Read Nyishi 1 LVPW ATWG 4 Bible Online

1 LVPW ATWG 4 - Nyishi bible

1 LVPW ATWG 4

¹Lvpw at Solomon Israel mwlwg lvpw atwb nyinum,

²‍hoo soq tulu si mwwg saab koibob nyinum: nyub Jadokg ko tuup Ajariya;

³‍Sisag ko tuup Elihorep la Ahija svkretvri gob nyinum; Ahiludwg ko tuup Jehosapat xiqtubo gob nyinum;

⁴‍Jehoiadag ko tuup Benaia sipai saab gob nyinum; Jadok la Abiyatar nyub tulu gob nyinum;

⁵‍Natanwg ko tuup Ajariya saab tulungam kaaya bob nyinum; Natanwg ko tuup Jabud lvpw atwg nyub bvla ajinb nyinum;

⁶‍Ahisar lvpw namlongam kaaya bob nyinum; hoo Abdag ko tuup Adoniram bon nyinbo nyera-paqn tulungam kaaya bob nyinum.

⁷‍Solomon Israel aoho saab camleq vnyi go doognum, hiyv lvpw atwg la mwwg imiq dvparag dvgam jinum. Nyiicwr-cwrxiv vnywngam pool barg dvgam jidwb nyikynum.

⁸‍Soq tulu si bulug eminv: Iprayimg diisw gvda hoqgv Ben-hur;

⁹‍Ben-deker, Makaj hoqgv Saalbim, Betsemes, hoo Elonbet-hanan;

¹⁰‍Arubbot hoqgv Ben-hesed (mwv Soko la hoq gvda hoqg Svka bo mwlwngv);

¹¹‍Napat-dor hoqgv Ben-abinadab (mwv Solomonwg nyem ko Tapat mwwg nywxwngv);

¹²‍Taanak, Megiddo, hoo Jejreel akog Jaretan bviywrg Betsean mwlwngam, hoo Betsean hoqgv Abel-mehola, ho taqcgon Jokmeam namgub Ahilud ko tuup Baana kaanum;

¹³‍Ramot-gilead hoqgv Ben-geber (mwv Manasseg ko tuup Jair nampam mam doognum, hoqhv Gilead ho doonum, hoo mwv Argob swsw-sangam doognum, hoqhv Basan ho doonum, mwwg uraho bopam tulu ngam gurum mutuml hoo tama lvgab viyap mvnam camx go doonum);

¹⁴‍Mahanaim hoqgv Iddog ko tuup Ahinadab;

¹⁵‍Naptali hoqgv Ahimaaj (mwv Solomonwg nyem ko Basematnvn mwwg nywxwb naanum);

¹⁶‍Aser la Bealot hoqgv Husaiywg ko tuup Baana;

¹⁷‍Issakar hoqgv Paruag ko tuup Jehosapat;

¹⁸‍Benjamin hoqgv Elag ko tuup Simei;

¹⁹‍Gileadwg gvda hoqgv Urig ko tuup Geber, hoqhv Amor nyi tulug lvpw at Sihon la Basanwg lvpw at Og gvdangv. Hoo hoq gvda gab ho nyiit rad ak pvvnum.

²⁰‍Juda la Israelwg nyiilungv sa-svlog xuqx hvb dumtwq-miilywnum. Bulv dvl-twwl hoo hempnum.

²¹‍Solomon Iupratas hoqgv Palistan gvda hoo Ijipt gv door namgub lvpw-hatiam mwlwngam pvvb bwwl doognum. Bulv nyoogangam bwal jinum hoo Solomonwg swwnam bumpw xaqb mwam bon nyijnum.

²²‍Aal loo-ngam Solomonnvn dvsam cammum koor gob wtwngam hoo camx koor gob dvgam jidwb nyinum,

²³‍sudum, svcar, bemb, hoo ox xupiabo poroq lvvg ho, hvvb oxbo doryw go, hoo svv camnyi go, sviya lwwgwb jidwb nyinum.

²⁴‍Hoggab mwv Iupratas hoqgv Gajag Tipsa dou-haaga namgub pvvb bwwl doognum. Dou-haagag lvpw mwlwngv mwwg uraho doognum. Hoo mwwg taqg-loosaq mwlwngam mwv swrsob doognum.

²⁵‍Hoo Juda ngvla Israelv swrsob doonum. Dan hoqgv Beerseba namgub nyiicwr-cwrxiv mwwg roo boolungam la taoq svvn boolungam swrsob Solomonwg swwd mood mwlw ho rongo mvl doonum.

²⁶‍Solomon mwwg ceriot svpur gab taabongv 40,000 go mvnum, hoo svpur xargbo gab 12,000 go mvnum.

²⁷‍Hoo soq saab tulu si Lvpw at Solomonnvn la mwwg tebol ho dvba bo mwlw gab at-atwg jid poolam nyiicwr-cwrxiv dvgam jinum. Bulv hog akkam pwwma-cwma dvb nyim mvmanum.

²⁸‍Tanyeqkam hoo svpur tulu gab amro ngam hoo hogloq ho nwmw-nwsin bvqlwq dvb nyinum hoqho bulv at-atwg bonam nyil bvqlwq jinum.

²⁹‍Hoo Pwnbov Solomonnvn mwwlaqkam la cenglaqkam xila maadwb jinum, hoo mwwg dumpo mwwnamv sa-svlog xuqxiam xila maanam hvb mwwnum,

³⁰‍hoqgab Solomonwg mwwlaqkv dou-cagag nyiilungam hoo Ijipt mwlw hoqg mwwlaqkam mwwbin yaanum.

³¹‍Hoggab mwv nyi asaq mwlwngam mwwlaq yaanum, Ejra nyi hv Etannvn kam, hoo Mahol gv ko tuup tulu Hemannvn kam, Kalkolnvn kam, hoo Dardanvn, hoo diis-paap gvda mwlw ho mwam yuunum.

³²‍Mwv dootin 3,000 go goonum, hoo mwwg beminv beknamv 1,005 go nyinum.

³³‍Mwv Lebanon sidar svvn tulungam goolayil gurum lvvgho swwnbo hissop svvn namgub goonum. Mwv svdin tulu pagoqkam, hoo pvta tulug pagoqkam, hoo tvb-tapeq tulu pagoqkam, hoo ngui tulug pagoqkam kam agam goonum.

³⁴‍Hoo gvda gvt hoqg nyiilungv Solomonwg mwwlaqkam haal tanum, hoo mwwg mwwlaqkam tapa bo swcw soqg lvpw at mwlwngv haal tanum.