Read Nyishi 1 LVPW ATWG 3 Bible Online

1 LVPW ATWG 3 - Nyishi bible

1 LVPW ATWG 3

¹Solomon nyem naal Ijipt gv lvpw at Paronvn lvqry-laqso mvnum. Mwv Parog nyem koam naanum hoo mwwg atwg nam dookam hoo At Swg dvrwq namlongam hoo Jerusalemwg bvliam mvnya namgub, mwnwn Debidg bopam uraho boal doognum.

²‍Nyiilungv gvda puutu ho pwram jidwb nyinum hoggab At Sw gab dvrwq namlo mvma taanum.

³‍Solomon At Swn abynum, mwwg ab Debidg tomswrnam hvb nyil wdunam, mwv gvda puutu aoho aro ho pwr jinam mam la aky tulungam jinum.

⁴‍Hoo lvpw atv Gibeon ho pwr jitab wnum, hoggab hoqho gvda puutu aobov doonum. Solomon lwwyw gogab yugw ho boyuqnam akiam jinum.

⁵‍At Sw Gibeon ho ai yuma golo ho Solomonnvn kaakinum, hoo Pwnbov benum, “Koto hoggv ngo nam jitayin.”

⁶‍Hoo Solomon benum, “Noqg nyera ngoqg ab Debidnvn noqg tumab abynam mam no koi jaqb kaakin paku, hoggab noqg agaho mwv dengky jaqb, lootw jaqb, hoo dvrwq hangam baqtwl noqg daiyab wnum. Hoo mwwg gab no koibo la tumanam abiam pvvjnum hoo mwam ko tuup ak mwwg pwqlw ho doosiq mvdwb soq mood so jipa ku.

⁷‍Hoo sija ngoqg Pwnbo At Swa, noqg nyerangam ngoqg ab Debidg kwlib no mvpa ku, ngo anyo sujaqkam ngam jipa ku. Hoggub nyig wg tan ngo cengma.

⁸‍Hoo hiyam no nyiilu pengko hoqgv nyiilu koi dvb, ho dwmtwq-miilyw mvdwb xuqlinum noqg nyerangv doodwn.

⁹‍Hoqgab noqg nyerangam noqg nyiilungam cenglaql pvvb bwwl doognan lo, ho ngam al-koram mwwlaqnan lo jitbv, hvbmab nyiloqkam hiyv soq noqg koibo nyiilu sam pwbwb pvvb bwwl doog nyoj tayin?”

¹⁰‍Solomon hoggv konum hoqham At Sw hempnum.

¹¹‍Hoo Pwnbov mwam benum, “Hoggab no soq sam kopa ku, hoo no atv swwiyu dvb ho nyet dvb ho noqg ceebiog swwgam gab koma, hvbmabde no atv al-koram cenglaqnanam kopa ku,

¹²‍kaato, noqg gomcwr gook jaqb ngo nyitayin. Kaato, ngo nam mwwlaqkam la cenglaqnan puqnyiam jitayin, ho noqg hvb mwwlaqbo otuqho doomanum hoo noqg hvb mwwlaqbo kokwngam swwlin ram.

¹³‍Ngo noqg komanam nyetam la xinam mamkam ngo jigyin, ho noqg swwnam bumpw ho noqg singp hvb swwnbo lvpw at swwlin ram.

¹⁴‍Hoo ngoqg lamta tulub no wb nyiloqkam, ngoqg nyij-mujam la ngoqg gaml tulungam noqg ab Debidg nyinam hvb nyil paab nyiloqkam, ho noqg swwnam aalam swwiyu mvtayin.”

¹⁵‍Hoo Solomon huurabnum, hoo kaato, hoqhv yuma ak gos kunyi. Ho mwv Jerusalemho haanum hoo At Swg pvvb uddum agaho daqnum, hoo boyuqnam akiam hoo swrso akiam jinum, hoo mwwg nyera mwlw gab durum mam dvgnum.

¹⁶‍Ho meqjo bo vnyig lvpw atwg dookub haanum hoo mwwg agaho daqnum.

¹⁷‍Nyem akwn hv benum, “Oa, ngoqg bir at, soq nyem si la ngo nam namkin ho doodwn, hoo hwdlo mwn namho dooyikho ngo ko ak bwwnum.

¹⁸‍Ho ngoqg aal loum dvn bwwxo kokw so soq nyem siikam ko ak bwwnum. Hoo ngulv vpwb doonum. Ho ngulug lvgab namho nyi akkam doomin gvma dvn; ngunyiv aro namho doodwn.

¹⁹‍Hoo soq nyem soqg ko tuupv aiho sinum, hoggab mwn mwam karjabl karxnum.

²⁰‍Hoo hwdlo noqg paqn akv yubdu dooyikho mwn ai nywyw ra ho gorab layil ngoqg bviywr hoqg ngoqg ko tuupam naanum, hoo mwam mwnwg oc ho twlwql apnum, hoo mwnwg sinbo ko tuupam ngoqg oc ho twlwql ap jinum.

²¹‍Hwdlo ngo ar ho gorab layil ngoqg kongam gwwi twwm dvb nyitanum, kaato, mwv sitwl dooknum. Hvbmabde hwdlo ar yukho ngo mwam kvvdy lalal kaanum, kaato, mwv ngoqg ko bwwnam hvvmanum.”

²²‍Hvbmabde nyem asaq akwn benum, “Ma, swwl doonbo ko hv ngoqgv, hoo sinbo ko si noqgv.” Otuq ak hv benum, “Ma, hvbma, sinbo si noqgv, hoo tornbo ko si ngoqgv.” Soq siib bulv lvpw atwg agaho goonum.

²³‍Hoo lvpw atv benum, “Akwn hv bedo, ‘Swwnbo si ngoqg kov, hoo noqg ko tuupv sinbo si’; hoo asaq ak hv bedo, ‘Ma, hvbma; hvbmabde noqg kongv sinum, hoo ngoqg ko tuupv tornbo ak si.’”

²⁴‍Hoo lvpw atv benum, “Ngam lyoqr orioq lo daag bwa tvb.” Ho lyoqr orioqkam lvpw atwg agaho bwanum.

²⁵‍Hoo lvpw atv benum, “Swwl doonbo koam tuunyi gob mvto, hoo patu gon akwn hoo patu gon akwn jito.”

²⁶‍Ho ko tuup swwl doonbo nyem ak hv lvpw atam benum, hoggab mwnwg hangv mwnwg ko tuupam abynum, “Oa, ngoqg bir ata, mwnwn torl doonbo koam jito, hoo mwam hoggub nyijaqkam mengmabv.” Hvbmabde akwn hv benum, “Mwv ngoqg kamram ho noqg kamram; mwam tuunyi gob mvto.”

²⁷‍Ho lvpw atv birwql hoo benum, “Torl doonbo ko ham otuq nyem ak ham jito, hoo mwam mengmabv; mwn mwwg ann go.”

²⁸‍Hoo lvpw atwg pvvb mvnam mam Israel mwlwngv tapanum, hoo bulv lvpw atam vcjaqb modunum, hoggab Pwnbog mwwlaqkv mwwg ura lo dootwl jvqtw pvvb mvnam mam bulv cengnum.