab wiyin dvi yv, ma ngulv apaq hind yv?” Hoo mwv birwqnum, “Caan hoo mviya tayin; lvpw atwg alaqho hoq ham At Sw jilwq tayin.”

¹⁶‍Hvbmabde lvpw atv mwam benum, “Hog hwdgo ngo nam dingl benum hwdlo no agam gooikam asaq goomabv hvbmabde At Swg eminho jvqtwngam gootam twqto?”

¹⁷‍Hoo mwv benum, “Sviya rvky bo dooma yin sviyangv cwrsaq-twqb nyinam hvb, Israelv cwrsaq-twqb puutu aoho doodwb ngo kaapanum. Hoo At Sw benum, ‘Soq so nyiit at dooma; nyiicwr-cwrxiam mwwg atwg nammwb swrsob wkur mvto.’ ”

¹⁸‍Hoo Israelwg lvpw atv Jehosapatnvn benum, “Ngo nam betam maan mviyv, mwv ngoqgab alboam nyiqry bema dvn, alman boam twq.”

¹⁹‍Hoo Mikaiya benum, “Hoqgab At Swg gomcwram tato: At Swn mwwg pwqlw ho doodu dvb, hoo mwwg laqc-lvqbwqho ao gumtwngv mwwg bviywrho doqdu dvb, ngo kaapanum;

²⁰‍hoo At Sw benum, “Ho Ahabnvn Ramot-gilead ho caal sim dvb, hiyv mwam benyioql bela tayin i?’ Hoo akwn-akwn pagoq benum, hoo asaq akv kam asaq pagoqb benum.

²¹‍Ho yalv ak agab haanum hoo At Swg agaho daqtwl hoo begamv, ‘Ngo mwam benyioq tayin.’

²²‍Hoo At Sw mwam benum, ‘Hognvk hoqgv nyin tayin?’ Hoo mwv benum, ‘Ngo wtayin, hoo mwwg nyiqry benbo tulungam xaalyo yal hoqgv agam goom dvb mvtayin.’ Hoo mwv benum, ‘No mwam benyioq ta, hoo no niqtuq lengtayin; wn hoo nyita.’

²³‍Hoqgab sija kaato, At Sw nyiqry benbo tulungam xaalyo bo yalam agam goom dvb jilwq paku; At Sw noqgab soq ciqcaq-bviyaqkam haam dvb bibwq paku.”

²⁴‍Ho Kenaanag ko tuup Jedekiya ogumb hvvnwqnv hoo Mikaiyanvn nyuqm mam pitaql hoo benum, “Hoggub At Swg Yalv ngoqg hoqgv wlayil nam agam goonam?”

²⁵‍Hoo Mikaiya benum, “Kaato, hwdlo no atv noqg pwqlw urab haal kvsil dooikam, hoq aalam no kaapa tayin.”

²⁶‍Hoo Israelwg lvpw atv benum, “Mikaiyanvn nootu to, hoo mwam bopamg nyiit rad Amon, lvpw atwg ko tuup Joas gv dookub bookur gvno,

²⁷‍hoo beto, ‘Soq sib lvpw atv bedo, “Soq nyi sam pvtwqho tumlwqto hoo hwdlo ngo swrsob hookur maady deedib, mwam dvs-twwsam anyo go jil dvl doogto.’”

²⁸‍Hoo Mikaiya benum, “No swrsob hookur kuba lo, At Sw ngoqg hoqgv agam gooma.” Hoo mwv benum, “Nul nyiilu mwlwngv tato!”

²⁹‍Hoqgab Israelwg lvpw atv Judag lvpw at Jehosapat Ramot-gilead ho caanum.

³⁰‍Hoo Israelwg lvpw atv Jehosapatnvn benum, “Ngo atv oksub gwwkub tayin hoo nyob pak urab wtayin, hvbmabde noqg kamtam no kooto.” Hoo Israelwg lvpw atv oksub gwwkub layil hoo nyob pak urab wnum.

³¹‍Hoq moodho Siriyag lvpw atv mwwg ceriot cammum leq vnyi kepten tulungam gaml jinum, “Anyo jaqkam ho koi jaqkam nyob pato, hvbmabde Israelwg lvpw at aro lvgab nyobam pato.”

³²‍Hoo hwdlo ceriot tulug kepten tuluhv Jehosapatnvn kaapayin, bulv benum, “Soq si jvqtw jaqb Israelwg lvpw at go mwwnum.” Ho bulv mwwg daiyab tobkurnv mwam ceekol nyob patanum. Hoo Jehosapat sogoq goqlinum.

³³‍Hoo hwdlo ceriot tulug kepten tuluhv hoqhv Israelwg lvpw at kuma hvl kaapayin, bulv mwam ruqngo peel wkurnum.

³⁴‍Hvbmabde nyi ak mwwg uppuqkam absam-abyam banv hoo Israelwg lvpw atwg soruq gvla nwwxo pengkob mwam vblwqnum. Hoqgab mwwg ceriot ham wgbo akam mwv benum, “Tobkur tuku hoo ngam nyob pak soqgv baqlin tuku, hoggab ngo wn gvpa ku.”

³⁵‍Hoo hoq aalho nyobam podul doonum, hoo Siriya nyi tulungam tuurwq tvl lvpw atv mwwg ceriot ho hiigw tvl ariyum namgub dooknv hoo mwv sinum. Hoo un hoqgv uiyv ceriotwg niikum ura namgub tolnum.

³⁶‍Hoo doonyiv haasv twqb nyiyikho sipai mwlwngam sogoql benum, “Nyiicwr-cwrxiv mwwg bopamb, hoo nyiicwr-cwrxiv mwwg gvdab wkur tuku!”

³⁷‍Hoqgab lvpw atv sinum, hoo mwam Samariya ho baqa kunum. Hoo lvpw atam Samariya ho bulv liiknum.

³⁸‍Hoo ceriot hoqgv uiyam bulv Samariyag iss sviyin hoqgv hwrxaqnum, hoo iky tulungv mwwg uiyam lyal dvnum, hoo At Sw mwwg gomcwr gooknam hvb jaqkam, meqjo bo tulungv bulv atv hoqho hursnum.

³⁹‍Ahabwg asaq bon nyinam mam la mwwg hog mwlwngam nyinam mam, hoo svt vrrw hoqgv nam mvnam mam la bopam tulungam mvnam mam Israelwg Lvpw at tulug Nwd Kitap lo xiqtul ap map nvi yv?

⁴⁰‍Hoqgab Ahabnvn mwwg ab tulungam svma liik ho liiknum, hoo mwwg kwlib mwwg ko tuup Ahajiya pvvb bwwl doognum.

⁴¹‍Israelwg lvpw at Ahab vnyw nywpy go swwyikho Asag ko tuup Jehosapat Judaho pvvb bwwl doorab gvnum.

⁴²‍Jehosapat vnyw cammum leq nywng go akam yukho mwv pvvb bwwl doorab gvnum, hoo mwv Jerusalemho vnyw camnyi leq nywng go pvvb bwwl doognum. Mwwg ann hoqg eminv Ajuba, mwn Silhig nyem kov.

⁴³‍Mwv mwwg ab Asag lamta wnam hvb wnum. Hoggv jvqtw dvn ham At Swg kaagaho mwv nyixiaq maab ham nyidul doonum. Hvbsujaqkam puutu aog xumk nyook tulu ham mvpaq maanum, hoo nyiilungv hvraqb pwr jinam mam la aky jinam mam puutu aog xumk ho jidul doonum.

⁴⁴‍Jehosapat Israelwg lvpw at lvgab swrsob doodwb pvvb mvnum.

⁴⁵‍Jehosapatwg asaq bon nyinam mam la mwwg atoram kaakinam mam, hoo hoggub mwv nyob panam hoq tulu ham, Judag Lvpw at tulug Nwd Kitap lo xiqtul ap map nvi yv?

⁴⁶‍Hoo mwwg ab Asag moodho xumk namho meqkar bo nyega tulu boumnam mam mwv gvda hoqgv twryum xaanum.

⁴⁷‍Idomho lvpw at doomanum; hvbmab lvpw at dvqsin bov lvpw at gob nyinum.

⁴⁸‍Jehosapat Tarsisig iss jaajam Opir gvdag hun gab mvnum, hvbmabde bulv wmanum, hoggab iss jaajv Ejion-geber ho yoqlwq kunum.

⁴⁹‍Ho Ahabwg ko tuup Ahajiya Jehosapatnvn benum, “Ngoqg nyera tulungam noqg nyera tulu lvgab iss jaajho wwm tvb,” hvbmabde Jehosapat ham mwwlwq maanum.

⁵⁰‍Hoo Jehosapat mwwg ab tulug sinam hvb siknum hoo mwwg ab Debidg bopam ho mwwg ab tulu lvgab liiknum, hoo mwwg kwlib mwwg ko tuup Jehoram pvvb bwwl doognum.

⁵¹‍Judag lvpw at Jehosapat vnyw camleq kvn go swwyikho Ahabwg ko tuup Ahajiya Israelam Samariya hoqgv pvvb bwwl doorab gvnum, hoo mwv Israelwg aoho vnyw nywnyi gob pvvb bwwl doognum.

⁵²‍Mwv At Swg kaagaho hoggv almadwn ham nyinum hoo mwwg abwg lamtab wnum hoo mwwg annwg lamtab wnum hoo Nebatwg ko tuup Jeroboamwg lamtab wnum, ho Israelam nyic nyimnum.

⁵³‍Mwv Baal gab bon nyijnum hoo mwam xumnum hoo Israelwg Pwnbo At Swn hang lengdwb nyiluqnum, mwwg abv hoggub nyitaq mwlw ho At Swn haaxaq dvb nyinam hvb mwv nyinum.