Read Nyishi 1 LVPW ATWG 5 Bible Online

1 LVPW ATWG 5 - Nyishi bible

1 LVPW ATWG 5

¹Hwdlo Taiyarg lvpw at Hiram Solomonnvn mwwg ab kwlib lvpw at gob xuqpa hvl tapa yin mwwg nyera tulungam mwwg dookub kanamnum, hoggab Hiram Debidnvn lwxiam abynum.

²‍Hoo Solomon Hiramnvn pui bilwqnum,

³“No cengdo ngoqg ab Debid mwwg Pwnbo At Swg emin gab dvrwq namlongam mvnyi kuma hoggab mwam hwwiyuml doonbo mwwg ceebio tulungam nyob pal doonum, hwdlo At Sw bul mwlwngam mwwg lvpia niikum ho haama deedib nyob pamnum.

⁴‍Hvbmabde ngoqg Pwnbo At Sw ngam taqg-loosaq gvda mwlw hoqgv swrso mvdwb jipa ku. Ngo sija ceebio gokam ho beo-belam lakam nyob pady bo dooma.

⁵‍Hoqgab ngoqg Pwnbo At Sw emin gab dvrwq namlo loq ak ngo mvdwb mwwdo, At Sw hoggub ngoqg ab Debidnvn benum, ‘Noqg ko tuupam, hiyam noqg kwlib ngo noqg pwqlw ho pvvtayin hv ngoqg emin gab dvrwq namlongam mvtayin.’

⁶‍Hoqgab sija Lebanonwg sidar svvn tulungam ngoqgab peem dvb gaml jito. Hoo ngoqg nyera tulungv noqg nyera tulug lvgab nyimin gvtayin, hoo noqg nyera tulug nyijongam noqg nyijo mvp kojaqb ngo nam jitayin, hoggab no cengdo ngulug pengko so Sidon nyi tulug svvtaq peenam hvb peelaqbo dooma.”

⁷‍Hwdlo Hiram Solomonwg puiyam tapa twqda tvl mwv vcjaqb hwrcwl hoo benum, “Soq mood so At Swn paqdwb nyipa, hiyv Debidnvn mwwlaqbo ko tuup ak jitwl soq koibo nyiilug aoso lvpw at gob nyim paku.”

⁸‍Hoo Hiram Solomonnvn pui bilwql begamv, “Noqg ngam pui bilwqnam mam ngo tapa paku. Sidar la saipres svvtaq gab noqg konam mwlwngam ngo nyidwb mwx-mvaq dvn.

⁹‍Ngoqg nyera tulungv Lebanon hoqgv sa-svlo namgub baqa jitayin, hoo ngo ham swpwb raqm tvl noqg bekjaq nyook ho sa-svlo lvgab baqa mvtayin. Hoo ngo hoq tulu ham hoqho taapur mvtayin hoo no svvtaqkam nvvrwq laka. Hoo ngoqg nombu gab no ngoqg mwwbynam dvs-twwsam jiyi nvpv mwwdo.”

¹⁰‍Hoqgab Solomonwg mwwbynam sidar la saipres svvtaqkam Hiram mwam baqa jinum,

¹¹‍ho Solomon Hiramnvn wtwngam kor 20,000 go mwwg nambungam jinum, hoo jwwmwqnam kutiam kor 20,000 go jinum. Solomon soq sam vnyw-vnywngam Hiramnvn jinum.

¹²‍Hoo At Sw Solomonnvn mwwg dingrnam hvb mwwlaqkam jinum. Hoo Hiram la Solomonwg pengko ho swrsob doonum, hoo vnyiv birnam pvvb ak mvba sunum.

¹³‍Lvpw at Solomon Israel hoqgv nyera hvb bon nyim dvb nyiingv 30,000 gob xuqlinum.

¹⁴‍Hoo mwv bulam Lebanonwb pool-poolam 10,000 ak gogab kwly-kwlil wwm dvb kanamnum. Bulv pool bargwb Lebanonho hoo pool bvrnyi gob namho doonum. Adoniramnvn soq nyera hvb bon nyim dvb xuqlinam nyi tulungam kaaya mvnum.

¹⁵‍Solomon diisw gvdaho wlw pam dvb 80,000 gob xuqlinum hoo 70,000 gob wlwngam baqya boam xuqlinum,

¹⁶‍hoq lvvg ho Solomon 3,300 gob saab tulungam bonam kaal nyig boam doognum, ho bulv nyiilungam bonam nyim dvb tomswrl nyig-wgnum.

¹⁷‍Lvpw atwg gaml jigam gab, dvrwq namlog gwwlam ywrab nvdwb bulv xinam wlw pwt boam taqlinum.

¹⁸‍Hoqgab Solomonwg la Hiram hoo Gebalwg nam mvlaqbo nyi tulungv svvtaq wlwngam taql porl dvrwq namlongam mvdwb mwx-mvaq kunum.