Read Nyishi 1 LVPW ATWG 6 Bible Online

1 LVPW ATWG 6 - Nyishi bible

1 LVPW ATWG 6

¹Vnyw lwwpy la cam piin go Israelwg nyiilungv Ijipt gvda hoqgv lengxo kokw so, Solomon Israelwg aoho vnyw nywpy go pvvb bwwl dooiyik Jib poolwg, hoqhv pool bvrnyi deenv, ho mwv At Sw dvrwq namlongam mvrabnum.

²‍Lvpw at Solomon At Sw gab dvrwq namlongam camx kiubit go aaso dvb, camnyi kiubit go taqt dvb, hoo cammum kiubit go ao dvb mvnum.

³‍Haaga hoqg cwwrwngv camnyi kiubit go aasonum hoo nam hoqg taqtv nam hwdgo hom yinum, hoo nam haaga hoqg urangv camg kiubitnum.

⁴‍Hoo mwv nam pupum tulungam cibul taqnyo dvb la koc dvb mvnum.

⁵‍Mwv nam lvvgwg cwqcam dvqrwq dvb nam nvmpwngam xvryiq dvb nam ak dvrwq namlog xumkumko ura jaqg hoqgv mvcanum. Hoo taqg-loosaq mwlw ho mwv pwqlw rooxo dvb mvnum.

⁶‍Ako jaq hoq nammv ang kiubit taqt dvb, lvpa ak hv ax kiubit taqt dvb hoo oum deen ham kvn kiubit taqt dvb mvnum. Hoggab odum ao hoqg doopy caatam vnyiv mwlwngam ako yaanbo ham bocor yaadwb mvnum hoqgab cwqc hoqgv hog kwtw torcal torgw maanum.

⁷‍Hwdlo nammam mviyikho wlw lwwru hoqg taqlinam mam mvnum, hoqgab kvnyi jwwnam gokam ho vx panam gokam ho yoqdwr taqnam yal gokam tapa maadwb hwdlo nammam mviyikho mvnum.

⁸‍Nam ako jaqg haagangv nam namko daiya ho doonum, hoo hoq hoqgv lvpa nam bvla hoo oum deen ho caadwb vbiangv mvcanum.

⁹‍Ho mwv nammam mvnyanum, hoo mwv nam hoqg naaxangam sidar xaapo hoqgv la svvtaqkv mwlwqnum.

¹⁰‍Mwv nam nvmpwngam ang kiubit ao dvb mvsiq-mvsiql mvcanum, hoo nammam sidar svvtaq hoqgv tvqsiq-taqmeql mvcanum.

¹¹‍Ho At Swg gomcwrv Solomonnvn haanum,

¹²“No ngoqg nyij-mujam nyil wb nyiloqkam hoo ngoqg pvvb tulungam tvjw baloqkam hoo ngoqg gaml tulungam pvvl hoo ham nyil wb nyiloqkam, noqg ab Debidnvn ngoqg agam goonam mam, noqg soq nam mudu gvdwn pagoq sam, noqg lvgab ngoqg gomcwr gooknam mam mvko jitayin.

¹³‍Hoo Israelwg ko tulug pengko ho ngo doogw tayin hoo ngoqg Israelwg nyiilungam ngo ludum ram.”

¹⁴‍Ho Solomon nammam mvknv hoo ham mvnya kunum.

¹⁵‍Mwv nam urangam sidar svvda taqt bo hoqgv cwqcam hib-hibib tvqlwqnum. Nam doopy hoqgv naaxa namgub nam urangam mwv svvtaq taqt bo lvgab tvqlwqnum, hoo nam doopiam saipres svvtaq taqt bo hoqgv piulwqnum.

¹⁶‍Mwv nam uraho sidar svvtaq taqt bo hoqgv camnyi kiubit aaso dvb doopy hoqgv cwqc namgub taqg-loosaqb toqtumnum, hoo mwv ham nam urag ra lvpa jaqho mvnum, ham Dvrwq Kwrwqbo Dook gob eminum.

¹⁷‍Dvrwq kwrwqbo xumk nam ura ngv campy kiubit go aasonum.

¹⁸‍Nam urangam sidar svvtaq lvgab taql aaxy-amar hoo opu tulungam oj mwlwqnum. Wlwngam kaapa maadwb mwlwngam sidar svvtaq lvgab toqtumnum.

¹⁹‍Dvrwq namlog nam ura jaqho At Swg pvvb uddum joop koam mwx-mvaqnum.

²⁰‍Dvrwq namlog ura jaqho camnyi kiubit aaso dvb, camnyi kiubit taqt dvb, hoo camnyi kiubit ao dvb mvnum, hoo mwv ham loodwr jaqnbo hun lvgab pioqlupnum. Mwv yugwngam kam sidar svvtaq lvgab piulupnum.

²¹‍Hoo Solomon loodwr jaqnbo hun lvgab nam urangam pioqlupnum, hoo dvrwq kwrwqbo nam urag haagangam mwv hun gai lvgab rwwl apnum, hoo ham hun lvgab pioqlupnum.

²²‍Hoo nam nvmpwg urangam mwv hun lvgab pioqlupnum, nam nvmpwngam piaqnya maady deedib piaqnum. Dvrwq kwrwqbo nam urag yugwngam kam hun lvgab pioqlupnum.

²³‍Dvrwq kwrwqbo nam uraho mwv olib svvda hoqgv cerubim vnyi go mvtwl apnum, vnyi-vnyiam camg kiubit ao dvb mvnum.

²⁴‍Cerub akwnwg alap daayarv ang kiubitnum, hoo cerub akwn hoqgv alap daayarv ang kiubitnum; hoqg alap labgwn hoqgv alap labgwn xaqb camg kiubitnum.

²⁵‍Asaq cerub hvvkam camg kiubitnum; cerubim vnyi-vnyiv otu-aasongv hoo poongv aiyin lvkinum.

²⁶‍Cerub akwn hoqg aongv camg kiubitnum, hoo asaq akwn cerub hvvkam hwdkalam go aonum.

²⁷‍Mwv cerubim mam dvrwq kwrwqbo nam ura jaqg ra lvpa ho apnum. Hoo cerubim hoqgv alap labgwn nam hoqg cwqc akgon labdaqnum hoo asaq cerubg alap labgwn kalam taqcgon cwqcam labdaqnum; bulug alap tulungv nam lvpa ra ho lvbrwq minsnum.

²⁸‍Hoo cerubim mam mwv hun lvgab pioqlupnum.

²⁹‍Nam nvmpwg ura la lvvg cwqc cam cerubim la pvng svvnam la opu puulin dvb mwiyw-mvcnam ojam pilwqnum.

³⁰‍Nam doopy urangam la lvvgam hun lvgab pioqlupnum.

³¹‍Dvrwq kwrwqbo nam urag haagangam mwv olib svvda lvgab mvnum; viyap hoqg xaapo ngvla tvrgwngv taqang gob bubdwr-bubarnum.

³²‍Olib svvdag viyap yvbnyiam mwv cerubim mam, pvng svvn tulungam, hoo opu puulin dvb mwiyw-mvcnam ojam pilwqnum. Mwv hoqg cerubim mam la pvng svvn aoho hun lvgab pioqlupnum.

³³‍Hoqgab mwv haagag viyap tvrgw tulungam poop-daayar aiyin lvkin dvb olib svvda lvgab diilwqnum,

³⁴‍hoo viyap yvbnyiam saipres svvtaq hoqgv mwlwqnum. Viyap yabg ham yvbnyi gob kuqpin sudub mvnum, hoo viyap yvbnyi kalam gon kuqpin sudub mvnum.

³⁵‍Viyap tulug aoho mwv cerubim mam hoo pvng svvn tulungam hoo opu puulin dvb mwiyw-mvcnam ojam pilwqnum, hoo mwv hoq svvda taqnam tulu ham hun lvgab pioqlupnum.

³⁶‍Mwv urag baagam taqnam wlw tommum go paacanum hoo sidar svvtaqkam tamkin go piulwqnum.

³⁷‍Vnyw nywpig Jib pool ho At Swg dvrwq namlog gwwlam diilwq kunum.

³⁸‍Hoo vnyw camleq nywkinwg Bul pool ho, hoqhv pool piin gob nyinum, nam nvmpwngam hoggv xeq mvsv doonum ham muiyum cumcuml mvnya kunum. Mwv soq nam sam vnyw kvn go mvnum.